OŃOLA BESO̱MBE̱
9: Nja weno̱
NJE NIKA E MAPULANO̱ KWALA
Seto̱ buka te̱ dina lo̱ngo̱ na je̱ne̱ne̱ lo̱ngo̱ nde ba malangwe̱ nja weno̱. Nika e bambe̱ pe̱ bede̱mo bo̱ngo̱, nje o dube̱no̱, n’ebe̱yed’ango̱. O mbale̱ ńe̱se̱, nika e mombwea nje ye̱se̱ e mabole̱ ná o be̱ nja weno̱—e be̱ o eboko to̱ oteten.
OŃOLA NJE NIKA ŃENO̱ MWEŃA
O bi te̱ nja weno̱, o malingea mambo o dube̱no̱ o mulopo ma jese̱le̱ ná mako̱m nde ma die̱le̱ wa.
“Jita la bato be nde ka njimbidi di me̱ne̱no̱ o sapi. I si mapo̱so̱ mbo̱ti i mabo̱to̱no̱, bane̱ nde ba mapo̱seye̱ babo̱ mo̱.”—Adrian.
“Noko o lingea nje e te̱nge̱n to̱ ponda nika ńeno̱ ndutu. Ne ná na langwa ba nja be mako̱m mam ma mbale̱ tongwea na nje ba mabolano̱ na nje mba pe̱ na mabolano̱ o mbasanedi mabu.”—Kourtney.
BETE̱SEDI BA BIBE̱L: “Lo si no̱ngo̱ bowan ba nin wase, nde tukwa bińo̱me̱ne̱, lo timbise̱ mo̱nge̱le̱ mańu peńa.”—Roma 12:2.
NJE WENO̱ NÁ O BOLA
Ombwea ngud’ango̱, bo̱bo̱ lo̱ngo̱, na nje o dube̱no̱ ná wokwe bia nja weno̱ tatan na nja o me̱nde̱no̱ to̱ndo̱ be̱. Mbad’a bwam ńa botea ńe nde ná walabe̱ min myuedi mi bupe̱.
Ngudi: Njika mambo na bino̱ bola e? Njika bede̱mo ba bwam na be̱nno̱ e? (K’eyembilan: Be̱ la ponda e? Jalea la ńolo e? Ngiń’ebolo e? Sanga la mulema e?) Njika mambo ma bwam na mabolano̱ e?
MALEA: Ye wa ndutu o jo̱nge̱le̱ lambo la bwam o bolino̱ to̱ o kwalino̱ e? Baise̱ bayedi bo̱ngo̱ to̱ diko̱m la mbaki njika bede̱mo ba bwam o be̱nno̱, na ońola nje.
BETE̱SEDI BA BIBE̱L: “Moto te̱ a kekise̱ yao ebolo; nde a me̱nde̱ we̱le̱ sese̱ ońola mo̱me̱ne̱, seto̱ ońola nupe̱pe̱.”—Galatia 6:4.
Bo̱bo̱: Njika bede̱mo nangame̱nno̱ po̱ngo̱ miwe̱n o po̱ngulane̱ e? O njika ponda na le̱le̱mno̱ o bola lambo la bobe e? O njika tongo la longe̱ lam nangame̱nno̱ bata be̱ne̱ jalea la ńolo e?
BETE̱SEDI BA BIBE̱L: “Yete̱na di makwala ná di si be̱n bobe, ke̱ di mawo̱ndo̱ nde biso̱me̱ne̱.”—1 Yohane 1:8.
Mbaki: Njika bete̱sedi jombwea bedangwedi na mabupe̱no̱ e, na ońola nje e? Mo̱ na dube̱ Loba e? Njika mambo ma me̱ne̱ne̱ ma boli mba mbaki ná e na mbale̱ e? Njika beboledi na malangano̱ ka ni titi te̱me̱ la sim e, na ońola nje e? Njika mbaki na be̱nno̱ ońola kie̱le̱ ni maye̱ e?
BETE̱SEDI BA BIBE̱L: “Ye̱ne̱ i me̱nde̱ tata wa, dibie̱ pe̱ di kombe̱ wa.”—Minia 2:11.
