We ná wokwa bia Yehova tongwea na langa la bibe̱l. Ya etum a ponda we̱nge̱ Loba a to̱ti bato ba benama bō̱ o tila mo̱nge̱le̱ mao. Be betiledi be mabelabe̱ ná Bibe̱l. O we̱nge̱ di mokwa bia Loba tongwea na langa la Bibe̱l. Ońolana Bibe̱l e bambe̱ eyal’a Yehova, to̱ so̱ mwe̱ndi mao, e mabelabe̱ pe̱ ná Eyal’a Loba. Lena di dube̱ nje Bibe̱l e makwalano̱ ebanja Loba a si mato̱po̱ lobango tōmtom. “Loba a titi ná a to̱po̱ lobango.” (Bonahebe̱r 6:18) Eyal’a Loba ye mbale̱.​—Yohane 17:17.

Bibe̱l ńe nde jabea la Loba diwo̱ la ma mapeti tiki. Ńe nde ka leta la sango nu be̱nedi bana bao ndolo a lomno̱. E mabīse̱ biso̱ ońola dikaki la Loba o timbise̱le̱ wase wuma boja ya betańsedi​—Paradisi. E mabīse̱ biso̱ nje a bolino̱ o mińa mi tombi, nje a mabolano̱ we̱nge̱, na nje a me̱nde̱no̱ bola o mińa mi mapo̱ ońola bana bao ba jemea. E mongwane̱ pe̱ biso̱ o domse̱ bekwadi basu na be̱ pe̱ mutam.​—2 Timoteo 3:16, 17.

 Mboṅ a Yehova ye nde mako̱m ma Loba ; i me̱nde̱ jongwane̱ wa o so̱ṅtane̱ nje Bibe̱l e mokwe̱le̱no̱. Bīse̱ nde babo̱ buka te̱ ná o mapula jokwa Bibe̱l. Ba si ma baise̱ musawedi ońola nika (Mateo 10:8). O mo̱ń’a nika, we ná wukea o mako̱to̱ne̱ ma kriste̱n. Man ma maja nde o bepolo ba jowe̱ be mabelabe̱ ná Mandabo ma Janea. O m’ukea te̱ o mako̱to̱ne̱ ma kriste̱n, o mapomane̱ ńaka o so̱ṅtane̱ la Loba.

We ná wokwa bia Loba tongwea na mambo a wekino. Ka eyembilan, Bibe̱l e makwala ná: “Loba a weki mo̱ń na wase.” (Bebotedi 1:1) Niponda Loba a wekino̱ “mo̱ń”, a weki wei. Nje nika e mokwe̱le̱no̱ biso̱ jombwea Loba e? E mokwe̱le̱ biso̱ ná Loba a be̱n ngińa ninde̱ne̱. Mo̱me̱ne̱ mō̱ nde a dogame̱n po̱nge̱ lambo la ngińa ka wei. E mokwe̱le̱ pe̱ biso̱ ná Yehova e dibie̱, kana e mapulano̱ dibie̱ o lule̱ wei, yena i mabusise̱ mbidimbidi ma wea na mwe̱ne̱n, na yena i si madime̱ tōm.

Bewekedi ba Yehova be malee̱ ná a to̱ndi biso̱. Dutea te̱ ońola ńai a bepuma ye̱se̱ yena i maso̱be̱ o wase. Yehova a wusa pume̱le̱ ńai a bepuma po̱ buka te̱ ońol’asu​—to̱ si pume̱le̱ ńai to̱ po̱. O diwengisan, Yehova a boli biso̱ ńai a bepuma jita yena ye diwengisan o ebe̱yed’a je̱ne̱ne̱, bokola, muso̱no̱ na o mańe̱nguńe̱ngu. Nika e malee̱ ná Yehova e nde Loba lena di titi buka te̱ ndolo, nde di sangi pe̱ mulema jita, di maduteye̱ o boso ba ponda le pe̱ muyao.​—Myenge 104:24.