Mambo ma bobe ma mabolane̱ o wase we̱nge̱ ma malee̱ ná Paradisi ńe be̱be̱. Bibe̱l e kwali ná di me̱nde̱ je̱ne̱ mambo ma bedim oboso ná Paradisi e mapo̱. Lá nde o mi mińa we̱nge̱! Mambo mō̱ man Bibe̱l e kwalino̱ ná ma me̱nde̱ bolane̱:

Bila bende̱ne̱. “Tumba di me̱nde̱ te̱me̱ te̱nge̱ne̱ tumba, janea pe̱ te̱nge̱ne̱ janea.” (Mateo 24:7) Yen edinge̱ e málonda. Botea o mbu ma 1914, bila beba bende̱ne̱ ba wase ńe̱se̱ be májana nikame̱ne̱ pe̱ na jita la bila besadi. Lodun la bato lo wedi oten.

Diboa wuma na wuma. “Wuma na wuma te̱ maboa ma bobe” ma me̱nde̱ be̱. (Lukas 21:11) Mo̱ nika e málonda e? E. Diboa la ńambe, diboa la mulema, eyo̱so̱s’a njo̱, ngo̱’elolombe, SIDA [AIDS] na maboa mape̱pe̱ ma mábwa lodun la bato.

Pásá da. O wase ńe̱se̱ o be̱n bato ba si be̱n da o ńai ni dongame̱n. Lodun la bato lo mawo̱ na njai mbu te̱. Nika pe̱ ńe nde eyemban ná Paradisi e mapo̱ son a ponda. Bibe̱l e makwala ná : “Pásá da e me̱nde̱ be̱.”​—Marko 13:8.

 Soa la mińangadu. “Soa la mińangadu . . . di me̱nde̱ be̱ wuma na wuma te̱.” (Mateo 24:7) Nika pe̱ e málonda o nin pond’asu. Buka edun ewo ya bato e máwo̱ na soa la mińangadu botea o mbu ma 1914.

Bato ba bobe. Bato ba me̱nde̱ be̱ “bato̱nde̱ mo̱ni” na “bato̱nde̱ babo̱ mo̱me̱ne̱.” Ba me̱nde̱ be̱ “bato̱nde̱ beńe̱nge̱ buka Loba.” Bana ba me̱nde̱ be̱ “bapamwe̱ bayedi.” (2 Timoteo 3:1-5) O si dube̱ ná jita la nink’a bato ye we̱nge̱ e? Ba si be̱n edube to̱ ewo̱ ońola Loba, ba matakise̱ pe̱ ba bena ba makeke̱ o jokwa bia Loba.

Ebwan. “Muto̱nde̱ ma bula la mbenda” mu me̱nde̱ be̱ (Mateo 24:12). We pe̱ na o dube̱ ná bobe bo paki buka nje bo tano̱ mimbu we̱nge̱. O wuma te̱ be ná b’ībane̱ bato, ba wo̱ndo̱ babo̱, to̱ jeńse̱ babo̱ sese.

Man mambo me̱se̱ ma malee̱ ná Janea la Loba le be̱be̱. Bibe̱l e makwala ná: “Le̱n te̱ ná man ma nibolane̱, bia ná janea la Loba le be̱be̱.” (Lukas 21:31) Janea la Loba le nde nje e? Le nde bianedi ba mo̱ń ba Loba be me̱nde̱ wane̱ Paradisi o nin wase. Janea la Loba di me̱nde̱ timbane̱ bianedi ba bato ba benama.​—Daniel 2:44.