Yehova a si me̱nde̱ jese̱le̱ ná bato ba bobe ba ńamse̱ Paradisi. Buka te̱ mako̱m mao nde ma mabe̱ oten. Nje e me̱nde̱ ko̱ye̱ bato ba bobe e? Ná o bie jalabe̱, ombwea myango ma mbale̱ ma Noa. Noa a ta longe̱ ya we̱nge̱ lokoli la mimbu. A ta nde mot’a bwam nu ta nu keka na iwiye̱ o londise̱ jemea la Yehova. Nde bane̱ bato o wase ba ta ba bola mambo ma bobe. Na Yehova a bīse̱ Noa ná A me̱nde̱ wana mpupe o ńamse̱ ba bato ba bobe be̱se̱. A bīse̱ Noa ná a longe elimbi ná mo̱me̱ne̱ na mbia mao ba si wo̱ o ponda Mpupe.​—Bebotedi 6:9-18.

Noa na mbia mao ba longi elimbi. Noa ome̱le̱ bato ná Mpupe mu mapo̱, nde ba si sengane̱ mo̱. Ba tiki nde bola mambo ma bobe. Ombusa bo̱le̱ longa elimbi, Noa inge̱le̱ byembe oteten a elimbi, na mo̱me̱ne̱ na mbia mao pe̱ ba so̱lo̱. Na Yehova a yo̱lise̱ mbua ninde̱ne̱. Mbua e yo̱le̱ 40 ma myese na 40 ma myulu. Madiba ma lo̱ise̱ wase ńe̱se̱.​—Bebotedi 7:7-12.

 Bato ba bobe ba bo̱lo̱ne̱ malonge̱ mabu, nde Noa na mbia mao ba sungabe̱. Yehova a we̱nge̱me̱ye̱ babo̱ wa o Mpupe nate̱na o wase ni sangisabe̱ na bobe. (Bebotedi 7:22, 23) Bibe̱l e makwala ná ponda e mapo̱ Yehova a me̱nde̱no̱ pe̱te̱ ńamse̱ ba ba si mapule̱ bole̱ nje ye bwam. Bato ba bwam ba si me̱nde̱ ńamsabe̱. Ba me̱nde̱ be̱ longe̱ o bwindea o wase ni timbisabe̱ Paradisi.​—2 Petro 2:5, 6, 9.

Bato jita we̱nge̱ ba mabola mambo ma bobe. Mundi ma wase mu londi na mpungu. Yehova a maloma Mboṅ ao nika na nika o jome̱le̱ bato, nde dongo dinde̱ne̱ di si mapula bupe̱ byala ba Yehova. Di si mapula wengisane̱ bedangwedi babu. Di si mapula kasa nje Loba a mabīse̱no̱ jombwea bwam na bobe. Nje e me̱nde̱ po̱ye̱ ban bato e? Ba me̱nde̱ tukwa buńa bō̱ e? Jita ba si me̱nde̱ tukwa tōmtom. Ponda e mapo̱ bato ba bobe ba me̱nde̱no̱ bumbisabe̱ ba si be̱ pe̱ longe̱ tōmtom.​—Myenge 92:7.

Wase e si me̱nde̱ bumbisabe̱ ; e me̱nde̱ timbisabe̱ paradisi. Ba ba matimbe̱ mako̱m ma Loba ba me̱nde̱ be̱ longe̱ o bwindea o wase ni timbisabe̱ Paradisi.​—Myenge 37:29.