Ekwal’a mbale̱ ye nde ke̱ bińo̱ na bana bo̱ngo̱ lo malangwane̱le̱ mo̱nge̱le̱ na besengedi bańu.

Ye ná e be̱ ndutu o be̱ne̱ ekwali na bana bena bā nde bekoke̱le̱. Kalat’a Inglisi Breaking the Code e kwali ná, ‘ye nde biana o ta o be̱ne̱ bwam o bia besoka ba mun’ango̱. Nde tatan o si be̱n pe̱ bo bwam, ebanja o nilangabe̱ nde ka bane̱ be̱se̱.’ To̱ ye̱ne̱ne̱ nde biana bana bo̱ngo̱ ba si be̱n ńo̱ng’ekwali, niponda nde ba be̱nno̱ ńo̱ng’ao buka ponda ye̱se̱!

Bińo̱ kwala o to̱ njika ponda a be̱nno̱ ńo̱ngi. Bola nika to̱ e be̱ nde ná bińo̱ langame̱n kwala o ponda ni tombi ńa bulu.

“We ná o pula kwala ná, ‘Tatan nde o be̱nno̱ ńo̱ng’ekwali e? O s’e̱n mba mwese mwe̱se̱ e?’ Nde ońola nje jangame̱nno̱ to̱kisane̱ yete̱na bana basu ba mapula tele̱ye̱ biso̱ milema mabu e? E titi nde nje muyedi te̱ a be̱nno̱ ńo̱ngi e?”​—Lisa.

“To̱ná na to̱ndino̱ pomane̱ nanga, ekwal’a bwam na yo̱kino̱ be̱ne̱ na bana bam bā nde bekoke̱le̱ ye nde ombusa ko̱s’a bulu.”​—Herbert.

BETE̱SEDI BA BIBE̱L: “To̱ moto a si pula bwam ba mo̱me̱ne̱, nde bwam ba nupe̱pe̱.”​—1 Korinto 10:24.

We̱, ná o lambe̱ toi. Sango a bana mō̱ embi ná: “Ponda iwo̱ na yo̱ki nde dutea o mambo mape̱pe̱ niponda bana bam beno̱ o kwalisane̱ mba. Ba yo̱ki pe̱ o je̱ne̱ nika!”

Yete̱na nika nde wa pe̱ o yo̱kino̱ bola, kwese̱ Television na bene̱ belongisan ka telefon. Lambe̱ye̱ mun’ango̱ toi, o no̱nge pe̱ nje eno̱ o kwala mweńa, to̱ e be̱ nde ná e titi tobotobo.

“Jangame̱n bola bana basu mbaki ná di mano̱ngo̱ besengedi babu ba mulema mweńa. E titi te̱ nika, ke̱ ba si me̱nde̱ langwea biso̱ ne̱ni ba masengano̱, to̱so̱ ba me̱nde̱ nde wasa jongwane̱ wuma ipe̱pe̱.”​—Maranda.

“O s’ońa na malinga to̱ e be̱ nde ná jo̱nge̱le̱ la mun’ango̱ di si te̱nge̱n.”​—Antony.

BETE̱SEDI BA BIBE̱L: “Lo bia po̱n ne̱ni lo masengano̱.”​—Lukas 8:18.

Kwalisane̱ mo̱ o ponda ye̱se̱. Bana ba mateleye̱ babo̱me̱ne̱ na bo̱bise̱ la ńolo ke̱ bayedi ba si jese̱ babo̱ o ekwal’a boso na boso.

“Di yo̱ki kwala ke̱ je o mutoa. Bejedi ba mō̱ o mbasanedi ma nune̱ be mongwane̱ o be̱ne̱ ekwal’a bwam buka ba boso na boso.”​—Nikole.

Pond’a da la ko̱si pe̱ ńe nde pond’a bwam ońola ekwali.

“O pond’a da l’ebiamu moto te̱ a malangwa mambo ma bwam na ma bobe a kusino̱ bo buńa. Di bola di malata biso̱ na jongwane̱ pe̱ mō̱ ńasu te̱ o so̱ṅtane̱ ná a s’angame̱n lembe̱ mitakisan mo̱me̱ne̱ mō̱.”​—Robin.

BETE̱SEDI BA BIBE̱L: “Be̱ makwasi o senga [nde], muńo̱ngo̱ o to̱po̱.”​—Yakobo 1:19.