O mapula te̱ be̱ diko̱m la Loba, wangame̱n bolea o ebasi Loba a do̱lisane̱no̱. Yesu a kwali ná “bowe̱ Loba ba mbale̱” ba me̱nde̱ jowe̱ mo̱ mwemba o “mbale̱.” (Yohane 4:23, 24) Mbadi ni te̱nge̱n po̱ buka te̱ nde ńe ńa jowe̱ Loba. (Efeso 4:4-6) Ebas’a mbale̱ e malane̱ o longe̱ la bwindea, ebasi e kwedi pe̱ e malane̱ o dibumbe.​—Mateo 7:13, 14.

We ná wemba ebas’a mbale̱ tongwea na bato ba maboleye̱ oten. Etum te̱ Yehova eno̱ bwam, ba bena be bautu bao ba mbale̱ bangame̱n be̱ bato ba bwam. Kaná bwele ba bepuma ba bwam bo mayano̱ bepuma ba bwam, ebas’a mbale̱ e malonga bato ba bwam.​—Mateo 7:15-20.

Mako̱m ma Yehova ma be̱ne̱di Bibe̱l edube ende̱ne̱. Ma bi ná Bibe̱l e wu nde na Loba. Ba m’ese̱le̱ ná nje e makwalano̱ e die̱le̱ malonge̱ mabu, e domse̱ bekwadi babu, na jongwane̱ pe̱ babo̱ o jokwa bia Loba. (2 Timoteo 3:16) Ba makeka o we̱le̱ nje ba malee̱no̱ o ebolo.

 Mako̱m ma Yehova ma maleane̱le̱ ndolo mō̱ na nune̱. Yesu a lee̱le̱ bato ndolo tongwea na jokwe̱le̱ babo̱ bia Loba, tongwea na bo̱lise̱ ba ba ta ba boa. Ba bena ba maboleye̱ ebas’a mbale̱ ba malee̱le̱ bape̱pe̱ ndolo. Ka Yesu, ba si mayaṅa ba bena be batuedi to̱ bena ba ben bede̱mo be diwengisan. Yesu a kwali ná bato ba me̱nde̱ jemba bokwedi bao tongwea na ndolo ba maleane̱le̱no̱ mō̱ na nune̱.​—Yohane 13:35.

Mako̱m ma Loba ma mabola dina la Loba, Yehova, edube. Moto a bangi te̱ bolane̱ dina lo̱ngo̱, mo̱ nu moto a mabe̱ diko̱m lo̱ngo̱ la batabata e? Ke̱m! Di be̱n te̱ diko̱m, di mabolane̱ dina lao na kwala pe̱ mambo ma bwam jombwea di diko̱m o boso ba bape̱pe̱. Ba ba mapule̱ be̱ mako̱m ma Loba bangame̱n so̱ bolane̱ dina lao na to̱pea pe̱ ońolao oboso ba bape̱pe̱. Yehova a mapula ná di bole nika.​—Mateo 6:9; Roma 10:13, 14.

Ka Yesu, mako̱m ma Loba ma mokwe̱le̱ bato jombwea Janea la Loba. Janea la Loba le nde bianedi ba mo̱ń be me̱nde̱ timbise̱le̱ wase paradisi. Mako̱m ma Loba ma mano̱ngo̱ dongo o min myango ma bwam ma Janea la Loba mwemba na bape̱pe̱.​—Mateo 24:14.

Mboṅ a Yehova i makeka ná i be̱ mako̱m ma Loba. I mabola Bibe̱l edube na be̱ne̱ye̱ pe̱ mō̱ na nune̱ ndolo. I mabolane̱ dina la Loba na bola pe̱ mo̱ edube, i mokwe̱le̱ pe̱ bape̱pe̱ jombwea Janea la Loba. O wase we̱nge̱, Mboṅ a Yehova i mabolea ebas’a mbale̱.