1. Ne̱ni 2 Korinto 3:1-3 e mongwane̱no̱ biso̱ o so̱ṅtane̱ ná ye nde biso̱ edube ende̱ne̱ o tombise̱ jokwa la Bibe̱l nate̱na o dubise̱ e? (Ombwa duta la dipapa laboso.)

NE̱NI o masengano̱ ponda o me̱ne̱no̱ mokwe̱ Bibe̱l ńa mwemba mo̱ngo̱ e o dubisabe̱ e? Ye̱ke̱i te̱ we muńe̱nge̱ jita! (Mat. 28:19) Ye pe̱ te̱ ná wa nde o tombise̱ jokwa lao, we pe̱te̱ muńe̱nge̱ tobotobo! (1 Tes. 2:19, 20) Ba ba dubisabe̱ peńa be nde “kalati ni matembeye̱” ńa bwam, seto̱ buka te̱ ońola bato ba tombise̱ babo̱ jokwa, nde ońola mwemba mwe̱se̱ pe̱.​—Langa 2 Korinto 3:1-3.

2. (a) Njika to̱ti la mweńa jangame̱nno̱ kwalea e, na ońola nje e? (b) Nje ye jokwa la Bibe̱l e? (Ombwa maki owas’a dipapa.)

² Ye muńe̱nge̱ jita o je̱ne̱ ná o min mimbu mine̱i mi tombi, mulopo m’ebolo mu kusi bolangi ba lambo ka 10 000 la mokwa ma Bibe̱l * ma diabe̱le̱ mo̱di te̱. O ni pambo a ponda me̱ne̱, buka na 280 000 la bato lo dubisabe̱ ka Mboṅ a Yehova na bokwedi ba peńa ba Yesu Kristo. Nje jeno̱ ná di bola o jongwane̱ lone̱ lodun la bato o dubisabe̱ e? Niponda Yehova eno̱ lee̱le̱ we̱lisane̱ ná a bole bato ponda na epolo o timba bokwedi ba Kristo, biso̱ pe̱ jangame̱n bola me̱se̱ ná jongwane̱ babo̱ o pomane̱ ńaka ná ba dubisabe̱. Ponda e wuto!​—1 Kor. 7:29a; 1 Pet. 4:7.

3. Nje di me̱nde̱no̱ jombwea o din jokwa ońola tombise̱ la mokwa ma Bibe̱l e?

 ³ Nika ebol’a timbise̱ bato bokwedi yeno̱ musunga, Dibe̱le̱ di Madie̱le̱ di baise̱ mikanjo m’ebolo nje jangame̱nno̱ bola o jongwane̱ jita la mokwa masu ma Bibe̱l o ńaka nate̱na o dubise̱. O din jokwa na mena ma bupe̱, di me̱nde̱ je̱ne̱ nje paonia, bamuloloma, na baboledi b’ebondo beno̱ ná bokwe̱le̱ biso̱. * (Min. 11:14; 15:22) Ba matele̱ye̱ nje batombise̱ mokwa ma Bibe̱l na bokwe̱ Bibe̱l bangame̱nno̱ bola ná jokwa di ye bepuma. O din jokwa di me̱nde̱ jombwea mambo matanu mokwe̱ Bibe̱l angame̱nno̱ bola ná a ńake nate̱na o dubise̱.

4. Nje jangame̱nno̱ so̱ṅtane̱ jombwea mokwa ma Bibe̱l ma matombe̱ o muna ma jo̱mbe̱ e?

⁴ Jita la bonasango na bonańango asu ba matombise̱ mokwa o muna ma jo̱mbe̱ la mot’ekwali. To̱ná ni mbad’a bola ńeno̱ nde bebotedi ba bwam ońola jokwa, ekwali e yo̱ki nde be̱ pe̱m n’esungu, yen ebe e si me̱nde̱ pe̱ to̱ be̱ woki te̱. O bwam ba bongwa ńo̱ng’a moto, bonasango bape̱pe̱ ba mabaise̱ mot’ekwali no̱mb’ao ńa telefon, ná ba bele̱ mo̱ to̱ ba lomeye mo̱ mwe̱ndi mu be̱n mulatako na Bibe̱l. Ni ńai a bekwali be ná bala oboso myo̱di mi tomba, esibe̱ ná di jokwa la Bibe̱l di yai bepuma. Nu mokwe̱ Bibe̱l e so̱ ná a ńaka nate̱na o dubise̱ yete̱na a si mapo̱ngo̱ miwe̱n ma tobotobo o jokwa Eyal’a Loba e? Yen ebe ke̱m!

5. Nje Yesu a kwalino̱ o Lukas 14:27-33 jeno̱ ná di bolane̱ o jongwane̱ bokwe̱ Bibe̱l e?

⁵ Buńa bō̱, Yesu a bolane̱ eyembilan ewo̱ o lee̱ nje moto angame̱nno̱ bola ná a be̱ mokwed’ao. A kwaledi ońola moto ńe o pule̱ longe̱ jongo, na kiṅe̱ ni mapule̱ wale̱ o bila. Yesu a kwali ná mulongedi angame̱n “se̱le̱ ja wase, a dutea mususedi mao” ná a we̱le̱ bo̱le̱ longa, na ná kiṅe̱ ńangame̱n “se̱le̱ ja wase o dutea myano” ná e̱ne̱ nga sonj’ao ya bila i dongame̱n o jana. (Langa Lukas 14:27-33.) Mulemlem pe̱ nde Yesu a tano̱ a bia ná nu ńena nu mapule̱ be̱ mokwed’ao angame̱n se̱le̱ dutea bwam bwam nje nika e mapulano̱ kwala. Ońola nika, jangame̱n langwea bokwe̱ Bibe̱l ná jokwa langame̱n tomba woki te̱. Ne̱ni jeno̱ ná di bola nika e?

6. Nje jangame̱nno̱ keka bola ná mokwa ma Bibe̱l ma ńake e?

 ⁶ Botea na ko̱ko̱ ponda lo matombise̱no̱ o jokwa. Ponda po̱ we ná o bata epas’a Bibe̱l epe̱pe̱ o ekwal’ańu. Mot’ekwali a máko̱lo̱ngo̱ne̱ te̱ o kwala pond’a bwaba, baise̱ mo̱ nga bińo̱ le ná lo ja ná lalane̱ ekwali oboso. Jalabe̱ lao di me̱nde̱ lee̱ nga a mano̱ngo̱ jokwa la Bibe̱l mweńa. Ná wongwane̱ mo̱ o pomane̱ ńaka, we pe̱ ná o baise̱ mo̱ nga a me̱nde̱ to̱ndo̱ ná bińo̱ lokwe ngedi iba ońola woki. Nde e be̱ ná lo mokwa nde ngedi po̱ to̱ iba woki, lambo dipe̱pe̱ di mapula.

7. Ne̱ni mutombise̱ jokwa eno̱ ná a boṅsane̱ bwam ońola jokwa te̱ e?

⁷ Wa ńe mutombise̱ jokwa, wangame̱n boṅsane̱ bwam ońola jokwa la Bibe̱l te̱. We ná o botea na se̱le̱ langa jokwa na bepasi ba Bibe̱l. So̱ṅtane̱ myom ma mato̱ti bwam. Ombwea tem’a jokwa, milopo misadi, myuedi ma jokwa, bepasi ba Bibe̱l ba tilino̱ ná “langa,” maduta, na sinima ye ná i bata tele̱ye̱ ni tema. Ombusa nika, o̱nge̱le̱ mokwe̱ Bibe̱l, o duteye ne̱ni o me̱nde̱no̱ tele̱ye̱ mo̱ mambo o mbadi ni wam na ńe pe̱ bwē, ná a we̱le̱ pomane̱ so̱ṅtane̱ nde a we̱le̱ pe̱ nika o ebolo.​—Neh. 8:8; Min. 15:28a.

8. Nje byala ba Paulo o Kolose 1:9, 10 be mokwe̱le̱no̱ biso̱ jombwea kane̱ ońola mokwa masu ma Bibe̱l e?

⁸ O m’boṅsan mo̱ngo̱ kane̱ Yehova ońola mokwe̱ Bibe̱l, na ońola ńo̱ng’ao. Baise̱ Yehova ná ongwane̱ wa o jokwe̱le̱ Bibe̱l o mbadi ni matape̱ mulema ma moto. (Langa Kolose 1:9, 10.) Keka dutea oboso ba ponda jombwea mambo mena mokwe̱ Bibe̱l eno̱ ná a si so̱ṅtane̱, to̱ jemea. O si dimbea ná janda le nde ná wongwane̱ mo̱ o ńaka nate̱na o dubise̱.

9. Ne̱ni mutombise̱ jokwa eno̱ ná ongwane̱ mokwe̱ Bibe̱l o boṅsane̱ jokwa lao e? Bola beteledi.

⁹ Ńo̱ng’asu ńe nde ná jokwa la Bibe̱l di matombe̱ ponda ye̱se̱ longwane̱ mokwe̱ Bibe̱l o timbise̱le̱ masoma ońola nje Yehova na Yesu ba bolino̱, a be̱ne̱ pe̱ ńo̱ngi o bata jokwa. (Mat. 5:3, 6) Mokwe̱ Bibe̱l angame̱n be̱ mususu o jokwa o bwam ná a tombwane̱. Ná a tongwe̱le̱ o bola nika, tele̱ye̱ mo̱ mweńa ma boṅsane̱ jokwa te̱, nika ńe nde langa jokwa oboso ba ponda, na dutea pe̱ ne̱ni eno̱ ná a we̱le̱ nje eno̱  jokwa o ebolo. Ne̱ni weno̱ ná wongwane̱ mo̱ o boṅsane̱ e? Boṅsane̱ jokwa mwemba na mokwe̱ Bibe̱l ná o lee̱ mo̱ ne̱ni ba mabolano̱. * Lee̱ mo̱ ne̱ni so̱ malabe̱ ma myuedi, na ne̱ni kika byala ba mweńa buka te̱, to̱ milo̱ṅ ma byala mi me̱nde̱ jongwane̱ mo̱ o jo̱nge̱le̱ jalabe̱. Ombusa nika, kwalane̱ mo̱ ná a bole jalabe̱ na byala bao ba mo̱me̱ne̱. A boli te̱ nika, o me̱nde̱ we̱le̱ bia nga a so̱ṅtane̱ jokwa to̱ ke̱m. Nde lambo dipe̱pe̱ le weno̱ ná wongwane̱ jokwa lo̱ngo̱ la Bibe̱l o bola.

10. Ońola nje yeno̱ mweńa o langa Bibe̱l buńa te̱ e, ne̱ni pe̱ busane̱ tombwane̱ o bo bolanga e?

¹⁰ O sumo te̱ ná mokwe̱ Bibe̱l angame̱n jokwa woki te̱ na mutombise̱ mo̱ jokwa, angame̱n pe̱ bola lambo dipe̱pe̱ buńa te̱. Angame̱n kwala na Yehova. Ne̱ni e? Tongwea na sengane̱ Yehova na kwalisane̱ pe̱ mo̱. A masengane̱ nde Loba ke̱ a malanga Bibe̱l buńa te̱. (Yos. 1:8; Mye. 1:1-3) Lee̱ mo̱ ne̱ni bolane̱ mudango ma bolanga ba Bibe̱l mwe o jw.org. * Ná a tombwane̱ bolanga bao ba Bibe̱l, ome̱le̱ mo̱ ná a duteye nje Bibe̱l e mokwe̱le̱no̱ mo̱ jombwea Yehova, na ne̱ni eno̱ ná a we̱le̱ nje a mokwano̱ o ebolo o longe̱ lao la mo̱me̱ne̱.​—Bebolo 17:11; Yak. 1:25.

11. Ne̱ni mokwe̱ Bibe̱l eno̱ ná okwa o kane̱ bwam e, ońola nje pe̱ yeno̱ mo̱ mweńa ná a kane̱ Yehova ponda ye̱se̱ e?

¹¹ Ome̱le̱ mokwe̱ Bibe̱l ná a kwalisane̱ Yehova tongwea na muka buńa te̱. O bebotedi na o su la jokwa te̱, kane̱ na mulema mwe̱se̱, o kwaleye pe̱ onola mokwe̱ Bibel o muka. Nika a masengano̱ mika mo̱ngo̱, a me̱nde̱ jokwa ne̱ni kane̱ Yehova Loba na mulema mwe̱se̱ o dina la Yesu Kristo. (Mat. 6:9; Yohane 15:16) Dutea te̱ ne̱ni bolanga ba Bibe̱l ba buńa te̱ (sengane̱ Yehova) na muka (kwalisane̱ Yehova) ba me̱nde̱no̱ jongwane̱ mokwe̱ Bibe̱l o bata sisea Loba be̱be̱! (Yak. 4:8) Mokwe̱ Bibe̱l a no̱ngi te̱ ko̱lo̱ngo̱ne̱ o bola nika, nik’e me̱nde̱ jongwane̱ mo̱ o ńaka natē̱ a bake̱ ńolo a dubisabe̱ pe̱.

12. Ne̱ni mutombise̱ jokwa eno̱ ná ongwane̱ mokwe̱ Bibe̱l o be̱ne̱ mulatako ma bwam na Yehova e?

¹² Nje mokwe̱ Bibe̱l a mokwano̱ e s’angame̱n buka te̱ be̱ mo̱ o bo̱ngo̱, nde o  mulema pe̱. Ońola nje e? Mulema masu​—mwena mu bambe̱ ńo̱ng’asu, mo̱nge̱le̱ masu na besengedi basu ba teten​—nde mu matute̱le̱ biso̱ o ebolo. Belēdi ba Yesu be ta be tute̱le̱ bato o dutea. Nde bato ba ta pe̱ ba bupe̱ mo̱ ońolana be belēdi be ta be tapa babo̱ milema. (Lukas 24:15, 27, 32) Mokwe̱ Bibe̱l angame̱n je̱ne̱ Yehova ka Moto ńe na mbale̱, moto na nja eno̱ ná a be̱ne̱ mulatako ma bwam, Sango ao, Loba lao, na diko̱m lao. (Mye. 25:4, 5) O pond’a jokwa, bonde̱ bede̱mo ba bwam ba Loba lasu. (Bbu. 34:5, 6; 1 Pet. 5:6, 7) E be̱ to̱ njika to̱ti bińo̱ leno̱ o kwalea, wasa lee̱ njika pat’a Moto Yehova eno̱. Bola ná mokwe̱ Bibe̱l a to̱nde bede̱mo ba bwam ba Loba​—ndol’ao, bwam bao, na nded’ao. Yesu a kwali ná “byanedi baboso na be kolo buka be̱se̱” be nde ná “To̱ndo̱ Sango [Yehova, NWT], Loba lo̱ngo̱.” (Mat. 22:37, 38) We̱ ná o se ndol’a ńo̱ngo̱ńo̱ngo̱ ńa Loba o mulema ma mokwe̱ Bibe̱l.

13. Bola eyembilan ya ne̱ni jongwane̱ mokwe̱ Bibe̱l o jokwa bia bede̱mo ba Yehova.

¹³ We te̱ o ekwali na jokwa lo̱ngo̱, tele̱ye̱ mo̱ ońola nje o to̱ndino̱ Yehova. Nik’e me̱nde̱ jongwane̱ mo̱ o so̱ṅtane̱ ná mo̱ pe̱ angame̱n be̱ diko̱m na Yehova, na jokwa pe̱ o to̱ndo̱ mo̱. (Mye. 73:28) K’eyembilan, mo̱ o be̱n mulo̱ṅ ma byala mō̱ o kalat’a jokwa to̱ epas’a Bibe̱l ewo̱ yena e tapi wa, e makwaleye̱ ońola ndol’a Yehova, dibie̱ lao, te̱me̱ lao la sim, to̱ ngiń’ao e? Langwea jokwa lo̱ngo̱ nika, o bole pe̱ ná a bie ná lambo diwo̱ di oteten a mambo jita ma mabole̱ ná o to̱nde Sango ango̱ ńe o mo̱ń. Lambo dipe̱pe̱ le lena mokwe̱ Bibe̱l te̱ angame̱nno̱ bola o bwam ba ńaka nate̱na o dubise̱.

14. Bupisane̱ Bonahebe̱r 10:24, 25 ne̱ni ndongame̱n i mongwane̱no̱ mokwe̱ Bibe̱l o ńaka e?

¹⁴ Biso̱ be̱se̱ di be̱n ńo̱ngi ná mokwe̱ Bibe̱l a ńake nate̱na o dubise̱. Mbadi po̱ ńa jongwane̱ mo̱ ńe nde o tute̱le̱ mo̱ o jukea o ndongame̱n. Batombise̱ mokwa bena be jangwa ba makwala ná bokwe̱ Bibe̱l bena ba mukeye̱ o ndongame̱n ba mapomane̱ ńaka. (Mye. 111:1) Bō̱ ba matele̱ye̱ mokwa mabu ná jokwa la Bibe̱l di mabola babo̱ dongo diwo̱ la belēdi ba Bibe̱l, nde dine̱ dongo pe̱ ba makusa nde mo̱ o ndongame̱n. Langa Bonahebe̱r 10:24, 25 na jokwa lo̱ngo̱, nde o tele̱ye̱ pe̱ mo̱ nje jukea la ndongame̱n di me̱nde̱no̱ wanea mo̱ ka tombwane̱. Lee̱  mo̱ sinima Nje e matombe̱ o ndabo a Janea e? * Ongwane̱ mo̱ ná a si tona ndongame̱n to̱ po̱.

15. Nje jeno̱ ná di bola o tute̱le̱ mokwe̱ Bibe̱l o jukea o ndongame̱n e?

¹⁵ Nje weno̱ ná o bola yete̱na jokwa lo̱ngo̱ di si mukea o ndongame̱n to̱ ná di si mukea ponda ye̱se̱ e? Kwalane̱ mo̱ na bokenju nje wokono̱ o ndongame̱n ni tombi. E̱n te̱ ne̱ni o to̱ndino̱ ndongame̱n, nika ńe ná e tute̱le̱ mo̱ o jukea. Bola mo̱ Njongo a Betatedi to̱ Kalat’a ndongame̱n a longe̱ la kriste̱n jeno̱ jokwa o ndongame̱n. Lee̱ mo̱ nje e me̱nde̱ kwalabe̱ o ndongame̱n ni bupe̱, baise̱ pe̱ mo̱ njika dongo di kwedi mo̱ o mulema. Nje mokwe̱ Bibe̱l a me̱nde̱no̱ je̱ne̱ na senga o ndongame̱n ńao ńaboso e me̱nde̱ be̱ bwam buka nje ye̱se̱ a máje̱ne̱no̱ to̱ a másengano̱ o mako̱to̱ne̱ ma bebasi bepe̱pe̱. (1 Kor. 14:24, 25) A me̱nde̱ je̱ne̱ bato bape̱pe̱ bena be byembilan ba bwam eno̱ ná a bupe̱, na bena ba me̱nde̱ jongwane̱ mo̱ o ńaka nate̱na o dubise̱.

16. Nje jangame̱nno̱ bola ná di tombise̱ mokwa ma Bibe̱l ma mańake̱ nate̱na o dubise̱ e, nje pe̱ di me̱nde̱no̱ jombwea o jokwa di bupe̱ e?

¹⁶ Ne̱ni jeno̱ ná di tombise̱ mokwa ma Bibe̱l ná ma ńake nate̱na o dubise̱ e? Jangame̱n jome̱le̱ jokwa la Bibe̱l ná a no̱nge jokwa lao mweńa tongwea na jokwa woki te̱, na boṅsane̱ pe̱ jokwa lao te̱. Jangame̱n jome̱le̱ mo̱ ná a kwalisane̱ Yehova buńa te̱ ná a be̱ne̱ mulatako ma bwam na mo̱. Jangame̱n pe̱ tute̱le̱ mo̱ ná ukeye o ndongame̱n. (Ombwa edinge̱le̱ o dipapa 12, “ Nje bokwe̱ Bibe̱l bangame̱nno̱ bola ná ba ńake nate̱na o dubise̱.”) Nde ka nje te̱ jokwa di bupe̱ di me̱nde̱no̱ lee̱, mambo mape̱pe̱ matanu me mena mutombise̱ jokwa la Bibe̱l eno̱ ná a bola ná mokwe̱ Bibe̱l a ńake nate̱na o dubise̱.