Njo̱m di mabolano̱ bobe, di matakano̱, di mawo̱no̱ pe̱ ńe nde ná Adam na Eva ba bangi sengane̱ Loba. a Nde di be̱n dipita. Yehova a weki mwano ná tongwea na Mun’ao Yesu Kristo, a sunge biso̱ na bobe na kwedi. Bibe̱l e malee̱ ná tongwea na kwed’ao, Yesu a sawo diko̱ti. Diko̱ti le nde mususedi mu masawabe̱ o te̱se̱ moto wonja. Mususedi Yesu a sawono̱ mwe nde longe̱ lao la mot’a benama ńe ke̱nge̱nge̱. (Langa Mateo 20:28.) Yesu a wusa be̱ longe̱ o bwindea o wase, kana a tano̱ ke̱nge̱nge̱ a sengane̱no̱ pe̱ Yehova; nde emedi o wo̱ ońol’asu ná di we̱le̱ tombwane̱ nje ye̱se̱ Adam na Eva ba bo̱lo̱ne̱no̱. Yesu a lee̱le̱ pe̱ nate̱na o njika dikala mo̱ na Yehova ba to̱ndino̱ biso̱. Din jokwa di me̱nde̱ jongwane̱ wa o bata lee̱le̱ masoma ońola kwed’a Yesu.

1. Njika tombwane̱ kwed’a Yesu ńeno̱ ná e wanea biso̱ we̱nge̱ e?

Kana jeno̱ bato ba bobe, di mabola mambo jita Yehova a si do̱lisanno̱. Nde yete̱na jombwe̱ myobe masu na mbale̱, di baise̱ Yehova milakisan tongwea na Yesu Kristo, di bola pe̱ me̱se̱ ná di si po̱ngo̱ pe̱ milemlem ma mawuse̱, je ná di be̱ne̱ mulatako ma bo̱ibo̱i na Loba. (1 Yohane 2:1) Bibe̱l e makwala ná: “Kristo pe̱ a taki ngedi po̱ ońola myobe, mo̱ nute̱m na sim ońola basite̱m na sim, ná alane̱ biso̱ omboa Loba.”—1 Petro 3:18.

2. Njika tombwane̱ kwed’a Yesu ńeno̱ ná e wanea biso̱ o kie̱le̱ ni maye̱ e?

Yehova a lom Yesu ná a bole longe̱ lao la mot’a benama ńe ke̱nge̱nge̱ “ná to̱ nja nu dube̱ mo̱ a si mańama, nde a mabe̱ne̱ longe̱ la bwindea.” (Yohane 3:16) Tongwea na nje Yesu a bolino̱, son a ponda Yehova a me̱nde̱ sumwa mambo ma bobe me̱se̱ pamo ńa Adam e wanno̱. Nika e mapula nde kwala ná di lee̱le̱ te̱ ná di dube̱ jabea la Yesu, di me̱nde̱ be̱ne̱ epolo o be̱ne̱ longe̱ le bonam o bwindea o paradisi o wase!—Yesaya 65:21-23.

 ALA O NJIBA

3. Kwed’a Yesu e mate̱se̱ biso̱ wonja na bobe na kwedi

1. Adam a ta nde moto ńe ke̱nge̱nge̱ ńena nu si sengane̱ Loba. Ońola nika, bato ba mabola bobe ba wo̱ pe̱

2. Yesu a ta nde moto ńe ke̱nge̱nge̱ ńena nu sengane̱ Loba. Ońola nika, bato be ná ba timba be̱ ke̱nge̱nge̱ ba be̱ pe̱ longe̱ o bwindea

4. Kwed’a Yesu ńe ná e wanea bato be̱se̱ tombwane̱

 5. Diko̱ti le nde jabea Yehova a bolino̱ wa

Mako̱m ma Yehova ma me̱ne̱ nde diko̱ti ka jabea mō̱ ńabu te̱ a kusanno̱ mo̱. K’eyembilan, langa Galatia 2:20, nde lo kwaleye pe̱ ońola min myuedi:

• Nje ńamuloloma Paulo a kwalino̱ yena e malee̱ ná a ta nde e̱ne̱ diko̱ti ka jabea mo̱me̱ne̱ a kusino̱ e?

Adam a bolino̱ bobe, mo̱ na mbot’ao ńe̱se̱ ba kusi nde mbako a kwedi. Nde Yehova a lom Mun’ao o wo̱, ná o we̱le̱ be̱ longe̱ o bwindea.

Weno̱ langa bepasi ba Bibe̱l be mabupe̱, keka te̱ dutea ne̱ni Yehova a sengino̱ ponda Mun’ao a tano̱ a taka. Langa Yohane 19:1-7 na 16-18, nde lo kwaleye pe̱ ońola min myuedi:

• Ne̱ni o masengano̱ ońola nje Yehova na Yesu ba boledino̱ wa e?

 EBONGOLO

Kana Yesu a wedino̱, Yehova e ná a lakise̱ myobe masu, di be̱n pe̱ epolo o be̱ne̱ longe̱ le bonam o bwindea.

Ndimbisedi

• Ońola nje Yesu a wedino̱ e?

• O njika mbadi longe̱ la Yesu la mot’a benama ńe ke̱nge̱nge̱ di tano̱ diko̱ti di te̱nge̱n e?

• Ne̱ni kwed’a Yesu ńeno̱ ná e wanea wa tombwane̱ e?