Yesu Kristo e nde Mun’a Yehova, name̱ne̱ pe̱ na diko̱m lao la ndolo la batabata. Oboso ná a mabe̱ moto o wase, Yesu a ta nde eweked’a mudī ya ngińa o mo̱ń (Yohane 17:5). Denge̱ a mapo̱ o wase o jokwe̱le̱ bato mbale̱ jombwea Loba (Yohane 18:37). A boli pe̱ so̱ longe̱ lao la mot’a benama o bwam ba sunga bato ba masengane̱ o bobe na kwedi (Roma 6:23). Yesu e we̱nge̱ Kiṅ’a Janea la Loba, bianedi ba mo̱ń be me̱nde̱ wane̱ Paradisi o nin wase.​—Bebīsedi 19:16.

Ange̱l pe̱ ye mako̱m ma Loba. Ange̱l i si se̱le̱ be̱ bato ba benama o wase. I wekabe̱ o mo̱ń oboso ná Loba a mapo̱ngo̱ wase. (Hiob 38:4-7) Ye lodun la ange̱l. (Daniel 7:10) Man mako̱m ma Loba ma mo̱ń ma mapula ná bato bokwe mbale̱ jombwea Yehova.​—Bebīsedi 14:6, 7.

Loba a be̱n pe̱ mako̱m o wase ; a mabele̱ babo̱ ná mboṅ ao. Mboṅ o mboko ma bekaisedi e mabīse̱ nje e bino̱ jombwea moto to̱ lambo. Mboṅ a Yehova i mabīse̱ bape̱pe̱ nje i bino̱ jombwea Yehova na mwano mao (Yesaya 43:10). Ka ange̱l, Mboṅ i mapula jongwane̱ wa o jokwa mbale̱ jombwea Yehova. I mapula ná wa pe̱ o be̱ diko̱m la Loba.