O ni ńai a bete̱medi, kana ni kriste̱n e baino̱ pe̱te̱, diba lao la kwaṅ di bo̱i, la peńa di te̱m bupisane̱ mambenda. Nika nde mwemba mwangame̱nno̱ je̱ne̱ mambo. Ná di so̱ṅtane̱ bwam, jombweye nje Yesu a kwalino̱ jombwea bwa la diba, na ba to̱ babe̱ pe̱te̱.

Bupisane̱ Mateo 19:9, Yesu a lango njo̱m po̱ na mune ni se̱medi o Betiledi ni mawane̱ kwed’a diba. Mo̱ ná: “To̱ nja nu mese̱le̱ munj’ao esibe̱ o njo̱m a musonje, nde a ba nupe̱pe̱, ke̱ e nde o musonje.” Byala ba Yesu be mokwe̱le̱ biso̱ ná (1) musonje nde mwe mpo̱m ma njo̱m a Betiledi ni mawane̱ kwed’a diba, na ná (2) mome nu mese̱le̱ munj’ao esibe̱ ni njo̱m a Betiledi nde a ba nupe̱pe̱, e nde o musonje. *

Mo̱ byala ba Yesu be mapula nde kwala ná mome nu wite̱ musonje, na nu bo diba lao e wonja oboso ba Betiledi o ba nupe̱pe̱ e? Ke̱m. Mome a wite̱ te̱ musonje, munj’ao nde a madomse̱ nga a malakise̱ mo̱ to̱ ke̱m. A bangi te̱ lakise̱ mo̱ nde ba bwa diba o bekaisedi, babo̱ babane̱ be wonja o ba pe̱te̱ ponda mapapa ma kwed’a diba me̱se̱ ma madomano̱.

O mune̱ mudi, muto ba wusane̱no̱ e ná a pula ná a malane̱ diba lao oboso, a langwea mom’ao ná a lakise̱ mo̱. Nde ne̱ni e me̱nde̱no̱ be̱ yete̱na mome a bangi ná munj’ao a lakise̱ mo̱, nde ala bwa diba mo̱me̱ne̱ mō̱ o bekaisedi e? Kana muto eno̱ be̱be̱ o lakise̱ mom’ao na walane̱ pe̱ diba oboso, mome a si be̱n njo̱m a Betiledi to̱ po̱ ni mabole̱ mo̱ wonja o ba pe̱te̱. A tingame̱ te̱ o bedangwedi bao ba mpenga, a ba muto nupe̱pe̱ nde ke̱ Betiledi be si mabola mo̱ wonja o bola nika, e pe̱te̱ nde o wite̱ musonje, e te̱nge̱n pe̱ ná a tombe pe̱te̱ o m’boko ma bekaisedi ma mwemba.—1 Kor. 5:1, 2; 6:9, 10.

Mome a bai pe̱te̱, nde ke̱ Betiledi be si mabola mo̱ wonja o ba, ne̱ni mwemba mwangame̱nno̱ je̱ne̱ diba lao la kwaṅ na la peńa e? Mo̱ bupisane̱ Betiledi diba lao la kwaṅ di dia di mala oboso e? Mo̱ muto ba wusane̱no̱ e te̱ nde ná a domse̱ o lakise̱ mom’ao to̱ ke̱m e? Mo̱ diba lao la peńa langame̱n nde langabe̱ ka musonje e?

O mińa mi tombi, mwemba mu ta nde mwe̱ne̱ diba la peńa ka musonje etum te̱ nu ńena ba wusane̱no̱ eno̱ longe̱, a si baino̱ to̱ babe̱ pe̱te̱, a si wite̱no̱ pe̱ to̱ musonje. Nde Yesu a si to̱pedi ońola nu ńena ba wusane̱no̱ ke̱ a makwalea ońola kwed’a diba na ba to̱ babe̱ pe̱te̱. O diwengisan, a tele̱ye̱ nde ná mome nu mabwe̱ diba esibe̱ njo̱m a Betiledi nde a ba muto nupe̱pe̱, e nde o wite̱ musonje. O ni ńai a bete̱medi, kwed’a diba na ba to̱ babe̱ pe̱te̱, bena Yesu a langino̱ kapo̱ na musonje, ba mawe̱le̱ su o diba laboso.

 Diba di bo̱i te̱ ońolana mome a bo diba, a ba pe̱ muto nupe̱pe̱, munj’ao ńaboso a wusane̱no̱ a si be̱n pe̱ epolo o lakise̱ mo̱ to̱ banga mo̱. A s’angame̱n pe̱ so̱ dutea nga angame̱n lakise̱ mom’ao ńese̱le̱ mo̱ to̱ ke̱m. Omo̱ń a nika, e be̱ ná nu ńena ba wusane̱no̱ a dia longe̱ to̱ ke̱m, a bai to̱ babe̱ pe̱te̱ to̱ ke̱m, to̱so̱ a wite̱ musonje, seto̱ pe̱ bupisane̱ ma mambo nde mwemba mwangame̱nno̱ je̱ne̱ diba la peńa. *

Omo̱ń di bolane̱ eyembilan a mome nu wite̱ musonje, na nika e wana kwed’a diba. Ne̱ni pe̱ so̱ e me̱nde̱no̱ be̱ yete̱na mome a si wite̱ musonje, nde a bwa diba, a ba pe̱ muto nupe̱pe̱ e? To̱so̱ mome a si wite̱ musonje oboso ná a mabwa diba, nde a wite̱ mo̱ ombusa bwa la diba, a ba pe̱ muto nupe̱pe̱ to̱ná munj’ao a wusane̱no̱ eno̱ be̱be̱ o lakise̱ mo̱ e? O ben byembilan be̱se̱, kwed’a diba na ba to̱ babe̱ pe̱te̱, bena be nde kapo̱ na musonje, ba mawe̱le̱ su o diba laboso. Diba la peńa di te̱m bupisane̱ mambenda. Ka nje te̱ Njongo a Betatedi ńa fre̱nsi ńa 15 Ngo̱nde̱ 1980 map. 31-32 e kwalino̱, “tatan a maso̱lo̱no̱ o diba la peńa, a titi ná a bo̱le̱ mo̱ o timba na munj’ao ńa kwaṅ; nika a wite̱no̱ musonje, a bwa diba, a ba pe̱ muto nupe̱pe̱, diba lao laboso di bo̱i.”

Din so̱ṅtane̱ la peńa di si maye̱use̱ ka ńe bosangi ńa diba, to̱ yaṅa musonje mwe nde bobe bonde̱ne̱. Mome nu mese̱le̱ munj’ao esibe̱ njo̱m a Betiledi, a ba muto nupe̱pe̱ nde ke̱ a titi wonja o bola nika angame̱n tomba o m’boko ma bekaisedi ma mwemba ońola njo̱m a musonje. (Yete̱na munj’ao ńa peńa e nde kriste̱n, mo̱ pe̱ angame̱n kaisabe̱ ońola njo̱m a musonje.) To̱ná diba la peńa di s’angame̱nno̱ langabe̱ ka musonje, mome a si me̱nde̱ be̱ne̱ m’bē̱ o mwemba mimbu jita, natē̱ bato ba dimbea bobe a bolino̱ kwaṅ, ba botea pe̱te̱ je̱ne̱ mo̱ ka moto ńangame̱n edube. Obiana batudu ba mabola mo̱ m’bē̱ o mwemba, bangame̱n pe̱ jombwea bete̱medi ba nu ńena a wusane̱no̱ na bana basadi bena yen ebe a cakino̱.—Mal. 2:14-16.

Jombwedi te̱ betune ba ngińa bena bwa la diba na ba to̱ babe̱ pe̱te̱ esibe̱ njo̱m a Betiledi di mawanano̱, kriste̱n yangame̱n je̱ne̱ diba kapo̱ ka Yehova, ka lambo le bosangi.—Mul. 5:4, 5; Bon. 13:4.