OŃOLA BESO̱MBE̱
11: Ngiń’ebolo
NJE NIKA E MAPULANO̱ KWALA
Bato be ngiń’ebolo ba si mańa ebolo mīla. O diwengisan, be muńe̱nge̱ o bola ebolo na ngińa o sombwea babo̱me̱ne̱ na jongwane̱ pe̱ bape̱pe̱—to̱ e be̱ nde ná ba mabola nde eye̱me̱k’ebolo.
OŃOLA NJE NIKA ŃENO̱ MWEŃA
E be̱ ná di to̱ndi nika to̱ ke̱m, longe̱ di londi na m’bē̱. O nin wase ńena bato ba si to̱ndino̱ ntu, be̱ la ngiń’ebolo di mawanea wa tombwane̱.—Mulangwedi 3:13.
“Noko ná be̱ la ngiń’ebolo di madilise̱ wame̱ne̱ na wanea pe̱ wa mutam. Be besengedi ba mutam be boli ná na to̱nde ebolo. Be̱ la ngiń’ebolo di malenea pe̱ wa dina la bwam.”—Reyon.
BETE̱SEDI BA BIBE̱L: “Ntu na ntu mu mawana muse̱ṅ.”—Minia 14:23.
NJE WENO̱ NÁ O BOLA
To̱ndo̱ ebolo tongwea na bupe̱ matanga mena ma bolabe̱ owan.
Be̱ muńe̱nge̱ o jokwa bola mambo ńai a bwam. E be̱ ná we o bola bebolo ba mboa, ebolo e bolabe̱ wa o esukulu, to̱so̱ we o bola ebol’ango̱ ya musawedi, we̱le̱ wame̱ne̱ mususu o nje weno̱ o bola. Yete̱na o mábia bola lambo, we̱ ná o bate bia bola mo̱ bwam, o be̱ pe̱ makwasi o bola la mo̱. O me̱nde̱ bata bwane̱ ebol’ango̱ muńe̱nge̱ yete̱na o we̱ ná o bate bia bola mo̱.
BETE̱SEDI BA BIBE̱L: “We̱n moto ńe makwasi o ebol’ao e? A me̱nde̱ nde bolea kiṅe̱, seto̱ bato ba si bian.”—Minia 22:29.
Ombwa mambo o bonde̱ne̱ bao bwe̱se̱. O me̱se̱ o mabolano̱, o mawanea bane̱ tombwane̱ yete̱na o londe̱ m’bē̱ mo̱ngo̱ bwam. K’eyembilan, o matuse̱ te̱ ńolo o bola bebolo bo̱ngo̱ ba mboa, o mawamse̱ mūna ma bene̱ belongi ba ndabo a mbia.
BETE̱SEDI BA BIBE̱L: “Bola le bonam buka kusa.”—Bebolo 20:35.
Bola buka dime̱ne̱. O mulopo ma bola buka te̱ nje e baisabe̱le̱ wa, keka ná o bole buka nje ba mengane̱no̱ wa. Na nika, we ná o no̱ngo̱ bedomsedi o longe̱ lo̱ngo̱ o bata bola seto̱ ońola mińakisan, nde ońolana o po̱si o bola nika.—Mateo 5:41.
BETE̱SEDI BA BIBE̱L: “Bwam bo̱ngo̱ bo si be̱ la- mbo la mińakisan, nde la jemea la wonja.”—Filemon 14.
Be̱ skwe̱. Bato be ngiń’ebolo ba titi bato ba bwala to̱ bakom b’ebolo. Be skwe̱, ba si mabwane̱ buka te̱ ebolo muńe̱nge̱, nde na ponda wumse̱ pe̱.
BETE̱SEDI BA BIBE̱L: “Dia diwo̱ di londi na wumse̱ di do̱li, buka mā maba ma londi na ntu na bupe̱ la ngo̱.”—Mulangwedi 4:6.
