O be̱ diko̱m la Loba, e mapula ná wokwe bia mo̱. Mo̱ mako̱m mo̱ngo̱ ma bi dina lo̱ngo̱, ma mabolane̱ pe̱ mo̱ e? E. Loba pe̱ a mapula ná o bie dina lao na bolane̱ mo̱. Dina la Loba ná Yehova (Myenge 83:18; Mateo 6:9). Wangame̱n pe̱ o jokwa bia nje a to̱ndino̱ na nje a si to̱ndino̱. E mapula ná o bie ba nja be mako̱m mao na ba nja be basingedi bao. E mapula ponda o bia moto. Bibe̱l e makwala ná ye dibie̱ o janda ponda o jokwa bia Yehova.​—Efeso 5:15, 16.

Mako̱m ma Loba ma mabola nje e mabwese̱ mo̱ muńe̱nge̱. O̱nge̱le̱ mako̱m mo̱ngo̱. O mabongwa te̱ babo̱ bobe na bola pe̱ mambo ba singe̱no̱, ba matika be̱ mako̱m mo̱ngo̱ e? Ke̱m! Nika me̱ne̱ pe̱ nde, o mapula te̱ be̱ diko̱m la Loba, e mapula ná o bole nje e mabwese̱ mo̱ muńe̱nge̱.​—Yohane 4:24.

Seto̱ bebasi be̱se̱ nde be madie̱le̱ o mulato ma diko̱m na Loba. Yesu, ńena ńe diko̱m la batabata la Loba, a to̱pedi ońola mangea maba. Ngea po̱ e tindam, e londi pe̱ na bato. Ni ngea e malane̱ nde o dibumbe. Nine̱ ngea e salo, ngus’a bato pe̱ nde i madangwe̱ oten. Ni ngea e malane̱ nde o longe̱ la bwindea. Nika ńe nde ná o mapula te̱ be̱ diko̱m na Loba, wangame̱n jokwa mbadi ni te̱nge̱n o jowe̱ mo̱.​—Mateo 7:13, 14.