JOKWA 58

Tika be̱ Yehova jemea

OKA

Kriste̱n ya mbale̱ i si mese̱le̱ ná lambo to̱ diwo̱ to̱ moto to̱ mō̱ ba ńamse̱ mulatako mabu na Yehova. Ye̱ke̱i te̱ be bedomsedi nde wa pe̱ o no̱ngino̱. Jemea lo̱ngo̱ le Yehova mweńa jita. (Langa 1 Myango 28:9.) O njika bete̱medi jemea lo̱ngo̱ leno̱ ná di be̱ o kekise̱ e? Ne̱ni pe̱ weno̱ ná o lembe̱ mo̱ e?

1. Ne̱ni bato bō̱ beno̱ ná ba we̱le̱ jemea lasu o kekise̱ e?

Bato bō̱ ba me̱nde̱ keka jeka biso̱ ná di si bolea pe̱ Yehova. Ba nja be ná ba bola nika e? Bō̱ be nde bato bena ba si maboleye̱ pe̱ Yehova, ba mato̱po̱ pe̱ mpoṅ jombwea bebokedi ba Loba o bwam ba ńamse̱ dube̱ lasu. Be nde bato ba to̱bi dube̱ la mbale̱. Bape̱pe̱ be nde badiedi ba bebasi bena ba macamane̱ mpoṅ jombwea biso̱, o bola ná ba bena ba titi jangwa bese̱le̱ mbale̱. Ye bobe o be̱ne̱ pend’a byala na bate̱nge̱ne̱ mbale̱, langa kalat’abu to̱ bekwali babu o inte̱rne̱t, wala o milomba mabu o inte̱rne̱t to̱ jombwa sinima yabu. Yesu a kwali ońola ba bena ba makeke̱ o ńamse̱ dube̱ la bane̱ ná: “Ese̱le̱ babo̱, be nde bato ba ndima ba madangwane̱ bandima. Nde yete̱na mot’a ndima a madangwane̱ ńandima, ke̱ babo̱ babane̱ ba mako̱ o ekukudu.”—Mateo 15:14.

2. Ne̱ni jemea lasu di me̱ne̱ne̱no̱ o bedomsedi di mano̱ngo̱no̱ e?

Ndolo di be̱nedino̱ Yehova e me̱nde̱ tute̱le̱ biso̱ o banga be̱ne̱ mulatako ná bambam n’ebasi e kwedi. Ebol’asu to̱ mambo mape̱pe̱ di mabolano̱ ba s’angame̱n be̱ne̱ mulatako to̱ mō̱ n’ebasi e kwedi. Yehova a mabaise̱ biso̱ ná: “Bińo̱ busa [o Babilon ninde̱ne̱], a tumba lam.”—Bebīsedi 18:2, 4.

ALA O NJIBA

Okwa ne̱ni weno̱ ná o banga ná to̱ moto a si bola ná o si be̱ pe̱ Yehova jemea, na ne̱ni busa o Babilon ninde̱ne̱.

3. No̱ngo̱ jangame̱ye̱ na balēdi ba mpoṅ

Nje jangame̱nno̱ bola yete̱na di sengi moto a makwala mambo ma bobe te̱nge̱ne̱ bebokedi ba Yehova e? Langa Minia 14:15, nde lo kwaleye pe̱ ońola min myuedi:

Ońola nje di s’angame̱nno̱ dube̱ nje ye̱se̱ di masengano̱ e?

Langa 2 Yohane 9-11, nde lo kwaleye pe̱ ońola min myuedi:

Njika bedangwedi jangame̱nno̱ be̱ne̱ o mbasan ma bato ba to̱bi dube̱ la mbale̱ e?
To̱ di si makwala nde na bato ba to̱bi dube̱ la mbale̱, ne̱ni belēdi babu beno̱ ná be po̱ye̱ biso̱ e?
O mo̱nge̱le̱ ná Yehova a me̱nde̱ nde senga ne̱ni yete̱na jemedi o senga mambo ma bobe ma makwalabe̱ te̱nge̱ne̱ mo̱ to̱ bebokedi bao e?

4. Be̱ Loba jemea ke̱ munasango a boli bobe

Nje jangame̱nno̱ bola yete̱na di bi ná elong’a mwemba e boli bobe bonde̱ne̱ e? Ná di bie nje bola, jombweye bete̱sedi be maso̱be̱ o mbenda Loba a bolino̱ Israel. Langa Levitiko 5:1.

Bupisane̱ yen epas’a Bibe̱l, di bi te̱ ná moto a boli bobe bonde̱ne̱, jangame̱n langwea batudu nje di bino̱. Nde obiana di mabola nika, ye bwam ná jome̱le̱ nu moto ná mo̱me̱ne̱ ale langwea batudu nje a bolino̱. A si boli te̱ nika, jangame̱n langwea batudu nje di bino̱, o lee̱le̱ ná je Yehova jemea. Ne̱ni bola la nika di malee̱le̱no̱ ndol’asu ńa jemea ońola . . .

Yehova Loba e?
moto nu boli bobe e?
bane̱ o mwemba e?

Yete̱na munasango a boli bobe, wasa o jongwane̱ mo̱!

5. Panda etum na Babilon ninde̱ne̱

Ombwa SINIMA.

SINIMA: Busa o Babilon ninde̱ne̱! (5:06)

Langa Lukas 4:8 na Bebīsedi 18:4, 5, nde walabe̱ pe̱ min myuedi:

Mo̱ na dia na maso̱ngo̱be̱le̱ ka elong’a ebasi e kwedi ewo̱ e?
Mo̱ ne o mwemba mwena mu be̱n mulatako n’ebasi epe̱pe̱ e?
Mo̱ ebol’am e masue̱le̱ ebasi e kwedi o nin mbadi to̱ nine̱ e?
Mo̱ na be̱n mambo mape̱pe̱ o longe̱ lam mena ma lati n’ebasi e kwedi e?
Nalabe̱ te̱ ná e to̱ e be̱ nde o myuedi mō̱, njika mawengisan nangame̱nno̱ po̱ngo̱ e?

To̱ e be̱ nde ne̱ni, no̱ngo̱ bedomsedi be madie̱ wa na doi la mulema di sangi, be malee̱ pe̱ ná we Yehova jemea.