1-2. (a) Njika bedomsedi manea mō̱ ma no̱ngino̱ te̱nge̱ne̱ baboledi ba Yehova e, nde nje ban ba bolino̱ e? (b) Ońola nje jeno̱ ná di be̱ bonam to̱ owas’a mitakisan e? (Kwalea pe̱ ońola duta la dipapa laboso.)

 O NIN we̱nge̱, ebol’asu o mususu to̱ bebolo basu bō̱, be we̱le̱be̱ owas’a mwekan o buka 30 ma bekombo o wase ńe̱se̱. O bekombo bō̱, manea ma we̱le̱ bonasango na bonańango asu o beboa. Njika lambo la bobe ba bolino̱ e? To̱ lambo o miso̱ ma Yehova. Ba langi nde Bibe̱l buka te̱, ba te̱ dikalo, bukea pe̱ o ndongame̱n na bonasango abu. Ba bangi pe̱ no̱ngo̱ dongo o politik. * To̱ na mitakisan ma ngińa, ba baboledi ba Loba ba bengi be̱ jemea. Ba lee̱le̱ dube̱ di bo̱le̱ ba be̱nedino̱ Yehova. Be pe̱ bonam ońolana ba boli nika!

² Ye̱ke̱i te̱ we̱n maduta ma ba bonasango na bonańango bō̱ ba ngiń’a mulema, o maki pe̱ ne̱ni beno̱ muńe̱nge̱. Be muńe̱nge̱ ońolana ba bi ná Yehova a do̱lisane̱ babo̱, ebanja ba makombe̱ k’abu ni si be̱n misan oboso bao. (1 Myan. 29:17a) Yesu a kwali ná: “Bonam na ba ba matakisabe̱ ońola te̱me̱ la sim . . . Bińo̱ bwa muńe̱nge̱, lo sombise̱ pe̱ ebanja musawedi mańu mu kolo.”—Mat. 5:10-12.

3. Bupisane̱ Bebolo 4:19, 20, nje bamuloloma ba bolino̱ ponda ba takise̱no̱ babo̱ o ebwe’a mbu yaboso, ońola nje pe̱ e?

³ Mitakisan mena bonasango na bonańango asu beno̱ lembe̱ we̱nge̱ me nde milemlem na mi mena bamuloloma ba lembe̱no̱ o ebwe’a mbu yaboso ońolana ba te̱ dikalo la myango ma bwam jombwea Yesu. Ngedi jita, mwemba ma bakaisedi bande̱ne̱ mweki babo̱ “ná ba si langwa o dina la Yesu.” (Bebolo 4:18; 5:27, 28, 40) Nje Bamuloloma ba bolino̱ ombusa nika e? (Langa Bebolo 4:19, 20.) Ba ta ba bia ná mwanedi ńasam nde a lom babo̱ “o langwea bato be̱se̱ na bola pe̱ mboṅ” ońola Kristo. (Bebolo 10:42) Petro na Yohane ba no̱ngi eyala, na babo̱ ba kwala na ko̱di ńe̱se̱ ná ba me̱nde̱ sengane̱ Loba buka ba banedi, na ná ba si me̱nde̱ jembe̱ o te̱ dikalo jombwea Yesu. E ta nde biana bamuloloma ba baise̱ nde ba banedi ná: ‘Lo mo̱nge̱le̱ ná doi lańu la byanedi di buki la Loba e?’

4. Ka nje te̱ kalat’a Bebolo 5:27-29 e malee̱no̱, njika eyembilan bamuloloma ba die̱le̱no̱ kriste̱n a mbale̱ ye̱se̱ e, ne̱ni pe̱ jeno̱ ná jembilane̱ babo̱ e?

⁴ Bamuloloma ba dī eyembilan a bwam yena kriste̱n a mbale̱ ye̱se̱ i bupe̱no̱, ye nde ya “sengane̱ Loba buka bato.” (Langa Bebolo 5:27-29.) Ombusa babo̱ dipabe̱ ońolana ba bengi be̱ jemea, bamuloloma basumwe̱ oboso ba mwemba ma bakaisedi bande̱ne̱ “na muńe̱nge̱ ná ba langabe̱ ka ba dongame̱n kuse̱ bosambo ońola dina la [Yesu], ba benga pe̱ te̱ dikalo!—Bebolo 5:40-42.

5. Njika myuedi jeno̱ ná di baise̱ biso̱me̱ne̱ e?

⁵ Eyembilan a bamuloloma e matute̱le̱ biso̱ o baise̱ biso̱mene̱ myuedi mō̱. Ne̱ni bedomsedi babu ba sengane̱ Loba buka bato beno̱ mulatako na byanedi ba Bibe̱l ná “moto te̱ a sibisise̱ mo̱mene̱ owas’a manea ma be̱n ngińa omo̱ń ao” e? (Rom. 13:1) Ne̱ni jeno̱ ná di ‘sibise̱ biso̱me̱ne̱ owas’a manea ma be̱n doi,’ ka nje te̱ ńamuloloma Paulo a kwalino̱,  nde di benga pe̱ be̱ Loba jemea, mo̱ Mwaned’asu ńasam e?—Tito 3:1.

6. (a) Ba nja be “manea ma be̱n doi” kalat’a Roma 13:1 e makwaleano̱ e, ne̱ni pe̱ jangame̱nno̱ die̱le̱ biso̱me̱ne̱ ombasanedi mabu e? (b) Ne̱ni pe̱ yeno̱ na doi la byanedi la bato ba benama be̱se̱ bana be banedi e?

⁶ Langa Roma 13:1. O yen epasi, muloṅ ma byala ná “manea ma be̱n doi” nika ńe nde bato ba benama bena ba be̱n doi la byanedi na ngińa omo̱ń a bape̱pe̱. Kriste̱n i masibise̱ babo̱me̱ne̱ owas’a manea. Ma manea ma mabola ná o̱da e be̱, ma mabusise̱ mambenda, ponda iwo̱ pe̱ ma malingea baboledi ba Yehova. (Bbī. 12:16) Ońola nika nde Bibe̱l e mome̱le̱no̱ biso̱ ná di bole babo̱ tax, dyuti, di bwe mo̱ bo̱ngo̱, di bole pe̱ mo̱ edube. (Rom. 13:7) Nde ma manea ma be̱n nde doi la byanedi buka te̱ ońolana Yehova ese̱le̱ mo̱. Yesu a kwaledi be bete̱sedi na bwē, ponda a tano̱ oboso ba Pontio Pilato, go̱bin’a Roma. Ponda Pilato a langwedino̱ mo̱ ná a be̱n ngińa o jese̱le̱ mo̱ to̱ o bola ná a bwabe̱, Yesu a timbise̱le̱ mo̱ ná: “O si wusa be̱ne̱ ngińa omo̱ń am, e si be̱ te̱ ná mo̱ń e boli wa mo̱.” (Yoh 19:11) Ka nje te̱ e tano̱ na Pilato, doi la byanedi la bato ba benama be̱se̱ bena be banedi na bato la ba politik di be̱n moyo.

7. O njika bete̱medi di si masibise̱no̱ biso̱me̱ne̱ owas’a banedi e, nje pe̱ bangame̱nno̱ bia e?

⁷ Kriste̱n i masibise̱ babo̱me̱ne̱ owas’a mambenda ma manea etum te̱ ma si mate̱nge̱ne̱no̱ mambenda ma Loba. Nde di si masengane̱ bato ba benama ke̱ ba baise̱ biso̱ ná di bole lambo Loba a mabangano̱, to̱ ke̱ ba mabanga ná di bole lambo Loba a mengane̱no̱ biso̱. K’eyembilan, be ná ba baise̱ eso̱mb’a munasango ná e so̱le o milo̱ṅ ma bila ma ekombo. * Be pe̱ ná ba banga Bibe̱l asu ńa Betukwedi ba was’a peńa to̱ kalat’asu, to̱ jeka biso̱ o te̱ dikalo, na ko̱to̱me̱ o jowe̱ mwemba. Banedi ba me̱nde̱ bola Loba bolangi ońola mbad’a bobe ba mabolane̱no̱ doi labu la byanedi, k’eyembilan ke̱ ba matakise̱ bokwedi ba Kristo. Yehova e o je̱ne̱!—Mul. 5:8.

8. Njika diwengisan le oteten a doi la byanedi la manea na la Yehova e, ońola nje yeno̱ pe̱ mweńa o bia nika e?

⁸ Manea ma be̱n doi la byanedi dinde̱ne̱, nde seto̱ doi la byanedi lasam, Yehova mo̱me̱ne̱ mō̱ nde a be̱n doi la byanedi lasam. Bibe̱l e mabe̱le̱ mo̱ ngedi jita ná “Ńasam.”—Dan. 7:18, 22, 25, 27.

9. Njika me̱ne̱ muto̱ped’a mudī Daniel a kusino̱ e?

⁹ Muto̱ped’a mudī Daniel a kusi me̱ne̱ mena ma lee̱ ná doi la byanedi la Yehova di buki la manea me̱se̱. Daniel a se̱le̱ nde je̱ne̱ ńama inde̱ne̱ ine̱i yena ye nde eyemban a manea ma mińa mi tombi na ma we̱nge̱, nika ńe nde Babilon, Media na Persia, Grikia, Roma, na janea la Inglisi na Amerika. (Dan. 7:1-3, 17) Ombusa nika Daniel e̱n pe̱ Yehova Loba a jai o kond’a janea o mo̱ń. (Dan. 7:9, 10) Nje pe̱ nu muto̱ped’a mudī ńa jemea e̱nno̱ ombusa nika ye nde jome̱le̱ ońola banedi o nin we̱nge̱.

10. Bupisane̱ Daniel 7:13, 14, 27, ba nja Yehova a bolino̱ doi la byanedi a sumwane̱no̱ manea ma wase e, nje pe̱ nika e malee̱no̱ e?

¹⁰ Langa Daniel 7:13, 14, 27. Loba a sumwane̱ bato ba benama doi labu  la byanedi le̱se̱ na mo̱ a bola mo̱ bato bape̱pe̱ bena ba dongame̱n na bena ba be̱n ngińa buka babo̱. Ba nja e? A boli mo̱ “bowan ba mun’a moto,” nika ńe nde Yesu Kristo, na “basangedi ba Ńasam,” nika ńe nde 144 000 bena ba me̱nde̱ janeye “o bwindea na o bwindea.” (Dan. 7:18) Na mbale̱, Yehova nde e “Ńasam,” ońolana mo̱me̱ne̱ mō̱ nde a be̱n doi o bola nika.

11. Nje epe̱pe̱ Daniel a tilino̱ e malee̱ jasame̱ la Yehova omo̱ń a manea ma bato e?

¹¹ Nje Daniel e̱nno̱, e mabamse̱ nde nje a se̱le̱no̱ kwala ná: “Loba la mo̱ń a masibise̱ kiṅe̱ iwo̱, ase̱ yine̱.” A tili pe̱ ná: “Ńasam nde a be̱n doi omo̱ń a manea ma bato ba benama; a mabola mo̱ to̱ nja a to̱ndino̱.” (Dan. 2:19-21; 4:17) Mo̱ Yehova a másibise̱ manea mō̱, ase̱ pe̱ mane̱ e? E!

12. Bola eyembilan ewo̱ e malee̱ ne̱ni Yehova a sumono̱ kiṅe̱ o kond’abu ya janea o mińa mi tombi. (Ombwa duta.)

¹² Yehova a lee̱le̱ o mińa mi tombi ná doi lao la byanedi lasame̱ omo̱ń manea ma bato. Jombwe byembilan belalo. Farao, kiṅ’a Egipto a ta a damea baboledi ba Yehova mukoma na mo̱ a banga pe̱ jese̱le̱ babo̱. Nde Loba a te̱se̱ babo̱ wonja na mo̱ a bwa Farao o munj’a mu mole̱. (Bbu. 14:26-28; Mye. 136:15) Belsasar, kiṅ’a Babilon a ta a po̱ngo̱ ndema dinde̱ne̱ na mo̱ ‘ase̱ mo̱me̱ne̱ te̱nge̱ne̱ Sango a mo̱ń, a sesa pe̱ maloba ma silba na gol’ o mulopo ma sesa Yehova. (Dan. 5:22, 23) Nde Loba a sibise nu mot’a kumba. O “bo bulu me̱ne̱,” Belsasar a bwabe̱, na janea lao di bolabe̱ bato ba Media na Persia. (Dan. 5:28, 30, 31) Kiṅe̱ Herode a bo ńamuloloma Yakobo, na mo̱ a we̱le̱ ńamuloloma Petro o beboa na jo̱nge̱le̱ ná a mabwa pe̱ mo̱. Nde Yehova eki Herode o bola nika. Bibe̱l mo̱ ná: “Na ange̱l a [Yehova] e dipa mo̱” na mo̱ a wo̱.—Bebolo 12:1-5, 21-23.

13. Bola eyembilan ewo̱ e malee̱ ne̱ni Yehova a bukino̱ mulatako ma manea.

¹³ Yehova a lee̱le̱ pe̱ ná doi lao la byanedi lasame̱ omo̱ń a mulatako ma manea. Yehova an bwemba ońola tumba la Israel, ongwane̱ babo̱ o buka 31 ma kiṅ’a Kanaan yena i ta i lata, a bola pe̱  ná ba no̱nge dongo dinde̱ne̱ la mundi ma dikaki. (Yos. 11:4-6, 20; 12:1, 7, 24) Yehova ongwane̱ pe̱ Bonaisrael o buka Kiṅe̱ Ben-Hadad na 32 kiṅ’a Siria ipe̱pe̱ yena a tano̱ a ko̱te̱le̱.—1 Ki. 20:1, 26-29.

14-15. (a) Nje Kiṅe̱ Nebukadnesar na Dario ba kwalino̱ jombwea doi la byanedi la Yehova e? (b) Nje mulo̱nge̱ myenge a kwalino̱ ońola Yehova na tumba lao e?

¹⁴ Ponda ye̱se̱, Yehova a lee̱le̱ ná mo̱ nde e Ńasam! Ponda kiṅe̱ Nebukadnesar a sesino̱ mo̱me̱ne̱ ońola ‘ngiń’a ngum ao na ońol’edub’a jasame̱ lao’ o mulopo ná embe na sibise̱ la ńolo le̱se̱ ná Yehova mo̱me̱ne̱ mō̱ nde a dongame̱n esese, Loba a bouse̱ mo̱ njou. A kusino̱ pe̱te̱ soṅtane̱, Nebukadnesar a “namse̱ Ńasam” emba pe̱ ná “doi la [Yehova] le nde la bwindea.” A bati ná: “To̱ mō̱ a si meka dia lao.” (Dan. 4:30, 33-35) Ponda jemea la Daniel di we̱le̱be̱no̱ o kekise na Yehova a sunga mo̱ o ekukud’a ngila, Kiṅe̱ Dario a kwali ná: “Bato ba soe oboso ba Loba la Daniel, ba bwe mo̱ bo̱ngo̱, ebanja mo̱ nde e Loba la longe̱, nu tingam bebe be̱se̱; janea lao pe̱ di si mabo̱, doi lao di matingame̱ natena o su.”—Dan. 6:7-10, 19-22, 26, 27.

¹⁵ Mulo̱nge̱ myenge a kwali ná: “Yehova a bule̱le̱ mwano ma basibi, a sambwe̱le̱ mo̱nge̱le̱ ma matumba.” A bati pe̱ ná: “Bonam n’ekombo yena Yehova nde e Loba lao, tumba lena a po̱sino̱ ka sango lao.” (Mye. 33:10, 12) E se̱ njo̱m a bwam di be̱nno̱ o benga kombe ka ni si be̱n misan oboso ba Yehova!

16. Njika mbaki jeno̱ ná di be̱ne̱ jombwea “ndenge ninde̱ne̱,” ońola nje pe̱ e? (Ombwa duta.)

¹⁶ Je̱n nje Yehova a bolino̱ o mińa mi tombi. Ne̱ni mambo ma malano̱ tomba son a ponda e? Je ná di be̱ mbaki ná Yehova a me̱nde̱ sunga baboledi bao ba jemea o ponda “ndenge̱ ninde̱ne̱.” (Mat. 24:21; Dan. 12:1) A mende̱ bola nika ponda mulatako ma matumba mu belabe̱ ná Gog ńa Magog, mu me̱nde̱no̱ ko̱ye̱ baboledi  ba Yehova ba jemea o wase ńe̱se̱. To̱ mu mulatako ma matumba mu be̱ne̱ nde 193 ma bekombo be longi Bebokedi ba bekombo be lati (ONU), mu si me̱nde̱ we̱le̱ te̱nge̱ne̱ Ńasam na milo̱ṅ mao ma bila ma mo̱ń! Yehova a boli din kakane̱: ‘Na [me̱nde̱] busise̱ edub’am na bosangi bam, na mabīse̱ pe̱ mbame̱me̱ oboso ba jita la matumba; nde ma me̱nde̱ bia ná mba nde ne Yehova.’—Hes. 38:14-16, 23; Mye. 46:11.

17. Bupisane̱ Bibe̱l nje e me̱nde̱ po̱ye̱ kiṅ’a wase, na ba bena be Yehova jemea e?

¹⁷ Niponda Gog a me̱nde̱no̱ koye̱ tumba la Loba, nde Yehova a me̱nde̱no̱ wana bila ba Armagedon, owe̱ni a me̱nde̱no̱ ńamse̱ “kiṅ’a wase ye̱se̱.” (Bbī. 16:14, 16; 19:19-21) O diwengisan ‘Yehova a me̱nde̱ tata bajemea,’ babo̱ pe̱ nde ba me̱nde̱ je̱ o wase o bwindea.—Mye 31:24; Min. 2:21.

18. Nje kriste̱n a mbale̱ jita i tano̱ be̱be̱ o bola e, ońola nje pe̱ e? (Daniel 3:28)

¹⁸ O myango ma mbel’a moto me̱se̱, jita la baboledi ba Yehova ba ba ta be̱be̱ o bo̱lo̱ne̱ wonj’abu, na longe̱ labu pe̱ ońola ndolo ba be̱nedino̱ Yehova, Mwaned’abu Ńasam. Ba kombe̱ ka ni si be̱n misan kapo̱ ka beso̱mbe̱ ba Bonahebe̱r belalo bena be sungabe̱ o diyo̱ la wea ońolana ba bengi lee̱le̱ jemea oboso ba Ńasam.—Langa Daniel 3:28.

19. Bupisane̱ nje Yehova a makaise̱no̱ baboledi bao e, nje pe̱ a mengane̱no̱ biso̱ tatan e?

¹⁹ David a kwaledi ońola mweńa ma kombe̱ ka ni si be̱n misan oboso ba Loba. A tili ná: “Yehova a makaise̱ matumba. A Yehova swe̱le̱ mba muka kaponda bwam bam na k’am ni si be̱n njo̱m [to̱ misan].” (Mye. 7:9) David a tili pe̱ ná: “Mbale̱ na te̱me̱ la sim ba tate mba, ebanja dipita lam le nde na wa.” (Mye. 25:21) Mbadi ni peti ńa die̱le̱ longe̱ lasu ńe nde ná di benge be̱ Yehova jemea, di tingame̱ pe̱ na mo̱, e be̱ to̱ nje ye ná e po̱ye̱ biso̱! Biso̱ pe̱ di me̱nde̱ so̱ we̱le̱ kwala ka mulo̱nge̱ mwenge̱ ná: “Bonam na ba be o ngea ni si be̱n misan, bena ba madangwe̱ o mbend’a Yehova.—Mye. 119:1.