Paradisi e si me̱nde̱ be̱ ka mundi ma wase jeno̱ we̱nge̱. Loba a si ta a pula tōmtom ná wase e londe na mpungu na ndutu, sese na take. O mińa mi mapo̱, Loba a me̱nde̱ timbise̱le̱ wase paradisi. Paradisi e me̱nde̱ nde be̱ bowan ba nje e? Jombweye nje Bibe̱l e makwalano̱ :

Bato ba bwam. Paradisi e me̱nde̱ nde be̱ wum’a boja ya mako̱m ma Loba. Ba me̱nde̱ bolane̱le̱ mambo ma bwam mō̱ na nune̱. Ba me̱nde̱ dangwa bupisane̱ magea ma te̱m na sim ma Loba.​—Minia 2:21.

Tut’a da. O Paradisi, njai e si me̱nde̱ be̱. Bibe̱l e makwala ná: “Jita la mbumá [to̱, da] di me̱nde̱ be̱ o wase.”​—Myenge 72:16.

Mandabo ma bwam na ebolo e mabwesane̱ muńe̱nge̱. O paradisi, mbia te̱ mu me̱nde̱ be̱ne̱ mao manda. Moto te̱ a me̱nde̱ bola ebolo e malenee̱ mo̱ mutam ma mbale̱.​— Yesaya 65:21-23.

 Musango o wase ńe̱se̱. Bato ba si me̱nde̱ pe̱ jana to̱ wo̱ o bila. Eyal’a Loba e makwala ná : “[Loba] a mabo̱le̱ bila.”​—Myenge 46:8, 9.

Ja la bwam. Bibe̱l e makakane̱ ná: “To̱ moto [o Paradisi] a si me̱nde̱ pe̱ kwala na: ‘Na si jai bwam.’” (Yesaya 33:24) Na ná, to̱ moto a si me̱nde̱ be̱ m’bōko to̱ dima to̱ ndo̱ki to̱ mbuke.​—Yesaya 35:5, 6.

Su la sese, ndutu, na kwedi. Eyal’a Loba e makwala ná: “Kwedi e si me̱nde̱ pe̱ be̱, male̱bo to̱ musea to̱ sese ba si me̱nde̱ pe̱ be̱; ebanja mambo ma kwaṅ ma mańo̱ngo̱.”​—Bebīsedi 21:4.

Bato ba bobe ba májasumwe̱. Yehova a makakane̱ ná: “Ba bobe . . . ba me̱nde̱ sumwabe̱ o̱ wase ; ba itaba pe̱ bo̱so̱be̱ oten.”​—Minia 2:22.

Bato ba me̱nde̱ tondone̱ na bolane̱le̱ edube mō̱ na nune̱. Ka ni si te̱m na sim, mabandan, mukubo, to̱ bosinga ba si me̱nde̱ pe̱ be̱. Bato ba me̱nde̱ lata na bupe̱ mangea ma te̱m sim ma Loba.​—Yesaya 26:9.