JOKWA 53
Ne̱ni longe̱le̱ ńolo o mbadi Yehova a do̱lisanno̱
Yehova e nde “Loba la bonam.” (1 Timoteo 1:11) A mapula ná di be̱ bonam, di bwane̱ pe̱ longe̱ muńe̱nge̱. E muńe̱nge̱ ke̱ di mano̱ngo̱ ponda o wumse̱. O din jokwa di me̱nde̱ je̱ne̱ ne̱ni jeno̱ ná di bolane̱ pond’asu ńa wumse̱ o mbadi ni mabwese̱ biso̱ muńe̱nge̱, nde e do̱lisane̱ pe̱ Yehova.
1. Nje di s’angame̱nno̱ dimbea ke̱ di mapo̱so̱ ne̱ni longe̱le̱ ńolo e?
Nje o to̱ndino̱ bola ke̱ o malonge̱le̱ ńolo e? Bato bō̱ ba to̱ndi ja o mboa o langa, senga musiki, jombwa sinima, to̱ po̱ngo̱ muwaso o inte̱rne̱t. Bane̱ pe̱ ba to̱ndi nde busa na mako̱m o wala o miyenga, ńo̱ye̱, to̱ joka bo̱l na maloko mape̱pe̱. E be̱ to̱ nje di mapo̱so̱no̱ o bola ke̱ di malonge̱le̱ ńolo, jangame̱n be̱ mbaki ná e “mado̱lisane̱ Sango.” (Efeso 5:10) Ye mweńa ná di so̱ṅtane̱ nika ebanja mbad’a longe̱le̱ ńolo jita ye we̱nge̱ i be̱n mambo Yehova a singe̱no̱, ka njo, musonje na jowe̱ la midī ma bobe. (Langa Myenge 11:5.) Nje e me̱nde̱ jongwane̱ biso̱ o po̱so̱ mbad’asu ya longe̱le̱ ńolo bwam e?
Yete̱na mako̱m masu ma to̱ndi Yehova, me ná ma tute̱le̱ biso̱ o be̱ne̱ bedangwedi ba bwam na o po̱so̱ mbad’a longe̱le̱ ńolo ya bwam. Ka nje te̱ je̱nno̱ o jokwa 48, “mudangwane̱ badibie̱ a matimba dibie̱.” Nde di ko̱lo̱ngo̱ne̱ te̱ o tombise̱ ponda na bato bena ba si to̱ndi bete̱sedi ba Loba, di “mańama.”—Minia 13:20.
2. Ońola nje di s’angame̱nno̱ tombise̱ ponda jita o longe̱le̱ ńolo e?
To̱ di po̱so̱ nde mbad’a longe̱le̱ ńolo ńe bwam, di no̱nge jangame̱ye̱ ná di si tombise̱ ponda jita oten. E titi te̱ nika, di si me̱nde̱ pe̱ be̱ne̱ ponda ndongo ońola bebolo ba mweńa. Bibe̱l e mome̱le̱ biso̱ ná di “bolane̱ ponda bwam.”—Langa Efeso 5:15, 16.
ALA O NJIBA
Okwa ne̱ni po̱so̱ mbad’ango̱ ya longe̱le̱ ńolo bwam.
3. Banga mbad’a longe̱le̱ ńolo ya bobe
Ońola nje jangame̱nno̱ po̱so̱ mbadi di malonge̱le̱no̱ ńolo bwam e? Ombwa SINIMA, nde lo kwaleye pe̱ ońola myuedi mi mabupe̱.
-
Njika bowan bwe oteten a maloko ma njo ma Roma ńa kwaṅ na mbad’a longe̱le̱ ńolo iwo̱ ya we̱nge̱ e?
-
Nje Danny okono̱ jombwea longe̱le̱ la ńolo e?
Langa Roma 12:9, nde lo kwaleye pe̱ ońola min myuedi:
-
Ne̱ni mun mwemba mweno̱ ná mongwane̱ wa o po̱so̱ mbad’a longe̱le̱ ńolo e?
Njika mambo mō̱ Yehova a singe̱no̱ e? Langa Minia 6:16, 17 na Galatia 5:19-21. Ombusa bolanga b’epas’a Bibe̱l te̱, kwalea ońola min myuedi:
-
Oteten a mambo ma tubabe̱ o min myemba, njika mo̱ ma me̱ne̱ne̱ jita o mbad’a longe̱le̱ ńolo ye we̱nge̱ e?
Ne̱ni po̱so̱ mbad’ango̱ ya longe̱le̱ ńolo bwam
Baise̱ wame̱ne̱ min myuedi:
-
Nje? Mo̱ ni mbad’a longe̱le̱ ńolo e be̱n lambo Yehova a singe̱no̱ e?
-
Njika ponda? Mo̱ e mano̱ngo̱ne̱ mba ponda nangame̱nno̱ tombise̱ o bebolo ba mweńa e?
-
Nja? Mo̱ e mabola ná na be̱ ponda ye̱se̱ na bato bena ba si to̱ndi Yehova e?
Ná di si kusa mbeu a ńolo, ye bwam di panda etum na nje ye ná e wana mo̱. Ońola nika nde jangame̱nno̱ panda etum na mbad’a longe̱le̱ ńolo ye̱se̱ di mo̱nge̱le̱no̱ ná i titi bwam ońol’asu
4. Bolane̱ pond’ango̱ bwam
Ombwa SINIMA, nde lo kwaleye pe̱ ońola myuedi mi mabupe̱.
-
Nu munasango a si ta ombwa to̱ lambo la bobe, nde nje e ta bobe o mbadi a tano̱ a bolane̱ pond’ao e?
Langa Filipi 1:10, nde lo kwaleye pe̱ ońola min myuedi:
-
Ne̱ni mun mwemba mweno̱ ná mongwane̱ biso̱ o te̱se̱ ponda di matombise̱no̱ o longe̱le̱ ńolo e?
5. Po̱so̱ mbad’a longe̱le̱ ńolo ya bwam
Yehova a si do̱lisane̱ mbad’a longe̱le̱ ńolo iwo̱, nde di be̱n jita lena le bwam. Langa Mulangwedi 8:15 na Filipi 4:8, nde lo kwaleye pe̱ ońola min myuedi:
-
Njika mbad’a longe̱le̱ ńolo ya bwam o to̱ndino̱ e?
O be̱n jita la mbad’a longe̱le̱ ńolo ya bwam
BATO BA MAKWALA NÁ: “Bobe to̱ bō̱ bo titi o longe̱le̱ ńolo na mambo ma be̱n njo, musonje to̱ jowe̱ la midī ma bobe, etum te̱ na si mabolano̱ ma mambo.”
-
O me̱nde̱ nde jalabe̱ ná nje e?
EBONGOLO
Yehova a mapula ná di po̱se mbad’a longe̱le̱ ńolo ya bwam, i mabwese̱ pe̱ biso̱ muńe̱nge̱.
Ndimbisedi
-
Njika mbad’a longe̱le̱ ńolo kriste̱n yangame̱nno̱ banga e?
-
Ońola nje jangame̱nno̱ no̱ngo̱ jangame̱ye̱ ońola ponda di matombise̱no̱ o longe̱le̱ ńolo e?
-
Ońola nje o mapulano̱ po̱so̱ mbad’a longe̱le̱ ńolo yena Yehova a do̱lisanno̱ e?
BATA WASA
Nja ńangame̱n po̱se̱ mbadi di malonge̱le̱no̱ ńolo e?
“Mo̱ o be̱n sinima, kalati to̱ myenge be Mboṅ a Yehova mbenda e?” (Tema o mulomba)
E̱ne̱ ne̱ni weno̱ ná o po̱so̱ mbad’a longe̱le̱ ńolo ya bwam.
“Ne̱ni longe̱le̱ ńolo o mbad’a bwam e?” (Njongo a Betatedi, Maye̱se̱ 15, 2011)
O myango mi be̱n tema ná “J’ai même surmonté mes préjugés,” e̱ne̱ ońola nje moto mō̱ a tukono̱ mbad’ao ńa longe̱le̱ ńolo.
“Bibe̱l e matukwa malonge̱” (Njongo a Betatedi, Ngo̱nde̱ 1, 2010)
E̱ne̱ ne̱ni ńango a bana mō̱ a no̱ngino̱ bedomsedi ba bwam jombwea sinima ni malee̱ ndimsi.
