Ye ndutu ná o sengane̱ papa na mam’ango̱ ponda te̱ e?— Ponda iwo̱, nika ńe ndutu. O bi banja Yesu a tano̱ a sengane̱ e?— A ta a sengane̱ sango ao, ńango ao na Yehova. Eyembilan ao e mongwane̱ wa o sengane̱ papa na mam’ango̱, to̱ nika e be̱ nde wa ndutu. Di bate jokwa mambo ma mombweye̱ Yesu.

Bianá Yesu a mapo̱ o wase, a ta nde o mo̱ń na Sango ao, Yehova. Nde Yesu a ta pe̱ a be̱ne̱ sango na ńango o wase. Mina mabu ná Yose̱f na Maria. O bi ne̱ni Yose̱f na Maria ba timbino̱ bayedi ba Yesu, nika ná papa na mama ao e?—

Yehova a po̱ngi betańsedi ná Yesu a kokeye o dibum la Maria, ka ne̱ni muna a makokeano̱ o dibum la ńango ao. Myo̱di dibua mi tombino̱, na Yesu a yabe̱ o wase. Nika nde Maria na mom’ao Yose̱f ba timbino̱ bayedi ba Yesu o wase.

Ke̱ Yesu a be̱n 12 mbu, a boli lambo diwo̱ di lee̱ ná a to̱ndi jita Sango ao Yehova. Nika e tombi nde ponda Yesu na mbia mwe̱se̱ b’alono̱ o lo̱ndo̱ o Yerusalem ońola Pasa, nika ná ndema la jo̱nge̱le̱ ponda bana ba Israel ba busino̱ o Egipto. Ke̱ be o timba, Yose̱f na Maria ba si ta pe̱ be̱ne̱ Yesu to̱ wuma. O bi we̱ni a tano̱ e?—

Yose̱f na Maria ba pomane̱ timba o Yerusalem, na babo̱ ba kumwa wasa Yesu wuma ye̱se̱. Mulema mabu mu si ta musango ońolana ba si ta be̱ne̱ mo̱. Nde mińa milalo mi tombino̱, ba bomane̱ mo̱ o tempe̱l, epolo yena bato ba tano̱ bala jowe̱ Yehova. O bi ońola nje Yesu a tano̱ o tempe̱l e?— Ońolana oten nde a tano̱ angame̱n jokwa nje e mombweye̱ Sango ao, Yehova. Yesu a ta a to̱ndo̱ Yehova, a ta pe̱ a pula jokwa ne̱ni bwese̱ mo̱ muńe̱nge̱. Ke̱ a makoka, ná a titi pe̱ muna, Yesu a bengi sengane̱ Yehova. Yesu a sengane̱ mo̱, to̱ ponda nika e tano̱ ndutu ońol’ao, na to̱ na nika e tano̱ e pula ná a take. Nde, Yesu a ta pe̱ so̱ a sengane̱ Yose̱f na Maria e?— E, Bibe̱l e makwala ná a sengane̱ babo̱.

Nje eyembilan a Yesu e mokwe̱le̱no̱ wa e?— Jangame̱n sengane̱ bayedi basu, nika ná papa na mama, to̱ nika e be̱ nde ndutu. O me̱nde̱ so̱ bola nika e?—