JOKWA 47
Mo̱ we be̱be̱ ońola dubise̱ e?
O jokwa lo̱ngo̱ la Bibe̱l, woko mambo jita jombwea Yehova. Yen ebe o po̱ngi pe̱ mawengisan mō̱ ná o we̱le̱ nje wokono̱ o ebolo. Nde ye ná e be̱ ná lambo diwo̱ di meka wa ná o bake̱ wame̱ne̱ na Yehova o dubisabe̱ pe̱. O din jokwa di me̱nde̱ kwalea ońola mambo mō̱ mena me ná meka moto ná a dubisabe̱, je̱ne̱ pe̱ ne̱ni weno̱ ná o buka mo̱.
1. Njika so̱ṅtane̱ moto angame̱nno̱ be̱ne̱ obiana a madubisabe̱ e?
Ná o dubisabe̱, wangame̱n “so̱ṅtane̱ mbale̱.” (1 Timoteo 2:4) Nik’e si mapula kwala ná wangame̱n bia Bibe̱l ńe̱se̱ obiana o madubisabe̱. To̱ kriste̱n yena i májinde̱ o dubisabe̱ i dia te̱ nde i mokwa. (Kolose 1:9, 10) Nde wangame̱n so̱ṅtane̱ belēdi baboso ba Bibe̱l. Batudu ba me̱nde̱ jongwane̱ wa o bia nga o mábe̱ne̱ so̱ṅtane̱ di dongame̱n.
2. Njika matanga wangame̱nno̱ po̱ngo̱ obiana o madubisabe̱ e?
Obiana o madubisabe̱, wangame̱n ‘jate̱le̱ na tukwa’ pe̱. (Langa Bebolo 3:19.) Nik’e mapula nde kwala ná o mombwe̱ na mbale̱ ońola myobe mo̱ngo̱ me̱se̱ mi tombi, o baise̱ pe̱ Yehova ná a lakise̱ wa. O mano̱ngo̱ pe̱ bedomsedi be bam o jese̱le̱ bedangwedi ba bobe na o be̱ne̱ bedangwedi Loba a do̱lisanno̱. Omo̱ń a nika wangame̱n jukea o ndongame̱n, o botea pe̱ te̱ dikalo na mwemba.
3. Ońola nje o s’angame̱nno̱ bwa bo̱ngo̱ o dubisabe̱ e?
Bato bō̱ ba mabwa bo̱ngo̱ ná ba si me̱nde̱ we̱le̱ bola nje ba kakanno̱ Yehova. Ye mbale̱ ná o me̱nde̱ po̱ngo̱ mawuse̱ ponda iwo̱, kapo̱ ka baboledi ba Yehova ba jemea Bibe̱l e makwaleano̱. Nde o si dimbea ná Yehova a si mengane̱ baboledi bao ná ba be̱ ke̱nge̱nge̱. (Langa Myenge 103:13, 14.) A mabwa muńe̱nge̱ yete̱na o boli nje ye̱se̱ ye o ngud’ango̱! A me̱nde̱ pe̱ jongwane̱ wa. Bibe̱l e mabola biso̱ mbaki ná to̱ lambo di “titi ná [di] pandise̱ biso̱ etum na ndol’a Loba.”—Langa Roma 8:38, 39.
ALA O NJIBA
E̱ne̱ ne̱ni weno̱ ná o buka mambo me̱se̱ me ná meka wa ná o dubisabe̱, ke̱ woko o bia Yehova bwam wemea pe̱ jongwane̱ lao.
4. Okwa o bia Yehova bwam
O njika dime̱ne̱ wangame̱nno̱ bia Yehova obiana o madubisabe̱ e? Wangame̱n bia mo̱ bwam ńai o mato̱ndo̱no̱ mo̱ o pula pe̱ do̱lisane̱ mo̱. Ombwa SINIMA ná we̱ne̱ ne̱ni bokwe̱ Bibe̱l o wase ńe̱se̱ ba bolino̱ nika. Ombusa nika kwalea pe̱ ońola myuedi mi mabupe̱.
-
O ni sinima, nje yongwane̱ bato bō̱ o be̱ be̱be̱ ońola dubise̱ e?
Langa Roma 12:2, nde lo kwaleye pe̱ ońola min myuedi:
-
Mo̱ o be̱n penda ońola nje Bibe̱l e malee̱no̱ nga o titi nde mbaki ná Mboṅ a Yehova i malee̱ mbale̱ e?
-
Yete̱na e, nje weno̱ ná o bola e?
5. Buka mambo mena me ná meka wa ná o dubisabe̱
Ponda di mano̱ngo̱no̱ bedomsedi o bake̱ biso̱me̱ne̱ na Yehova na dubisabe̱ pe̱, biso̱ be̱se̱ di makusa mitakisan. Ná we̱ne̱ eyembilan ewo̱, ombwa SINIMA, nde lo kwaleye pe̱ ońola myuedi mi mabupe̱.
-
O ni sinima, njika mitakisan Narangerel a tano̱ angame̱n buka ná a boleye Yehova e?
-
Ne̱ni ndolo ońola Yehova ńongwane̱no̱ mo̱ o buka mi mitakisan e?
Langa Minia 29:25 na 2 Timoteo 1:7, nde lo kwaleye pe̱ ońola min myuedi:
-
Nje e mabole̱ biso̱ ngiń’a mulema o buka mitakisan e?
6. Lakisane̱ jongwane̱ la Yehova
Yehova a me̱nde̱ jongwane̱ wa o do̱lisane̱ mo̱. Ombwa SINIMA, nde lo kwaleye pe̱ ońola myuedi mi mabupe̱.
-
O ni sinima, ońola nje nu mokwe̱ Bibe̱l a tano̱ a bwa bo̱ngo̱ o dubisabe̱ e?
-
Nje yongwane̱ mo̱ o bata lakisane̱ Yehova e?
Langa Yesaya 41:10, 13, nde lo kwaleye pe̱ ońola min myuedi:
-
Ońola nje weno̱ ná o be̱ mbaki ná o me̱nde̱ londise̱ kakane̱ o mabolano̱ ponda o mabake̱no̱ wame̱ne̱ na Yehova e?
7. Bata timbise̱le̱ masoma ońola ndol’a Yehova
O bengi te̱ dutea ońola ndolo ńe̱se̱ Yehova a be̱nedino̱ wa, o me̱nde̱ bata timbise̱le̱ mo̱ masoma o pula pe̱ bolea mo̱ o bwindea. Langa Myenge 40:6, nde lo kwaleye pe̱ ońola min myuedi:
-
Njika minam ma Yehova o to̱ndino̱ tobotobo e?
Muto̱ped’a mudī Yeremia a ta a to̱ndo̱ Yehova n’eyal’ao, a ta pe̱ muńe̱nge̱ jita ońola edube ya be̱ muboled’ao. A kwali ná: “Eyal’ango̱ e ta nde muńe̱nge̱ na mutam ma mulema mam, ońolana na belabe̱ dina lo̱ngo̱, a Yehova, Loba.” (Yeremia 15:16) Alabe̱ min myuedi:
-
Ońola nje be̱ la Mboṅ a Yehova leno̱ edub’a tobotobo e?
-
Mo̱ o mapula dubisabe̱ o be̱ Mboṅ a Yehova e?
-
Mo̱ lambo diwo̱ di meka wa ná o bole nika e?
-
O mo̱nge̱le̱ ná nje wangame̱nno̱ bola ná o we̱le̱ dubisabe̱ e?
BATO BA MAKWALA NÁ: “Na mabwa bo̱ngo̱ ná na si me̱nde̱ we̱le̱ londise̱ kakane̱ na mabolano̱ o pond’a dubise̱.”
-
Nika nde wa pe̱ o mo̱nge̱le̱no̱ e?
EBONGOLO
Na jongwane̱ la Yehova, we ná o buka mambo me̱se̱ mena me ná meka wa ná o dubisabe̱.
Ndimbisedi
-
Njika dime̱ne̱ la so̱ṅtane̱ la Bibe̱l wangame̱nno̱ be̱ne̱ obiana o madubisabe̱ e?
-
Njika mawengisan yeno̱ ná e pula ná o po̱nge obiana o madubisabe̱ e?
-
Ońola nje o s’angame̱nno̱ bwa bo̱ngo̱ o dubisabe̱ e?
BATA WASA
E̱ne̱ nje yangame̱n tute̱le̱ wa o no̱ngo̱ bedomsedi o dubisabe̱.
“Mo̱ we be̱be̱ ońola dubise̱ e?” (Njongo a Betatedi, So̱ṅe̱ 2020)
Okwa ne̱ni buka mitakisan mō̱ mena me ná meka wa ná o dubisabe̱.
“Nje e meke̱ mba o dubisabe̱ e?” (Njongo a Betatedi, So̱ṅe̱ 2019)
E̱ne̱ ne̱ni moto mō̱ a tongwe̱le̱no̱ o buka mitakisan minde̱ne̱ ná a dubisabe̱.
‘Ońola nje o masise̱le̱no̱ dubise̱ lo̱ngo̱ ombusa e?’ (1:10)
Moto mō̱ nu mabelabe̱ ná Ataa a se̱le̱ bwa bo̱ngo̱ o dubisabe̱. Nje e boli mo̱ mbaki ná a po̱nge di tanga la mweńa e?
