Ońola nje moto nu belabe̱ ná “seme̱kakale̱” a kwalino̱ ná a me̱nde̱ “bo̱lo̱ne̱” lao sango mo̱me̱ne̱ yete̱na a bai Rut e? (Rut 4:1, 6)

O mińa ma Bibe̱l, myuedi mō̱ mi ta be̱ mi baisabe̱ yete̱na mome a wedi esibe̱ mo̱ dia muna. K’eyembilan, nje ba tano̱ bangame̱n bolane̱ mińangadu mao e? Mo̱ dina lao la mbia di ta langame̱n dima e? Mbend’a Mose e ta ńongwane̱ o jalabe̱ mi myuedi.

Nje ba tano̱ bangame̱n bolane̱ mińangadu ma moto nu wedi to̱ ńena nu timbi be̱ tue na mo̱ andise̱ mińangadu mao e? Munańango ao ńa mome to̱ moto mō̱ ńa mbia mao a ta a be̱ne̱ epolo o ko̱to̱, to̱ janda mi mińangadu. Na nika, mu mbia mu si wusa bo̱lo̱ne̱ mińangadu mao.—Lev. 25:23-28; Mis. 27:8-11.

Ne̱ni ba tano̱ ba bola ná dina la moto nu wedi di si dima e? Munańango a nuwedi to̱ mot’a mbia mao a ta angame̱n sangwa mukusa, ka nje te̱ mambo ma tombino̱ ońola Rut. Nu moto a ta nde a ba munj’a munańango ao ná a we̱le̱ ya mun’a mome nu me̱nde̱ bambe̱ dina la nuwedi na be̱ musangwed’a myam mao. Ben bete̱sedi ba ndolo be ta pe̱ be tata mukusa.—Ndim. 25:5-7; Mat. 22:23-28.

Jombweye eyembilan a Naemi. A ta a babe̱ na moto nu ta nu belabe̱ ná Elimelek. Mom’ao na bana bao baba ba wedino̱, a si ta pe̱ a be̱ne̱ moto nu masombweye̱ mo̱. (Rut 1:1-5) A timbino̱ o Yuda mwemba na Rut, mukoa mao, a langwedi Rut ná ale baise̱ Boas ná a ko̱te mińangadu mabu. Boas a ta nde elongi ewo̱ ya mbia ma Elimelek. (Rut 2:1, 19, 20; 3:1-4) Nde Boas a ta a bia ná elong’a mbia epe̱pe̱, yena Bibe̱l e mabele̱no̱ ná “seme̱kakale̱”, e ta be̱be̱ na Elimelek buka mo̱. Mo̱ so̱ nde e ta mot’a boso nu ta ńangame̱n no̱nge̱ bedomsedi ba be̱ musangwedi.—Rut 3:9, 12, 13.

O bebotedi, “seme̱kakale̱” a puli jongwane̱. (Rut 4:1-4) A ta a bia ná a me̱nde̱ busise̱ mo̱ni mō̱ te̱nge̱, nde a ta pe̱ a bia ná Naemi a ta a máduna ńai a si wusano̱ pe̱ we̱le̱ ya muna nu masangwe̱ mińangadu ma Elimelek. Na nika, mi mińangadu mi wusa nde batabe̱le̱ o sango la seme̱kakale̱, nje e wusa be̱ lambo la bwam ońol’ao.

Nde seme̱kakale̱ a tuko jo̱nge̱le̱ ponda a so̱ṅtane̱no̱ ná a ta pe̱ angame̱n ba Rut. Byala bao ben: “Ye te̱ nika, ke̱ na si manda so̱ mo̱, e si ya be̱ na bo̱lo̱ne̱ lam sango mo̱me̱ne̱.” (Rut 4:5, 6) Ońola nje a tukono̱ jo̱nge̱le̱ e?

Seme̱kakale̱ to̱ moto nupe̱pe̱ a ba te̱ Rut nde a ya mun’a mome, nu muna nde a ta angame̱n sangwe̱ mińangadu ma Elimelek. O njika mbadi nika e wusano̱ bola ná seme̱kakale̱ a “bo̱lo̱ne̱” lao “sango” e? Bibe̱l e si malangwa ne̱ni, nde mbadi iwo̱ yin nik’e wusano̱ bolane̱.

• Ńaboso, a wusa bo̱lo̱ne̱ mo̱ni a busise̱no̱ o janda mińangadu ma Elimelek, ońolana mi mińangadu mi si ta pe̱ mangame̱n be̱ mao. Mi wusa nde timba ma mun’a Rut ńa mome.

• Ni londe̱ iba, mo̱ nde a ta angame̱n dese̱ na tata Naemi na Rut.

• Ni londe̱ ilalo, seme̱kakale̱ a ya te̱ bana bape̱pe̱ na Rut, sango lao di ta nde langame̱n jababe̱ oteten a ba bana na bana bena mo̱ nu moto a tano̱ a mábe̱ne̱.

• Ni londe̱ ine̱i, seme̱kakale̱ a si ta te̱ a mábe̱ne̱ mun’a mome, mun’a mome ńena Rut a wusano̱ ya nde a ta angame̱n sangwe̱ mińangadu ma Elimelek name̱ne̱ pe̱ na ma seme̱kakale̱. Ombusa kwed’ao, mińangadu mao mi wusa nde timba ma muna ńena nu be̱n nde dina la Elimelek, seto̱ lao. Seme̱kakale̱ a bangi so̱ jongwane̱ Naemi ná a si ya be̱ a bo̱lo̱ne̱ nje a tano̱ a be̱ne̱. Ese̱le̱ ná Boas ńena nu ta musangwedi nu mawe̱ ombus’ao, mo̱ a bole nika. Boas a boli nika, ebanja a ta a pula “ná dina la mudimo di tike be̱ o sango lao.”—Rut 4:10.

E me̱ne̱ne̱ ná seme̱kakale̱ a ta a pula bola me̱se̱ o kombe̱ dina lao la mo̱me̱ne̱ na sango lao. A ta nde moto ńe mukubo. Nde to̱ná seme̱kakale̱ a bolino̱ me̱se̱ o kombe̱ dina lao, di dim, ebanja di si biane̱ we̱nge̱. A bo̱lo̱ne̱ pe̱ edube ende̱ne̱ yena Boas a kusino̱, ye ya tubabe̱ dina oteten a bambambe̱ ba Mesia, Yesu Kristo. E se̱ mbo̱lo̱n ninde̱ne̱ ońola seme̱kakale̱ ńena mukubo mu bolino̱ ná a bange jongwane̱ moto nu ta nu be̱ne̱ ńo̱ng’a jongwane̱ e!—Mat. 1:5; Lukas 3:23, 32.