Musinged’a Loba nunde̱ne̱ e nde Satan Diabolo. E nde eweked’a mudī e te̱m te̱nge̱ne̱ Yehova. Satan a dia a manane̱ Loba na wanea bato ba benama mitakisan minde̱ne̱. Satan e bobe. E nde mot’a lobango na mot’ebwán.​—Yohane 8:44.

Bewekedi bepe̱pe̱ ba mudī be lati na Satan o te̱me̱ te̱nge̱ne̱ Loba. Bibe̱l e mabele̱ babo̱ ná midī ma bobe. Ka Satan, midī ma bobe me nde basingedi ba bato ba benama. Mi to̱ndi bolane̱ bato bobe. (Mateo 9:32, 33 ; 12:22) Yehova a me̱nde̱ bumbise̱ Satan na midī mao ma bobe ngedi po̱ ońola ye̱se̱. Ba diane̱ nde son a ponda o takise̱ bato ba benama.​—Bebīsedi 12:12.

O mapula te̱ be̱ diko̱m la Loba, o s’angame̱n bola nje Satan a mapulano̱ ná o bole. Satan na midī ma bobe ba singe̱ Yehova. Be nde basingedi ba Loba, ba mapula pe̱ nde o timbise̱le̱ wa musinged’a Loba. Wangame̱n po̱so̱ nja o mapulano̱ bwese̱ muńe̱nge̱​—Satan nga Yehova. O mapulise̱ te̱ longe̱ la bwindea, wangame̱n po̱so̱ bola jemea la Loba. Satan a be̱n misomba na mangea jita o wo̱ndo̱ bato. Dongo dinde̱ne̱ la bato di malemsabe̱ na mo̱.​—Bebīsedi 12:9.