Maya nde ma kwe̱ longe̱. Esibe̱ maya to̱ moto a titi ná a be̱ longe̱. Loba nde a weki biso̱, mo̱ so̱ nde a be̱n bwam o langwa ne̱ni bolane̱ maya. Nje a kwalino̱ jombwea maya e? Mo̱ je ná di da mo̱ to̱ tombe̱le̱ mo̱ o ńolo e? Ne̱ni pe̱ weno̱ ná o no̱ngo̱ bedomsedi ba bwam jombwea maya e?

1. Nje Yehova a kwalino̱ jombwea maya e?

Yehova a langwedi baboledi bao ba pond’a kwaṅ ná: “Mudī ma ńolo te̱ mwe nde maya mao.” (Levitiko 17:14) Ońola Yehova, maya me nde longe̱. Kana longe̱ leno̱ bosangi ońolana le nde jabea di wu na Loba, maya pe̱ me bosangi.

2. Njika bolane̱ la maya Loba a bangino̱ e?

Yehova a ta a bola baboledi bao ba kwaṅ mbenda ná ba si da maya. (Langa Bebotedi 9:4 na Levitiko 17:10.) A yikiye̱ ni mbenda ponda dibe̱le̱ di madie̱le̱ di baise̱no̱ kriste̱n ná ‘yiye maya.’—Langa Bebolo 15:28, 29.

Jiya maya, nje nika e mapulano̱ kwala e? Do̱kita di langwedi te̱ wa ná wangame̱n jiya belam, o si me̱nde̱ ńo̱ mo̱. Nde o me̱nde̱ da da di be̱n belam to̱ jinge̱le̱ belam o misisa mo̱ngo̱ e? Ke̱m. Mulemlem pe̱, mbend’a Loba ńa jiya maya e mapula nde kwala ná di s’angame̱n ńo̱ maya to̱ da ńama ni tim. Di s’angame̱n pe̱ to̱ da da lena ba batino̱ maya.

Di makwala pe̱ ná nje ońola bolane̱ la maya o do̱kita e? Beboledi ba do̱kita bō̱ be mate̱nge̱ne̱ mbend’a Loba; k’eyembilan tombe̱le̱ la maya o mususu to̱ tombe̱le̱ la dongo diwo̱ la mongo mao mande̱ne̱ me nde: no̱ki i mole̱, no̱ki i masange̱, no̱ki i makokise̱ maya, na plasma. Beboledi bepe̱pe̱ be ná be si te̱nge̱ne̱ mbend’a Loba. K’eyembilan beboledi bō̱ be mabolane̱ mambo masadi ma mano̱ngo̱be̱ o mongo mande̱ne̱ ma maya. Bepe̱pe̱ be mabolane̱ nde maya ma moto mo̱me̱ne̱. Ońola ben beboledi, moto te̱ nde angame̱n no̱nge̱ bao bedomsedi. a—Galatia 6:5.

 ALA O NJIBA

3. Po̱so̱ beboledi ba do̱kita be mado̱lisane̱ Yehova

Ne̱ni weno̱ ná o po̱so̱ beboledi ba do̱kita bena be mulatako na jo̱nge̱le̱ la Loba e? Ombwa SINIMA, nde lo kwaleye pe̱ ońola nje yeno̱ mweńa o po̱ngo̱ matanga ma mabupe̱.

• Kane̱ ná o kuse dibie̱.—Yakobo 1:5.

• Wasa bete̱sedi ba Bibe̱l o duteye pe̱ ne̱ni we̱le̱ mo̱ o ebolo.—Minia 13:16.

• Wasa o bia njika beboledi ba mabolane̱no̱ wuma o majano̱.

• Emba njika beboledi o titino̱ ná wemea.

• Bola ná bedomsedi bo̱ngo̱ be die wa na doi la mulema di sangi.—Bebolo 24:16. b

• O̱nge̱le̱ ná to̱ moto a s’angame̱n langwea wa njika bedomsedi no̱ngo̱ o bekwali be mombweye̱ nde doi la mulema; to̱ e be̱ nde mom’ango̱ to̱ munj’ango̱, mutudu, to̱ mutombise̱ wa jokwa.—Roma 14:12.

• Tila bedomsedi o no̱ngino̱.

4. Mboṅ a Yehova i mawasa beboledi ba do̱kita ba bwam

Je ná di sengane̱ mbend’a Loba jombwea maya nde di kusa pe̱ beboledi ba do̱kita ba bwam bena be si mabolane̱ maya. Ombwa SINIMA.

Langa Tito 3:2, nde lo kwaleye pe̱ ońola min myuedi:

• Ońola nje jangame̱nno̱ lee̱le̱ edube di be̱ pe̱ muyao ke̱ di makwala na mado̱kita e?

 5. Mambo masadi ma mongo mande̱ne̱ ma maya

Maya ma longedi nde na mongo mande̱ne̱ mane̱i me nde: no̱ki i mole̱, no̱ki i masange̱, no̱ki i makokise̱ maya, na plasma. Ma mongo mande̱ne̱ pe̱ ma be̱n mambo masadi. c Ba mawe̱le̱ mambo masadi mō̱ o myanga o bwam ba bo̱lise̱ maboa to̱ jembe̱ busa la maya.

Kriste̱n te̱ nde ńangame̱n no̱nge̱ bao bedomsedi jombwea mambo masadi ma mongo mande̱ne̱ ma maya, bupisane̱ doi lao la mulema lokwabe̱le̱ na Bibe̱l. Kriste̱n iwo̱ ye ná i po̱so̱ o banga myanga to̱ beboledi ba do̱kita be mabolane̱ mambo masadi ma mongo mande̱ne̱ ma maya. Ipe̱pe̱ ye ná i po̱so̱ o kasa mo̱.

O nino̱ngo̱ te̱ bedomsedi, baise̱ wame̱ne̱ min myuedi:

• Ne̱ni neno̱ ná na teleye̱ do̱kita ońola nje na makasano̱ to̱ na mabangano̱ mambo masadi mō̱ ma mongo mande̱ne̱ ma maya e?

 EBONGOLO

Yehova a si mapula ná di bolane̱ maya o mbad’a bobe.

Ndimbisedi

• Ońola nje maya meno̱ bosangi ońola Yehova e?

• Ne̱ni di bino̱ ná mbend’a Loba ńa jiya maya e mombwea pe̱ tombe̱le̱ la maya e?

• Ne̱ni weno̱ ná o no̱ngo̱ bedomsedi ba bwam ke̱ o mapo̱so̱ beboledi ba do̱kita jombwea maya e?