Ombwa te̱ yin son a muna ye o duta. A me̱ne̱ne̱ bianá e muso̱lo̱ki, nika ná mo̱me̱ne̱ mō̱. E pe̱ bo̱ngo̱, ‘bwā e? Nika e mápo̱ye̱ wa buńa bō̱ e?— Ponda iwo̱, nika e yo̱ki po̱ye̱ biso̱ be̱se̱. Bibe̱l e mato̱pea ońola mako̱m ma Yehova mena ma ta ma be̱ muso̱lo̱ki, ma bwa pe̱ bo̱ngo̱. Dina la mō̱ ńabu di ta nde ná Elia. Jokwe mambo jombwea mo̱.

Elia a ta longe̱ o Israel etum a mimbu jita biana Yesu a mayabe̱. Ahab, Kiṅ’a Israel, a si ta owe̱ Yehova, Loba la mbale̱. Ahab na munj’ao Isebe̱l, ba ta nde bowe̱ loba la mpoṅ di ta be̱ne̱ dina ná Baal. Ońola nika nde jita la bato o Israel pe̱ di botedino̱ o jowe̱ Baal. Isebe̱l, munj’a Kiṅe̱, a ta bobe jita, a ta pe̱ a pula bwa Elia na bato be̱se̱ bena ba ta bowe̱ Yehova! O bi nje Elia a bolino̱ e?—

Elia a ńī nde mīla! Alo etum nate̱na o eyaṅ, ala wutame̱ o mulomba ma dale, nika ná ekokot’a dipo̱ndi oteten a dale wuma yena moto eno̱ ná a wutame̱. O mo̱nge̱le̱ ná  a boli nde nika ońola nje e?— A ta a bwa bo̱ngo̱. Nde Elia a si ta angame̱n bwa bo̱ngo̱. Ońola nje e? Ońolana a ta a bia ná Yehova ena ongwane̱ mo̱. Yehova a ta a málee̱ Elia ngiń’ao. Ngedi po̱, Yehova alabe̱ muka ma Elia, na mo̱ a loma wea i wu o mo̱ń. E, Yehova a wusa pe̱te̱ jongwane̱ Elia nin ngedi!

Ponda Elia a tano̱ o mulomba ma dale, Yehova a baise̱ mo̱ ná: ‘We nde bola nje wan e?’ Na Elia alabe̱ ná: ‘Ne o bwa bo̱ngo̱ ná ba mabwa mba, mbame̱ne̱ mō̱ bukate̱ nde na dia na mowe̱ wa.’ Elia a ta o̱nge̱le̱ ná ba ta ba mábwa bowe̱ Yehova be̱se̱. Nde Yehova a kwalane̱ Elia ná: ‘Ke̱m, nika e titi mbale̱. 7 000 la bato le lena di dia di mowe̱ mba. Embe̱ mulema. Na dia na be̱n ebolo jita wangame̱nno̱ bola!’ O mo̱nge̱le̱ ná be byala be bwese̱ Elia muńe̱nge̱ e?—

Nje myango ma Elia mi mokwe̱le̱no̱ wa e?— To̱ buńa, o s’angame̱n bwa bo̱ngo̱ to̱so̱ je̱ne̱ wame̱ne̱ bianá we muso̱lo̱ki. O be̱n mako̱m ma to̱ndi Yehova, ma to̱ndi pe̱ wa. Yehova a be̱n ngińa jita, a me̱nde̱ pe̱ jongwane̱ wa ponda ye̱se̱! We muńe̱nge̱ o bia ná, to̱ buńa, o titi wame̱ne̱ mō̱ e?—