Bibe̱l e mato̱po̱ ońola mabe̱le̱ ma bato maba, be ná ba be̱n m’bē̱ ma sue̱le̱ mwemba. E mabele̱ babo̱ ná​—“bombwedi na baboledi.” (Filipi 1:1) We ná o be̱ne̱ babo̱ jita o myemba mō̱. Nje baboledi ba be̱nno̱ k’ebolo ońola bwam basu e?

Ba mongwane̱ batudu. To̱ ba be̱ beso̱mbe̱ to̱ ba kokwa mimbu, baboledi be nde bato bena be be̱be̱ na Yehova, bou pe̱ o mudī. Be nde bato ba be̱ne̱ne̱no̱ lakisane̱. Oteten a mwemba ba mabola ngusungus’a bebolo bena be mombweye̱ mwemba mwe̱se̱. Nika e mabola ná batudu ba bate jombwea tobotobo ebol’a belēdi na ya bombwedi.

Ba mabola ngusungus’a bebolo. Bō̱ ba be̱n nde ebol’a kasa bato be̱se̱ ba mukeye̱ o ndongame̱n. Bape̱pe̱ ba mombwea belongisan ońola besengedi, jabane̱ la kalati, ba maso̱nge̱le̱ mo̱ni mu bolabe̱ o elimb’a mabea ma wonja, na lee̱ pe̱ bepolo ońola dikalo. Ba mombwea pe̱ bosangi ba Ndabo a Janea. Batudu ba yo̱ki baise̱ babo̱ ná bongwane̱ bonasango ba mádune̱. To̱ e be̱ nde njik’ebolo e bolabe̱ babo̱, ba baboledi ba mabola mo̱ na muńe̱nge̱ esibe̱ mińakisan. Nika e mabola babo̱ edube.​—1 Timoteo 3:13.

Ba mabola eyembilan a bwam. Baboledi ba po̱so̱be̱ nde ońola bede̱mo babu ba mudī ba bwam. Ba mabola te̱ bekwali o ndongame̱n, nika e membe̱ dube̱ lasu. Ko̱d’abu o dikalo, e matute̱le̱ biso̱ o bupe̱ eyembilan abu. Ebol’abu ya bwam mulatako na batudu, e mabola ná di be̱ muńe̱nge̱, di late pe̱ o mudī. (Efeso 4:16) Na ponda, be ná ba po̱so̱be̱ ka batudu.

• Njik’ebolo baboledi ba mabolano̱ e?

• Nje ba mabolano̱ ońola bwam ba mwemba e?