Mulatako ma diko̱m mu se̱medi nde omo̱ń a ndolo. Etum te̱ o mokwano̱ bia Yehova, ndol’ango̱ ońol’ao pe̱ e mabenga nde ńaka. Ná ndol’ango̱ ońola Loba e mańakano̱, ńo̱ng’ango̱ o bolea mo̱ pe̱ e mabenga ńaka. Nika e me̱nde̱ tute̱le̱ wa ná o timbe be̱ mokwed’a Yesu Kristo. (Mateo 28:19). Tongwea na no̱ngo̱ dongo na mbia mwe bonam ma Mboṅ a Yehova, we ná o bia mulatako ma diko̱m na Loba o bwindea. Nje wangame̱nno̱ so̱ bola e?

Wangame̱n lee̱ ná o to̱ndi Loba tongwea na sengane̱ mbend’ao. “Ninka nde ńe ndol’a Loba, ná di bupe̱ mbend’ao, nde mbend’ao i titi bwambi.”​—1 Yohane 5:3.

We̱le̱ nje o mokwano̱ o ebolo. Yesu a lango myango mena mi makike̱ nika. Mot’a jangwa a longi ndabo ao omo̱ń’a dale. Mot’elemā a longi ndabo ao omo̱ń’a mukoko. Mùdi munde̱ne̱ mu wungedino̱, ndabo ni longabe̱ omo̱ń a dale e si kwedi, nde ndabo ni longabe̱ omo̱ń a mukoko e kwedi na mumban munde̱ne̱. Yesu mo̱ ná ba ba masenge̱ belēdi bao nde ba bupe̱ mo̱ be nde ka nu mot’a jangwa nu longi omo̱ń a dale. Nde ba ba masenge̱ belēdi bao nde ba si bupe̱ mo̱ be nde ka nu mot’elemā nu longi omo̱ń a mukoko. O mapula nde be̱ ka njika moto e?​—Mateo 7:24-27.

 Bake̱ la ńolo. Nika e mapula nde o kwala ná o masisea Yehova be̱be̱ o muka na bīse̱ mo̱ ná o mapula londise̱ jemea lao bebe be̱se̱. Londise̱ la jemea la Loba di malee̱ ná we nde mokwed’a Yesu Kristo.​—Mateo 11:29.

Dubise̱. ‘Dubisabe̱,’ wowe myobe mongo tongwea na ‘bele̱ dina lao.’​—Bebolo 22:16.

No̱ngo̱ ngaban o bolea la Loba. Nje ye̱se̱ ‘lo mabolano̱, bola mo̱ na mulema, biana ońola Yehova, nde seto̱ ońola bato.’​—Kolose 3:23.