O MIŃA ma Bibe̱l, mbia ma mome mu ta be̱ mu bola mbia ma muto bema ba diba o pond’a ekwal’a diba. Bema ba diba be ta nde k’eyembilan, mambo ma tiki, byembe, to̱ mo̱ni. Ponda iwo̱ pe̱ bema ba diba be ta nde be sawabe̱ tongwea n’ebolo, ka nje te̱ Yakob a bolino̱ ponda emedino̱ o bolea sango a Rahel mimbu samba ná Rahel a be̱ munj’ao. (Bbot. 29:17, 18, 20) Ońola nje bema ba diba be tano̱ be bolabe̱ e?

Mubied’a Bibe̱l mō̱ nu belabe̱ ná Carol Meyers mo̱ ná: “Ba ta nde ba bola bema ba diba o kudumane̱ mbo̱lo̱n a jongwane̱ lena mun’a muto a wusano̱ wanea mbia mao, sepo̱n o mbia mena mi ta nde mi bola ebol’a myōnda.” Bema ba diba be ta pe̱ bongwane̱ o jouse̱ mulatako oteten a mbia mibane̱ diba di latino̱. Mu mulatako ma mbia mu wusa jongwane̱ o suane̱le̱ o pond’a ndutu. O sumo te̱ nika, bema ba diba be ta pe̱ nde be lee̱ ná nu muto a máwandabe̱, son a ponda a si me̱nde̱ pe̱ be̱ owas’a dibongo na betatedi ba sango, nde ba mom’ao.

Bola la bema ba diba di si ta di pula kwala ná muto a ta nde lambo ba mandise̱no̱ to̱ ba mandano̱. Kalati po̱ ni makwaleye̱ ońola beboledi ba diba o Israel ńa kwaṅ mo̱ ná: “Eto̱m a bola mbia ma muto mo̱ni, to̱ lambo dipe̱pe̱, e ta e bola ná diba o Israel le̱ne̱ne̱ ka ńunga. Mbale̱ ńe nde ná Bonaisrael ba si ta ba langa bema ba diba ka sango le o bolabe̱ o janda muto, nde ka sango le o bolabe̱ o kudumane̱ mbo̱lo̱n a mbia.”

O nin we̱nge̱, o jita la bekombo, bato ba dia ba mabupe̱ ede̱mo a bola bema ba diba o wanda muto. Bayedi be kriste̱n ba mabaise̱ te̱ bema ba diba ońola mun’abu, bese̱le̱ ná ‘muyao mabu mu biane̱ na bato be̱se̱,’ ba si baise̱ buka nje yangame̱n. (Fil. 4:5; 1 Kor. 10:32, 33) Bola la nika di malee̱le̱ nde ná ba titi “bato̱nde̱ mo̱ni,” to̱ bato ba mukubo. (2 Tim. 3:2) O sumo te̱ nika, bayedi be kriste̱n ba baise̱ te̱ nje yangame̱n, mome ńe o pule̱ wande̱ mun’abu a si me̱nde̱ be̱ eto̱m o nime̱le̱ dikaki la diba oboso natē̱ a kusa nje ba mapulane̱no̱ mo̱. To̱so̱ a si me̱nde̱ be̱ eto̱m o jese̱le̱ ebol’ao ya paonia ońolana angame̱n bola ebol’a musawedi ya pond’a mususu ná a kuse mo̱ni o sawa mambo ba baise̱no̱ mo̱.

O bekombo bō̱, go̱bina nde e te̱se̱ bema ba diba bena bangame̱n o bolabe̱. O be bekombo, bayedi be kriste̱n bangame̱n bupe̱ ma mambenda. Ońola nje e? Eyal’a Loba e makwala ná kriste̱n e “sibise̱ mo̱me̱ne̱ owas’a manea ma be̱n ngińa omo̱ń ao,” etum te̱ nika e si mate̱nge̱ne̱no̱ mambenda ma Loba.—Rom. 13:1; Bebolo 5:29.