JOKWA 10

Nje weno̱ ná o tombwane̱ o ndongame̱n ya Mboṅ a Yehova e?

OKA

Mo̱ o mábelabe̱ o jukea o ndongame̱n a Mboṅ a Yehova e? O si bedi te̱ jukea oten we ná o bwa bo̱ngo̱ son o wala oten nged’a boso. We ná o baise̱ wame̱ne̱ ná: ‘Ne̱ni yi ndongame̱n i matombano̱ e? Ońola nje yeno̱ mweńa e? Ońola nje nangame̱nno̱ jukea oten e?’ O din jokwa, o me̱nde̱ so̱ṅtane̱ ne̱ni ko̱to̱me̱ na bane̱ leno̱ ná di bola ná o bate sisea be̱be̱ na Loba, longwane̱ pe̱ wa.

1. Ońola njika njo̱m a boso di mako̱to̱me̱no̱ mwemba e?

Maka nje mutiled’a Bibe̱l mō̱ a kwalino̱ jombwea njo̱m a boso ońola nje di mako̱to̱me̱no̱ mwemba, mo̱ ná: “Na masesa Yehova o jako̱to̱ne̱.” (Myenge 26:12) Nika pe̱ nde Mboṅ a Yehova i mabwano̱ muńe̱nge̱ jita ke̱ i mako̱to̱me̱ mwemba. O wase ńe̱se̱, i mako̱to̱me̱ woki te̱ o sesa Loba, o lo̱ngo̱ na o kane̱. Ngedi to̱ ininga mbu te̱, i mukea o mako̱to̱ne̱ mande̱ne̱ o jowe̱ Yehova.

2. Nje o me̱nde̱no̱ jokwa o ndongame̱n yasu e?

O ndongame̱n, di mabolane̱ nde Eyal’a Loba, ‘ba mateleye̱ janda lao, ná bato ba so̱ṅtane̱ nje e langabe̱.’ (Langa Nehemia 8:8.) Wukedi te̱, o me̱nde̱ jokwa mambo jombwea Yehova na bede̱mo bao be mabwesane̱ muńe̱nge̱. Nika o mabatano̱ so̱ṅtane̱ ndolo a be̱nedino̱ wa, o me̱nde̱ bata sisea mo̱ be̱be̱. O me̱nde̱ pe̱ jokwa ne̱ni eno̱ ná ongwane̱ wa o be̱ne̱ longe̱ le bonam.—Yesaya 48:17, 18.

3. Nje weno̱ ná o tombwane̱ ke̱ wukedi o ndongame̱n yasu e?

Yehova a mabaise̱ biso̱ ná “jombwane̱ mō̱ na nune̱ ná jumwe̱le̱ ndolo na bebolo ba bwam; di s’ese̱le̱ jako̱to̱ne̱ lasu.” (Bonahebe̱r 10:24, 25) O ndongame̱n yasu, o me̱nde̱ dongame̱ne̱ bato ba to̱ndo̱ne̱ mō̱ na nune̱ na mbale̱, ba be̱n pe̱ ńo̱ngi o bata bia Loba, kapo̱ ka wa. O me̱nde̱ senga babo̱ ba makwala mambo ma membe̱ ba so̱ino̱ o Bibe̱l. (Langa Roma 1:11, 12.) O me̱nde̱ pe̱ kwala na babaedi na bato be mulamba, bena be muńe̱nge̱ to̱ na mitakisan ba be̱nno̱. Njo̱m to̱ ininga yi ońola nje Yehova a mapulano̱ ná di ko̱to̱me̱ mwemba ponda ye̱se̱!

ALA O NJIBA

Okwa ne̱ni ndongame̱n ya Mboṅ a Yehova i matombano̱, na ońola nje yeno̱ muse̱ṅ ná di po̱nge miwe̱n ná jukeye oten.

4. Ndongame̱n ya Mboṅ a Yehova

O ebwe’a mbu yaboso, kriste̱n i ta i ko̱lo̱ngo̱ne̱ o ko̱to̱me̱ mwemba o jowe̱ Yehova. (Roma 16:3-5) Langa Kolose 3:16, nde lo kwaleye pe̱ ońola min myuedi:

Ne̱ni kriste̱n yaboso i tano̱ yowe̱ Yehova e?

We̱nge̱, Mboṅ a Yehova i ko̱lo̱ngo̱ne̱ ko̱to̱me̱ mwemba o bepolo babu ba jowe̱. Ná we̱ne̱ ne̱ni ndongame̱n yabu i matombano̱, ombwa SINIMA. Ombusa nika, ombwa duta la ndongame̱n le owan, nde lo kwaleye pe̱ ońola myuedi mi mabupe̱.

SINIMA: Nje e matombe̱ o ndabo a Janea e? (2:12)

Njika mambo me bowan o makino̱ oteten a nje e matombe̱ o ndabo a Janea na nje o langino̱ o Kolose 3:16 e?
O ni sinima to̱ o di duta, mo̱ o maki lambo dipe̱pe̱ jombwea ndongame̱n lena di bwese̱ wa muńe̱nge̱ e?

Langa 2 Korinto 9:7, nde lo kwaleye pe̱ ońola min myuedi:

Ońola nje njangi e titino̱ o ndongame̱n ya Mboṅ a Yehova e?

Ombwea nje ba me̱nde̱no̱ kwalea o ndongame̱n ni mabupe̱ na moto nu matombise̱ wa jokwa.

Njika dongo la ndongame̱n o mo̱nge̱le̱no̱ ná o me̱nde̱ to̱ndo̱ to̱ ná le ná di be̱ wa muse̱ṅ e?

Mo̱ o ta o bia nika e?

O jw.org, we ná o so̱ owe̱ni na njika ponda ndongame̱n i majano̱ o wase ńe̱se̱.

Ndongame̱n yasu i be̱n bekwali, patan ońola dikalo na sinima. Ndongame̱n i mabotea nde i bo̱ pe̱ na mwenge na muka
O mongo ma ndongame̱n mō̱, bukedi be ná ba bola malabe̱
Bato be̱se̱ be ná bukea, e be̱ mbia, bamulamba, badun na bana
O si be̱n ná o sawe. Mboṅ a Yehova i si mabaise̱ ná bato ba sawe o jingea to̱ ná ba sange njangi

5. E mapula ná di po̱nge miwe̱n ná jukeye o ndongame̱n

Ombwea eyembilan a mbia ma Yesu. Ná bukeye o buńa bonde̱ne̱ te̱, ba ta bangame̱n dangwa lambo ka mińa milalo o mangea ma midongo, jasumwe̱ o Nasaret po̱ o Yerusalem. Langa Lukas 2:39-42, nde lo kwaleye pe̱ ońola min myuedi:

Mo̱ o mo̱nge̱le̱ ná e ta e pula miwe̱n ońola di lo̱ndo̱ la wala o Yerusalem e?
Njika mambo me ná ma baise̱ ná o po̱nge miwe̱n minde̱ne̱ ná wukeye o ndongame̱n e?
Mo̱ o mo̱nge̱le̱ ná ye muse̱ṅ o bola nika e? Ońola nje e?