Yehova e nde Loba la musango. (1 Korinto 14:33) E te̱nge̱n so̱ ná tumba lao di longeye bwam. Ne̱ni mwemba ma kriste̱n mu longedino̱ e? Ne̱ni jeno̱ ná jongwane̱ ná mu dangwe o ńai a bwam e?

1. Nja ńe mulopo ma mwemba e?

‘Kristo nde e mulopo ma mwemba.’ (Efeso 5:23) La mo̱ń, a madie̱le̱ bebolo ba baboledi ba Yehova o wase ńe̱se̱. Yesu a te̱se̱ “mut’a jemea na jangwa” ńena ńe nde son a dibo̱to̱ la batudu bou, ba mabele̱no̱ pe̱ ná Dibe̱le̱ di Madie̱le̱. (Langa Mateo 24:45-47.) Kapo̱ ka bamuloloma na batudu o Yerusalem o ebwe’a mbu yaboso, Dibe̱le̱ di Madie̱le̱ di mabola myemba mye̱se̱ bediedi. (Bebolo 15:2) Nde seto̱ ban bome nde be badiedi ba bebokedi basu. Ba malanga Eyal’a Loba o bia nje Yehova a mapulano̱ ná ba bole, ba mabupe̱ pe̱ bediedi Yesu a mabolano̱.

2. Njik’ebolo batudu ba be̱nno̱ e?

Batudu be nde bome be kriste̱n you yena i mabolane̱ Bibe̱l o lee̱ baboledi ba Yehova, o jongwane̱ babo̱ na jembe̱ pe̱ babo̱. Ba si makusa musawedi ońola y’ebol’abu. Nde ba mabolea “na wonja; seto̱ ońola muse̱ṅ ma bobe, nde na mulema mwe̱se̱.” (1 Petro 5:1, 2) Batudu ba makusa jongwane̱ la baboledi, bena na ponda, be ná ba be̱ ńai ni dongame̱n o bolea ka batudu.

Dibe̱le̱ di Madie̱le̱ di mate̱se̱ batudu bō̱ baboledi ba bebondo. Ba mape̱pe̱le̱ myemba jita ná ba bole bonasango na bonańango bediedi, bembe̱ pe̱ babo̱. Ba mate̱se̱ bonasango batudu na baboledi yete̱na ban ba malondise̱ nje Betiledi be mabaise̱no̱.—1 Timoteo 3:1-10, 12; Tito 1:5-9.

3. Njik’ebolo Mboṅ a Yehova te̱ e be̱nno̱ e?

Be̱se̱ bena be o mwemba ba ‘masesa dina la Yehova’ ke̱ ba mabola malabe̱ na bekwali o ndongame̱n na ke̱ ba mate̱ dikalo bupisane̱ ngud’abu.—Langa Myenge 148:12, 13.

 ALA O NJIBA

4. Yesu e nde mudiedi ńe muyao

Yesu a mabola biso̱ bebeledi be mabwesane̱ muńe̱nge̱. Langa Mateo 11:28-30, nde lo kwaleye pe̱ ońola min myuedi:

• Ne̱ni Yesu a mapulano̱ ná je̱ne̱ mbad’ao ńa die̱le̱ e?

5. Batudu be nde byembilan

1. Batudu ba mouse̱ dube̱ labu na la mbia mabu

2. Batudu ba mombwea be̱se̱ be o mwemba

3.   Batudu ba mate̱ dikalo ponda ye̱se̱

4. Batudu be nde balēdi. Ba mongwane̱ pe̱ o bosangi na o bebolo bepe̱pe̱

6. Di bole ebolo mwemba na batudu

Bibe̱l e malangwea biso̱ ońola nje yeno̱ mweńa ná di bole ebolo mwemba na batudu. Langa Bonahebe̱r 13:17, nde lo kwaleye pe̱ ońola min myuedi:

• Ońola nje Bibe̱l e mome̱le̱no̱ biso̱ ná di sengane̱ ba bena ba madie̱le̱ biso̱, di sibise̱ pe̱ biso̱me̱ne̱ owas’abu e?

Langa Lukas 16:10, nde lo kwaleye pe̱ ońola min myuedi:

• Ońola nje jangame̱nno̱ bola ebolo mwemba na batudu to̱ o mambo mena ma me̱ne̱ne̱ biana ma titi mweńa jita e?

 EBONGOLO

Yesu nde e mulopo ma mwemba. Je muńe̱nge̱ o bola ebolo mwemba na batudu ba maboleye̱ owas’ao ebanja ba malo̱ko̱ biso̱, be pe̱ biso̱ byembilan.

Ndimbisedi

• Nja ńe mulopo ma mwemba e?

• Ne̱ni batudu ba mongwane̱no̱ mwemba e?

• Njik’ebolo muboled’a Yehova te̱ a be̱nno̱ e?