JOKWA 22

Ne̱ni weno̱ ná o langwa myango ma bwam e?

OKA

Nika weno̱ jokwa mbale̱ ye o Bibe̱l, we ná o dutea ná: ‘Bato be̱se̱ bangame̱n bia mo̱!’ E, bato be̱se̱ bangame̱n bia yi mbale̱! Nde we ná o bwa bo̱ngo̱ o langwea bane̱ nje wokono̱. Jombweye ne̱ni weno̱ ná o buka bo bo̱ngo̱, o botea pe̱ langwea bape̱pe̱ myango ma bwam mye o Bibe̱l na muńe̱nge̱.

1. Ne̱ni weno̱ ná o langwea bato bena o bino̱ nje wokono̱ e?

Bokwedi ba Yesu ba kwali ná: “Di titi ná jese̱le̱ o to̱po̱ ma mena je̱nno̱, di sengino̱ pe̱.” (Bebolo 4:20) Ba ta ba to̱ndo̱ mbale̱ Yesu a lee̱no̱ babo̱ kańena ba ta ba pula langwea bato be̱se̱ mo̱. Mo̱ nika nde wa pe̱ o masengano̱ e? Yete̱na e, wasa epolo ná o langweye mbia mo̱ngo̱ na mako̱m mo̱ngo̱ nje wokono̱, na edube.—Langa Kolose 4:6.

Mbadi iwo̱ weno̱ ná o bola nika

We te̱ o ekwali na mot’a mbia, inge̱le̱ jo̱nge̱le̱ la Bibe̱l ninka ná: “Noko lambo la bwam nin woki.”
Langwea diko̱m lo̱ngo̱ di maboe̱ to̱ lena di be̱n mutaka, epas’a Bibe̱l e membe̱.
Mako̱m mo̱ngo̱ m’ebolo ma baise̱ te̱ wa ne̱ni wike̱n ango̱ e tombino̱, langwea babo̱ nje wokono̱ o jokwa lo̱ngo̱ la Bibe̱l to̱ o ndongame̱n a mwemba.
Lee̱ mako̱m mo̱ngo̱ mulomba jw.org.
Bele̱ bato bape̱pe̱ ná bukeye o jokwa lo̱ngo̱ la Bibe̱l to̱ lee̱ babo̱ ne̱ni baise̱ jokwa o jw.org.

2. Ońola nje yeno̱ bwam ná o te̱se̱ ná o mabotea te̱ dikalo na mwemba e?

Seto̱ buka te̱ bato bena ba tano̱ ba bia nde bokwedi ba Yesu ba te̱ye̱no̱ dikalo. Yesu a ta “a loma babo̱ baba-baba oboso bao o mindi me̱se̱” ná ba te̱ dikalo. (Lukas 10:1) Ni mbad’a te̱ dikalo ńa bwam e boli ná bato jita ba we̱le̱ senga myango ma bwam. Bokwedi ba bo pe̱ muńe̱nge̱ jita o te̱ dikalo mwemba. (Lukas 10:17) Mo̱ wa pe̱ we ná o te̱se̱ ná o boteye te̱ dikalo na mwemba e?

ALA O NJIBA

Okwa ne̱ni weno̱ ná o buka bo̱ngo̱, o bia pe̱ muńe̱nge̱ mu mawe̱ o langwa la myango ma bwam.

3. Yehova a me̱nde̱ jongwane̱ wa

Bato bō̱ ba mapula te̱ botea te̱ dikalo, be ná ba bwa bo̱ngo̱ ońola nje bane̱ ba me̱nde̱no̱ jo̱nge̱le̱ to̱ ne̱ni ba me̱nde̱no̱ kasa babo̱.

Mo̱ o mabwa bo̱ngo̱ o langwea bane̱ nje wokono̱ e? Ońola nje pe̱ e?

Ombwa SINIMA, nde lo kwaleye pe̱ ońola myuedi mi mabupe̱.

SINIMA: Na kane̱ Yehova ná a bole mba ngiń’a mulema (4:05)

Ne̱ni ben beso̱mbe̱ ba Mboṅ a Yehova be bukino̱ bo̱ngo̱ be tano̱ be be̱ne̱ e?

Langa Yesaya 41:10, nde lo kwaleye pe̱ ońola min myuedi:

Ponda o mabwano̱ bo̱ngo̱ o te̱ dikalo, ońola nje wangame̱nno̱ kane̱ e?

Mo̱ o ta o bia nika e?

Mboṅ a Yehova jita i ta yo̱nge̱le̱ ná i si me̱nde̱ we̱le̱ langwea bane̱ myango ma bwam. K’eyembilan, Sergey a si ta e̱ne̱ mo̱me̱ne̱ mweńa, e ta pe̱ mo̱ ndutu o kwalisane̱ bato bape̱pe̱. Nde ombusa ponda oko Bibe̱l. Mo̱ ná: “To̱ na bo̱ngo̱ bam, na botedi langwea bane̱ nje na tano̱ nokwa. O mańaka mam me̱se̱, langwea la bane̱ nje ye o Bibe̱l di boli ná na bate be̱ne̱ye̱ mbame̱ne̱ lakisane̱. Nik’e bati pe̱ jouse̱ dube̱ lam.”

4. Bola bane̱ edube

Ponda o malangwano̱ myango ma bwam, ombwea nje o makwalano̱ na mbadi o makwalano̱ mo̱. Langa 2 Timoteo 2:24 na 1 Petro 3:15, 16, nde lo kwaleye pe̱ ońola min myuedi:

Ne̱ni weno̱ ná o we̱le̱ ben bepasi ba Bibe̱l o ebolo ke̱ o mate̱ye̱ bane̱ dikalo e?
Mbia to̱ mako̱m mo̱ngo̱ mō̱ me ná ma banga kasa nje o makwalano̱. Nje weno̱ ná o bola e? Nje pe̱ o s’angame̱nno̱ bola e?
Ońola nje yeno̱ ná e be̱ bwam ná o baise̱ nde babo̱ myuedi na muyao buka wasa ńakisane̱ babo̱ ná ba kase nde jo̱nge̱le̱ lo̱ngo̱ e?

5. Te̱ la dikalo di mabwesane̱ muńe̱nge̱

Yehova a boli Yesu ebol’a langwa la myango ma bwam. Ne̱ni Yesu a tano̱ e̱ne̱ y’ebolo e? Langa Yohane 4:34, nde lo kwaleye pe̱ ońola min myuedi:

Da la bwam di mabongwa longe̱ lasu, di mabwese̱ pe̱ biso̱ muńe̱nge̱. Ońola nje Yesu a kwalino̱ ná bola la jemea la Loba, k’eyembilan langwa la myango ma bwam, le nde ka da e?
O mo̱nge̱le̱ ná njika muńe̱nge̱ mwe ná mu be̱ o te̱ la dikalo e?

Malea

O ndongame̱n a teten a woki, embilane̱ mbadi weno̱ ná o bolane̱ o botea bekwali.
Tilise̱ dina o be̱ mūtu o ndongame̱n a teten a woki. Tombise̱ la bekwali le ná longwane̱ wa o langwea bane̱ nje o mokwano̱ na bo̱bise̱ la ńolo.
Bolane̱ mongo “Bato ba makwala ná” to̱ “Moto e ná a baise̱ ná” me o nin kalati, ná o keke jalabe̱ myuedi na mikidi ba matimbe̱ ponda ye̱se̱.

MOTO E NÁ A BAISE̱ NÁ: “Nje ye peńa e?”