1. Njika lo̱ko̱mea di makusano̱ ke̱ je muso̱lo̱ki to̱ ke̱ di be̱n mitakisan mi buki biso̱ o lembe̱ e? (Myenge 118: 5-7)

MO̱ O másenga buńa bō̱ biana we muso̱lo̱ki e, ná to̱ moto a titi ńe ná ńongwane̱ wa o le̱mbe̱ mitakisan mō̱ o be̱nno̱ e? Jita la bato ba ta o i ńai a bete̱medi, name̱ne̱ pe̱ na baboledi ba Yehova ba jemea. (1Ki. 19:14) Nik’e po̱yedi te̱ wa, o̱nge̱le̱ din kakane̱ la Yehova: “Na si me̱nde̱ kele̱ wa to̱ sombe̱ wa tom.” Je so̱ ná di kwala na mbaki ná: “Sango [Yehova] nde e jongwane̱ lam, na si mabwa bo̱ngo̱.” (Bon. 13:5,6) Ńamuloloma Paulo a tiledi bonasango be o Yudea ben byala lambo ka o mbu 61 P.A. Byala bao be mo̱nge̱le̱ biso̱ nje mulo̱ngedi a tilino̱ o Myenge 118:5-7.​​—Langa.

2. Nje di me̱nde̱no̱ je̱ne̱ o din jokwa e, ońola nje pe̱ e?

² Kapo̱ ka mulo̱ngedi, Paulo a ta a bia ná Yehova e Mongwaned’ao, ońolana ongwane̱ mo̱ jita la ngedi. K’eyembilan, buka mbu miba obiana a matilea Bonahebe̱r leta, mùdi munde̱ne̱ mu takise̱ Paulo o munja ke̱ e o wala o lo̱ndo̱. (Bebolo 27:4, 15, 20) Nde o mbadi jita, Yehova ongwane̱ Paulo o di lo̱ndo̱ na ombusa nika. Di mala jombwea mbadi ilalo. Yehova a bolane̱ Yesu na ange̱l, bato ba be̱n doi, name̱ne̱ pe̱ na bonasango na bonańango. Jokwa la mambo ma po̱yedi Paulo di me̱nde̱ jouse̱ lakisane̱ di be̱nno̱ ná Loba a me̱nde̱ pe̱ jalabe̱ mika masu ka nje te̱ a kakane̱no̱.

3. Yen ebe, nje Paulo a baise̱no̱ mo̱me̱ne̱ e, na ońola nje e?

³ Paulo a ta a be̱ne̱ ńo̱ng’a jongwane̱. La mbu 56 P.A., dimuti di busane̱ mo̱ o tempe̱l a Yerusalem, di pula bwa mo̱. Bone̱ bao, ponda ba wanno̱ Paulo oboso ba mwemba  ma bakaisedi bande̱ne̱, e ta nde e pula son ná basingedi bao ba ńawe mo̱. (Bebolo 21:30-32; 22:30; 23:6-10) O ni ponda, yen ebe Paulo a baise̱ mo̱me̱ne̱ ná, ‘Ponda ininga na me̱nde̱no̱ lembe̱ min mitusan e?’

4. Ne̱ni Yehova a bolane̱no̱ Yesu o jongwane̱ Paulo e?

⁴ Ne̱ni Yesu ongwane̱no̱ Paulo e? O bulu bo bupe̱ “Sango,” Yesu a ta a po̱ye̱ mo̱, a kwala ná: “Embe̱ mulema! Ebanja kana o bolino̱ mboṅ ońol’am o Yerusalem, nikame̱ne̱ nde o me̱nde̱no̱ bola mboṅ o Roma.” (Bebolo 23:11) Be byala bembe̱ Paulo jita! Yesu a sesi mo̱ ońola mboṅ a bolino̱ o Yerusalem. A kakane̱ pe̱ mo̱ ná a me̱nde̱ tunge̱ o Roma, we̱ni a me̱nde̱no̱ pe̱te̱ bola mboṅ. Ombusa mo̱ kusa din kakane̱, ye̱ke̱i te̱ Paulo a ta mbaki ka muna nu nanga o bwanga ba sango.

5. Ne̱ni Yehova a bolane̱no̱ ange̱l o jongwane̱ Paulo e? (Ombwa duta la dipapa laboso.)

⁵ Njika mitakisan mipe̱pe̱ Paulo a kusino̱ e? Lambo ka mbu miba ombusa nje e tombi o Yerusalem, Paulo a ta o bo̱lo̱ bo ta balane̱ mo̱ o Italia na ngo̱ ninde̱ne̱ e wungea, kańena bato ba ta o bo̱lo̱ bo̱nge̱le̱ ná ba me̱nde̱ wo̱. Nde Paulo a si ta a bwa bo̱ngo̱. Ońola nje e? A langwedi be̱se̱ ba ta o bo̱lo̱ ná: “Bon bulu ange̱l a Loba ńena nu be̱n mba, ńena na maboleano̱, e po̱ye̱ mba, e kwala na: A Paulo, o si bwa bo̱ngo̱! O me̱nde̱ te̱me̱ oboso ba kaisa; nde ombwa, Loba abedi wa be̱se̱ bena be o bon bodu mwemba na wa.” Yehova a bolane̱ ange̱l o yikiye̱ Paulo kakane̱ a se̱le̱no̱ bola mo̱ tongwea na Yesu. Paulo a tunge̱ o Roma, ka nje te̱ Yehova a tano̱ a kakane̱ mo̱.​​—Bebolo 27:20-25; 28:16.

6. Njika kakane̱ Yesu a bolino̱ di membe̱ biso̱ e, ońola nje pe̱ e?

⁶ Ne̱ni Yesu a mongwane̱no̱ biso̱ e? Yesu a me̱nde̱ sue̱le̱ biso̱, ka nje te̱ a bolino̱ na Paulo. K’eyembilan, Yesu a kakane̱ be̱se̱ ba mabupe̱ mo̱ ná: “Ne na bińo̱ mińa me̱se̱ nate̱na su la wase.” (Mat. 28:20) Byala ba Yesu be membe̱ biso̱. Ońola nje e? Ońolana mińa mō̱, e titi biso̱ bu o lembe̱. K’eyembilan, ponda di mabo̱lo̱ne̱no̱ ńandolo mō̱, sese di masengano̱ e si minda buka te̱ ngus’a mińa, nde mimbu jita. Bape̱pe̱ pe̱ ba be̱n mitakisan mena bodun bo mawanano̱. Bō̱ pe̱ ba matombise̱ pond’a bobe ońolana ba be̱n diboa la mo̱nge̱le̱. To̱ na man me̱se̱, di makusa te̱ nde ngińa o lembe̱ ońolana di bi ná Yesu e na biso̱ “mińa me̱se̱” name̱ne̱ pe̱ na o mińa ma bobe ma longe̱ lasu.​​—Mat. 11:28-30.

7. Bupisane̱ kalat’a Bebīsedi 14:6, ne̱ni Yehova a mongwane̱no̱ biso̱ we̱nge̱ e?

 ⁷ Eyal’a Loba e mabola biso̱ mbaki ná Yehova a mongwane̱ biso̱ tongwea na ange̱l ao. (Bon. 1:7, 14) K’eyembilan, ange̱l i mongwane̱ biso̱ ke̱ di mate̱ye̱ bato ba “bekombo be̱se̱ na mbia na leme̱ na matumba” dikalo la “myango ma bwam ma janea.”​​—Mat. 24:13, 14; Langa Bebīsedi 14:6.

8. Ne̱ni Yehova a bolane̱no̱ mwaned’a bila o jongwane̱ Paulo e?

⁸ Njika jongwane̱ Paulo a kusino̱ e? Di timbe o mbu 56 P.A.; Yesu a boli Paulo mbaki ná a me̱nde̱ tunge̱ o Roma. Nde, dongo la Bonayuda ba ta ba so̱mo̱ mo̱ o bwa mo̱. Ponda mwaned’a boso ńa Roma Klaudius Lisias a sengino̱ ońola mu mwano, ongwane̱ Paulo. Dibokime̱ne̱ Klaudius anedi nde dibo̱to̱ dinde̱ne̱ la bato ba bila ná ba tate Paulo, balane̱ pe̱ mo̱ o Kaisarea, etum a lo̱ndo̱ la 105 km na Yerusalem. Ba po̱ino̱ o Kaisarea, go̱bina Felix a boli nde o̱da ná Paulo ‘a we̱le̱be̱ o ndabo a muka ńa Herode.’ Bonayuda bena ba ta ba pula bwa mo̱, ba si wusa bolane̱ mo̱ bobe owo.​​—Bebolo 23:12-35.

9. Ne̱ni go̱bina Festo ongwane̱no̱ Paulo e?

⁹ Mbu miba ombusa ponda, Paulo a ta te̱ nde a dia o beboa o Kaisarea. Festo nde a ta a mátimbane̱ Felix, ka go̱bin’a peńa. Bonayuda ba so̱so̱me̱ye̱ Festo ná Paulo a wanabe̱ o Yerusalem ná a kaisabe̱, nde Festo a bangi. Ponda po̱ a ta a bia ná Bonayuda “ba maso̱mo̱ mo̱ ná ba bwe mo̱ o ngea.”​​—Bebolo 24:27–25:5.

10. Nje go̱bina Festo a kwalino̱ ponda ńena Paulo a baise̱no̱ ná a mapula nde ka oboso ba kaisa e?

¹⁰ Ombusa ponda, Paulo kaisabe̱ o Kaisarea. Kana Festo a tano̱ “a pula do̱lisane̱ Bonayuda,” a baise̱ Paulo ná: “O to̱ndi jondea o Yerusalem ná na kaise̱ wa oten ońola man mambo e?” Paulo a ta a bia ná yen ebe Bonayuda ba me̱nde̱ bwa mo̱ o Yerusalem, a ta pe̱ a bia nje bola ná a sunge longe̱ lao, ná ale o Roma, alane̱ pe̱ ebol’ao ya dikalo oboso. Na mo̱ alabe̱ ná: “Na mapula nde ka oboso ba kaisa!” Ombusa Festo kwala na mikwandedi mao, na mo̱ a langwea Paulo ná: “O puli ka oboso ba kaisa, o me̱nde̱ wala oboso ba kaisa.” Bedomsedi ba Festo ba loma Paulo o Roma be sungi mo̱ o mā ma basingedi bao. Paulo a wusa so̱ be̱ o Roma, etum na Bonayuda bena ba ta ba wasa o bwa mo̱.​​—Bebolo 25:6-12.

11. Njika byala be membe̱ be tilabe̱ na Yesaya Paulo o̱nge̱le̱no̱ yen ebe e?

¹¹ Ke̱ Paulo e o pula botea lo̱ndo̱ lao la wala o Italia, yen ebe o̱nge̱le̱ jome̱le̱ muto̱ped’a mudī Yesaya a bolino̱ ba ba mate̱nge̱ne̱ Yehova ná: “Weka mwano, nde mu me̱nde̱ bulea, to̱po̱, nde byala bańu be si me̱nde̱ londa, ebanja Loba e na biso̱.” (Yes. 8:10) Paulo a ta a bia ná Loba a me̱nde̱ jongwane̱ mo̱, yeke̱i te̱ nika ńembe̱ mo̱ ná a we̱le̱ lembe̱ mitakisan mi ta mo̱ oboso.

12. Ne̱ni Yulio ombwedino̱ Paulo e, nje pe̱ Paulo a so̱ṅtane̱no̱ yen ebe e?

¹² O mbu 58 P.A., Paulo a botedi lo̱ndo̱ lao wala o Italia. A ta nde a bakabe̱ o dia la mwaned’a bila mō̱ nu belabe̱ ná Yulio. Botea ni ponda, Yulio a ta a be̱ne̱ epolo o takise̱ Paulo to̱ bolea mo̱ bwam. Ne̱ni a me̱nde̱no̱ bolane̱ doi lao la byanedi e? Bone̱ bao, ponda ba se̱le̱no̱ te̱me̱ o Sidon “Yulio a ta muyao na Paulo, a ta a bola mo̱ wonja o wala omboa mako̱m mao.” Ombusa ponda, Yulio a sungi pe̱ longe̱ la  Paulo. Ne̱ni e? Bato ba bila ba puli bwa bato ba beboa be̱se̱ ba ta o bo̱lo̱, nde Yulio eki babo̱. Ońola nje e? A “ta a pula sunga Paulo.” Ye̱ke̱i te̱ Paul a so̱ṅtane̱ ná Yehova nde e o bolane̱ nu mwaned’a bila ńa muyao o jongwane̱ mo̱ na tata pe̱ mo̱.​​—Bebolo 27:1-3, 42-44.

13. Ne̱ni Yehova a mabolane̱no̱ bato ba be̱n doi e?

¹³ Njika jongwane̱ di makusano̱ e? O bwam ba londise̱ mwano mao, Yehova e ná a bolane̱ mudī mao musangi o tute̱le̱ bato ba be̱n doi o bola nje a mapulano̱. Kiṅe̱ Salomo a tili ná: “Mulema ma kiṅe̱ mwe nde o dia la Yehova ka mpo̱lo̱lo̱ ma madiba, a mayo̱mbise̱ mo̱ to̱ we̱ni a to̱ndino̱.” (Min. 21:1) Mu munia mu mapula nde kwala ná nje e? Bato ba benama be ná ba pula musima o bola ná madiba ma tongo ma no̱nge̱ ngea ba mapulano̱. Mulemlem pe̱ nde Yehova eno̱ ná a bolane̱ mudī mao musangi o yua mo̱nge̱le̱ ma banedi ná ba bole mambo o londise̱ mwano mao. A boli te̱ nika, nik’e matute̱le̱ banedi o no̱ngo̱ bedomsedi ońola bwam ba tumba lao.​​—Kobisane̱ na Esra 7:21, 25, 26.

14. Bupisane̱ Bebolo 12:5, ońola nja jeno̱ ná di kane̱ e?

¹⁴ Nje jeno̱ ná di bola e? Je ná di kane̱ “ońola kiṅe̱ na be̱se̱ bena ba be̱n doi” ponda ban ba be̱nno̱ ná ba no̱nge bedomsedi be matape̱ longe̱ lasu la kriste̱n na ebol’asu ya dikalo. (1Tim. 2:1,2; Neh. 1:11) Ka nje te̱ kriste̱n a ńo̱ṅo̱n a boso i bolino̱ esibe̱ wo̱lo̱, biso̱ pe̱ di makwane̱ Loba ońola bonasango na bonańango asu be o beboa. (Langa Bebolo 12:5; Bon. 13:3) Je pe̱ ná di kane̱ ońola batate̱ ndabo a beboa bena ba mombweye̱ bonasango na bonańango asu. Je ná di so̱so̱me̱ye̱ Yehova ná a yue mo̱nge̱le̱ mabu ná ba bole ka Yulio, ba be̱ “muyao” na bonasango na bonańango asu be o beboa.

15-16. Ne̱ni Yehova a bolane̱no̱ Aristarko na Lukas o jongwane̱ Paulo e?

¹⁵ Njika jongwane̱ Paulo a kusino̱ e? Ke̱ e o lo̱ndo̱ o Roma, Yehova a bolane̱ bonasango na bonańango o wanea Paulo jongwane̱. Jombwe byembilan bō̱.

¹⁶ Mako̱m ma Paulo m’ebolo ma jemea maba, Aristarko na Lukas, ba domse̱ ná ba mala na Paulo o Roma. * Ba le̱ke̱ye̱  kwedi bwanga o bwam ba jongwane̱ Paulo, to̱ná yen ebe Yesu a si bolino̱ to̱ mō̱ ńabu mbaki ná ba me̱nde̱ tunge̱ o Roma. O lo̱ndo̱ nde ba so̱ṅtane̱no̱ ná ba me̱nde̱ sungabe̱. Ponda Aristarko na Lukas ba pe̱ye̱no̱ o bo̱lo̱ o Kaisarea, ye̱ke̱i te̱ Paulo a kane̱ Yehova na mulema mao mwe̱se̱, a timbise̱le̱ mo̱ masoma ná a wanedi mo̱ jongwane̱ tongwea na ban bonasango ba ngiń’a mulema.​​—Bebolo 27:1, 2, 20-25.

17. Ne̱ni Yehova a bolane̱no̱ bonasango ba mwemba o jongwane̱ Paulo e?

¹⁷ Bonasango ba myemba bongwane̱ Paulo jita la ngedi o di lo̱ndo̱ lao. K’eyembilan, ponda ba te̱mno̱ o mundi ma Sidon, Yulio a boli Paulo wonja ná ‘ale omboa mako̱m mao o kusane̱ babo̱ jongwane̱.’ Ombusa nika pe̱, o mundi ma Puteoli, Paulo na mako̱m mao ba ‘so̱i bonasango, bena ba so̱so̱medi babo̱ na ba je na babo̱ mińa samba.’ Niponda kriste̱n ya be bepolo i tano̱ yombwea ńo̱ng’a Paulo na ya mako̱m mao, ye̱ke̱i te̱ mo̱ pe̱ a bwese̱ babo̱ muńe̱nge̱ munde̱ne̱ tongwea na langwea babo̱ myango mi membe̱. (Kobisane̱ na Bebolo 15:2, 3.) Ombusa di pe̱pe̱le̱ lena lembe̱ babo̱ be̱se̱, Paulo na mako̱m mao balane̱ lo̱ndo̱ labu oboso.​​—Bebolo 27:3; 28:13, 14.

18. Nje e tute̱le̱ Paulo ná a timbise̱le̱ Loba masoma, a kuse pe̱ jembame̱ e?

¹⁸ Ke̱ e o wala o Roma, ye̱ke̱i te̱ Paulo o̱nge̱le̱ nje a tano̱ a tilea mwemba ma Roma mbu milalo oboso ba ponda: ‘Na be̱n ńo̱ngi min mbu mye̱se̱ o po̱ ombo’ańu.’ (Rom. 15:23) Nde a si ta o̱nge̱le̱ ná a me̱nde̱ nde po̱ owo ka mot’a beboa. E se̱ jembame̱ a kusino̱ ponda e̱nno̱ ná bonasango ba Roma ba po̱i jenge̱le̱ mo̱ o ngea o soma mo̱ e! “Paulo e̱nno̱ babo̱, na mo̱ a so̱ma Loba, na mulema mwembame̱ mo̱.” (Bebolo 28:15) Maka ná Paulo a timbise̱le̱ Loba masoma ná bonasango ba po̱i. Ońola nje e? Ońolana Paulo a so̱ṅtane̱ ná Yehova nde e o jongwane̱ mo̱ tongwea na ba bonasango.

19. Bupisane̱ 1 Petro 4:10, ne̱ni Yehova a mabolane̱no̱ biso̱ o jongwane̱ bonasango asu e?

¹⁹ Nje jeno̱ ná di bola e? Mo̱ o bi bonasango to̱ bonańango ba mwemba mo̱ngo̱  bena ba matake̱ ońolana ba maboa to̱ ba be̱n mitakisan mipe̱pe̱ e? To̱so̱ ná ba bo̱lo̱ne̱ nde ńandolo. Di sengi te̱ ná moto a be̱n ńo̱ng’a jongwane̱, je ná di baise̱ Yehova ná ongwane̱ biso̱ o langwea mo̱ byala ba muyao to̱ bolea mo̱ lambo la bwam. Byala basu na bebolo basu be ná bembe̱ munasango to̱ munańango. (Langa 1 Petro 4:10.) * Di wanedi te̱ babo̱ jongwane̱, nika ńe pe̱te̱ ná e bola babo̱ mbaki ná din kakane̱ la Yehova ná, “Na si me̱nde̱ kele̱ wa to̱ sombe̱ wa tom” di mombwea pe̱ babo̱. Ye̱ke̱i te̱ nik’e me̱nde̱ bwese̱ biso̱ muńe̱nge̱ jita!

20. Ońola nje jeno̱ ná di kwala na mbaki ná: “Sango [Yehova] nde e jongwane̱ lam” e?

²⁰ Kapo̱ ka Paulo na mako̱m mao, yen ebe biso̱ pe̱ di be̱n mitakisan. Nde di si mabwa bo̱ngo̱ ebanja Yehova e na biso̱. A mawanea biso̱ jongwane̱ tongwea na Yesu na ange̱l. Yehova e pe̱ ná ongwane̱ biso̱ tongwea na bato ba be̱n doi yete̱na nika ńe mulatako na mwano mao. Ka nje te̱ e mápo̱ye̱no̱ jita lasu, Yehova a mabolane̱ mudī mao musangi o tute̱le̱ baboledi bao ná ba waneye bonasango na bonańango abu jongwane̱. Ka Paulo, je so̱ ná di kwala na mbaki ná: “Sango [Yehova] nde e jongwane̱ lam, na si mabwa bo̱ngo̱; mot’a benama e ná a bola mba nje?”​​—Bon. 13:6.