JOKWA 11
Ba ta ba tila jombwea Yesu
We o je̱ne̱ bato be o din duta e?— Mina mabu ná: Mateo, Marko, Lukas, Yohane, Petro, Yakobo, Yuda na Paulo. Bā be̱se̱ ba ta longe̱ o pond’a Yesu, ba tila pe̱ jombwea mo̱. Jokwe mambo mō̱ jombwea babo̱.
Nje o bino̱ jombwea ban bato e?
Oteten a ba bato lo̱mbi, balalo ba te̱ dikalo mwemba na Yesu, ba bupe̱ pe̱ mo̱. Ba mabele̱ babo̱ ná bamuloloma. O bi ba balalo e?— Mina mabu ná Mateo, Yohane na Petro. Bamuloloma Mateo na Yohane ba ta ba bia Yesu bwambwam, ba tili pe̱ kalati i malangwe̱ myango ma longe̱ la Yesu. Ńamuloloma Yohane a ta a tila kalati ipe̱pe̱ ba mabele̱no̱ ná: Bebīsedi, Yohane Ńaboso, Yohane ni londe̱ iba na Yohane ni londe̱ ilalo. Ńamuloloma Petro a ta a tila kalati iba ye o Bibe̱l ba mabele̱no̱ ná: Petro Ńaboso na Petro Ńambusa. O kalat’a Petro ni londe̱ iba, a lango myango ma buńa bwena Yehova a kwalane̱no̱ Yesu la mo̱ń ná: ‘Mun’am nu. Na to̱ndi mo̱, ne pe̱ muńe̱nge̱ ońol’ao.’
Bane̱ bato o duta pe̱ ba malee̱ biso̱ bema bepe̱pe̱ jombwea Yesu o kalati ba tilino̱. Dina la mō̱ ńabu ná Marko. Ponda po̱, a ta wa buńa ba kwe̱no̱ Yesu, e̱n pe̱ nje ye̱se̱ e tombi. Nupe̱pe̱, dina lao ná Lukas. A ta nde do̱kita, nde ponda po̱, a timbi nde Kriste̱n ombus’a kwed’a Yesu.
Baba bape̱pe̱ weno̱ o je̱ne̱ o duta be nde bonańango a Yesu basadi. O bi mina mabu e?— Mina mabu ná Yakobo na Yuda. O bebotedi, ba si ta ba dube̱ Yesu. Ba ta na bo̱nge̱le̱ ná Yesu a maboa son a njou. Nde ba timbi dube̱ Yesu, na babo̱ ba timba Kriste̱n.
Moto nusukan weno̱ je̱ne̱ o duta e nde Paulo. Bianá a mabe̱ Kriste̱n, dina lao di ta nde ná Saulo. A ta a singe̱ Kriste̱n, a ta pe̱ a takise̱ babo̱ jita. O bi nje e boli ná Paulo a pule be̱ Kriste̱n e?— Buńa bō̱, ke̱ e o nge’a lo̱ndo̱, a sengi doi la moto le o kwalane̱ mo̱ la mo̱ń. Doi la Yesu di! A baise̱ Paulo ná: ‘Ońola nje o matakise̱no̱ bato ba dube̱ mba e?’ Ombusa nika, Paulo a tuko, na mo̱ a timba Kriste̱n. Paulo a ta a tila 14 ba kalat’a Bibe̱l, botea kalat’a Roma nate̱na kalat’a Bonahebe̱r.
Di malanga Bibe̱l buńa te̱. Di mokwa jita la mambo ma mombweye̱ Yesu ke̱ di malanga Bibe̱l. O to̱ndi bata jokwa mambo mape̱pe̱ jombwea Yesu e?—
