Moto a málangwea wa lambo a si bedino̱ langwea moto nupe̱pe̱ e?— * Yete̱na nika, bia ná ba mabele̱ di lambo ná esoka. Bibe̱l e mato̱pea ońola “esoka” ewo̱ ye bosangi; ye nde bosangi ońolana e mawa nde na Loba, ye pe̱ nde esoka ońolana moto to̱ mō̱ a si ta a bia mo̱. To̱ ange̱l i si ta i bia mo̱. O mapula bia njika esoka ye e?—

O ponda ni tombi, kwaṅkwaṅ, Loba a weki mom’a boso na mut’a boso. Mina mabu ná Adam na Eva. Loba a boli babo̱ epolo ewo̱ e do̱li ba mabele̱no̱ ná Mōnda mwa Eden. Adam na Eva ba sengane̱ te̱ Loba, ke̱ babo̱ na bana babu ba wusa timbise̱le̱ wase ńe̱se̱ paradisi ńe ka mu mōnda. Ba wusa be̱ longe̱ o bwindea o Paradisi. Nde o dia o mo̱nge̱le̱ nje Adam na Eva ba bolino̱ e?—

Adam na Eva ba si sengane̱ Loba, ońola nika nde di titino̱ o paradisi we̱nge̱. Nde Loba a ta a kwala ná a me̱nde̱ bola ná wase ńe̱se̱ e do̱le, na ná bato ba be̱ longe̱ o wase o bwindea, ba be̱ pe̱ muńe̱nge̱. Ne̱ni a wusano̱ bola nika e? Mimbu mi tombi jita, to̱ moto a si ta a bia. Nika e ta nde esoka.

Ponda Yesu a po̱ino̱ o wase, a lee̱ bato mambo jita ońola y’esoka. A kwali ná y’esoka e mombwea nde Janea la Loba. Yesu a langwedi bato ná ba kane̱ ná di Janea di ye janea bato o wase. Di me̱nde̱ bola ná wase e timbe paradisi ni do̱li jita.

We muńe̱nge̱ o bia y’esoka e?— O si dimbea ná bukate̱ bato ba masengane̱ Yehova nde ba me̱nde̱ be̱ longe̱ o Paradisi. Bibe̱l e malangwea biso̱ jita la myango ma bome na bito ba sengane̱ Yehova. O to̱ndi jokwa mambo jombwea babo̱ e?— Jombwe te̱ banja bō̱ babu ba tano̱ na ne̱ni jeno̱ ná jembilane̱ babo̱.