Satan a mapula ná o be̱ mot’a ngaṅ. Jita ba mabola bambambe̱ to̱ midī mabea o tata babo̱ mo̱me̱ne̱ na mbeu a ńolo. Ba mabola nde nika ońolana ba mabwa ngiń’a midī ma bobe bo̱ngo̱. Ba mabo̱to̱ lo̱ndo̱ to̱ mye̱ń ma myanga. Ba mańo̱ to̱ jo̱ko̱ “myanga” mena ba mo̱ngo̱le̱no̱ ná mi be̱n ngiń’a ndimsi. O mandabo mabu to̱ o mińangadu, bato bō̱ ba mapule̱ bema ba dube̱no̱ ná be be̱n ngiń’a betatedi. Bape̱pe̱ ba mabolane̱ “myanga” ma ndimsi ońolana ba dube̱ ná mi me̱nde̱ lenea babo̱ tombwane̱ o ńunga, makekise̱ m’esukudu, to̱ o muwaso ma ndolo.

Mpete̱ ma betatedi bo̱ngo̱ te̱nge̱ne̱ Satan mwe nde be̱ne̱ Yehova ka diko̱m lo̱ngo̱. Yehova Loba na ange̱l ao be ngińa etum jita buka Satan na midī mao ma bobe. (Yakobo 2:19 ; Bebīsedi 12:9) Yehova e musunga o lee̱le̱ ngiń’ao ońola mako̱m mao​—ba bena ba tingam na mo̱ o mususu mwe̱se̱.​—2 Myango 16:9.

Eyal’a Loba e makwala ná: “Lo sangame̱n bolane̱ ngambi.” Yehova a makokise̱ ngambi na lemba ońolana ben beboledi be ná be we̱le̱ moto owas’a ngiń’a Satan Diabolo mo̱me̱ne̱.​—Levitiko 19:26.