Son a ponda, Janea la Loba lena bato beno̱ jenge̱le̱ etum a ponda di me̱nde̱ wana musango na mulatako o wase ńe̱se̱. ‘Musango mu me̱nde̱ yamba’ ka nje te̱ epas’a Myenge 72:7 e kakanno̱. Nde njika ponda Janea di me̱nde̱no̱ botea janea wase e? Ne̱ni di me̱nde̱no̱ bola nika e? Ne̱ni pe̱ weno̱ ná o tombwane̱ minam mao e?

Bibe̱l e bīse̱ oboso ba ponda mambo mō̱ ma me̱ne̱ne̱ ná bwē ma me̱nde̱ lee̱ ná Janea la Loba jā be̱be̱. Ma mambo me̱se̱ nde ma longi “eyemban” yena e bambe̱ bila o wase ńe̱se̱, njai, soa la mińangadu, na bobe bo me̱nde̱ to̱nde̱.​—Mateo 24:3, 7, 12; Lukas 21:11; Bebīsedi 6:2-8.

Edinge̱ epe̱pe̱ e makwala ná: “O mińa misukan pond’a bobe e me̱nde̱ po̱. Ebanja bato ba me̱nde̱ be̱ bato̱nde̱ babo̱me̱ne̱, bato̱nde̱ mo̱ni, . . . bapamwe̱ basango na bańango, ba si bi masoma, ba si dube̱ Loba, ba si be̱n ndolo, ba si to̱ndi do̱lisane̱, bato ba minda, ba si we̱le̱ mańolo ko̱nji, bato ba pale̱pale̱, ba si to̱ndi bwam, . . . ba malombitane̱, ba to̱ndi muńe̱nge̱ ma ńolo buka Loba.”(2 Timoteo 3:1-4) Bede̱mo ka ben be titi lambo la peńa. Nde we̱nge̱, be lań pe̱te̱ jita.

Ben bedinge̱ be botedi nde londa o mbu 1914. Balangwe̱ myango mo̱me̱ne̱, nikame̱ne̱ pe̱ na bato ba politik na batiledi ba lango ne̱ni wase e tukono̱ ombusa mbu 1914. K’eyembilan Peter Munch, mulangwe̱ myango mō̱ ńa Danmark a tili ná: “Oboso ba mbu 1914, bato ba ta bo̱nge̱le̱ ná mambo ma me̱nde̱ nde bata tukwa o mbad’a bwam o wase ńe̱se̱, . . . nde jingedi nde o pambo a ponda ńa mbeu a ńolo, maladi, bosinga na si be̱ la mbo̱le̱ o bepolo be̱se̱.”

Bwam bwe nde ná ma mambo ma mabīse̱ nde ná son a ponda musango mu mala be̱. Ma malee̱ ná Janea di mapo̱ janea wase ńe̱se̱ son a ponda. Ponda a bolino̱ eyemban a su, Yesu a bati pe̱ din lambo la bwam le nde ná: “Min myango ma bwam ma janea mi me̱nde̱ langwabe̱ o wase ńe̱se̱ o be̱ mboṅ ońola matumba me̱se̱; denge̱ su di mapo̱.”​—Mateo 24:14.

Mi myango ma bwam nde me mwe̱ndi ma dibongo ma dikalo la Mboṅ a Yehova. Kalat’abu ńaboso e be̱n nde tema ná Njongo a Betatedi e mabīse̱ Janea la Yehova. O nin we̱nge̱ Njongo a Betatedi e mábusisabe̱ o buka na 338 ba leme̱, e makwalea pe̱ mambo ma bwam Janea la Loba di me̱nde̱no̱ wanea bato na wase.

Man mambo mane̱i ma mabusise̱ jalabe̱:

1. Janea di si me̱nde̱ bolane̱ to̱ mō̱ ńa badiedi ba politik ba nin wase.

2. Kana badiedi ba politik ba wase ńe̱se̱ ba si me̱nde̱no̱ pula jese̱le̱ byanedi babu, ba me̱nde̱ so̱ te̱nge̱ne̱ Janea la Loba; nje yena e me̱nde̱ nde be̱ elemā.​—Myenge 2:2-9.

3. E me̱nde̱ pula ná Janea la Loba di ńamse̱ manea ma politik mena ma be̱n ńo̱ngi o benga janea mbel’a moto. (Daniel 2:44; Bebīsedi 19:17-21) Be bila besukan ba wase ńe̱se̱ be belabe̱ ná Armagedon.​—Bebīsedi 16:14, 16.

4. Be̱se̱ ba memeye̱ o sibise̱ babo̱me̱ne̱ owas’a Janea la Loba ba me̱nde̱ sungabe̱ o Armagedon, bingea o was’a peńa ńa musango. Muso̱ngi mabu mu me̱nde̱ be̱ lambo ka lodun la bato; babo̱ nde ba me̱nde̱ be̱ nje Bibe̱l e bele̱no̱ ná “dimuti dinde̱ne̱.”​—Bebīsedi 7:9, 10, 13, 14.

Kusa la belēdi nde le tanga laboso moto angame̱nno̱ po̱ngo̱ ná a be̱ owas’a Janea la Loba. Yesu a kwalane̱ Loba o muka ná: “Nde longe̱ la bwindea le nde ná ba bie wa, Loba la mbale̱ mō̱ me̱ne̱, na nu o lomno̱, Yesu Kristo.”​—Yohane 17:3.

Ponda bato ba mabiano̱ Yehova ka Moto ńe na mbale̱, ba matombwane̱ o mbadi jita. Jombweye mbadi iba: Ka ńaboso ba mabe̱ne̱ye̱ mo̱ dube̱ le ngińa. Di dube̱ lena di se̱medi o mboṅ i bam, di mabola babo̱ mbaki ná Janea la Loba le na mbale̱ na ná di mabotea janea son a ponda. (Bonahebe̱r 11:1) Ni londe̱ iba, ndol’abu ońola Loba na ońola bato bape̱pe̱ e mabata ńaka. Ndol’a Loba e matute̱le̱ babo̱ o sengane̱ mo̱ na mulema mwe̱se̱. Ndolo ońola bato e matute̱le̱ babo̱ o we̱le̱ ben byala ba Yesu o ebolo ná: “Nje lo mapulano̱ ná bato ba boleye bińo̱, bińo̱ pe̱ bolea babo̱ nikame̱ne̱.”​—Lukas 6:31.

Ka sango ńe ndolo, Muweked’asu a mapulea nde biso̱ nje ye bwam buka me̱se̱. A mapula ná di be̱ne̱ nje Bibe̱l e mabele̱no̱ ná “longe̱ la mbale̱.” (1 Timoteo 6:19) Longe̱ la we̱nge̱ di titi “longe̱ la mbale̱.” Longe̱ le ndutu jita ońola lodun la bato, bangame̱n pe̱ nde jana ná ba we̱le̱ be̱ longe̱. Ná o bie ne̱ni di “longe̱ la mbale̱” di me̱nde̱no̱ be̱, ombwea mambo mō̱ ma bwam Janea la Loba di me̱nde̱no̱ bolea bato ba me̱nde̱ be̱ owas’a byanedi bao.