Yesu a kwalane̱ bokwedi bao ná: “ese̱le̱ mwe̱ne̱n mańu mu pańe nikame̱ne̱ oboso ba bato, ná be̱ne̱ bebolo bańu ba bwam, nde ba sese pe̱ sango ańu ńe o mo̱ń.” (Mateo 5:16) Ońola nika nde di mabolane̱no̱ belongisan ba we̱nge̱ ka inte̱rne̱t. jw.org ńe nde mulomba masu mwembabe̱. Mu mabola beteledi ońola bebolo basu na nje di dube̱no̱. Nje weno̱ ná o so̱ oten e?

Malabe̱ ma Bibe̱l o myuedi bato ba ko̱lo̱ngo̱ne̱no̱ baise̱. Wená o kusa malabe̱ ma mom ma myuedi ma longe̱. K’eyembilan trakt i be̱n tema ná Ndenge̱ e me̱nde̱ bo̱ buńa bō̱ e? na Bawedi be pe̱te̱ ná ba timba be̱ longe̱ na mbale̱ e?, i mabola malabe̱ ma myuedi mutoba o buka na 800 ba leme̱. O mu mulomba we pe̱ ná o so̱ Bibe̱l ni belabe̱ ná Traduction du Monde Nouveau o buka na 160 leme̱, na kalati ońola jokwa la Bibe̱l ka Nje Bibe̱l e mokwe̱le̱no̱ biso̱ e?, nikame̱ne̱ pe̱ na kalat’asu ya mo̱di te̱ i belabe̱ ná Njongo a Betatedi na Umwe̱! We pe̱ ná o senga bolanga ba kalat’asu, to̱so̱ o songwa mo̱ o yin mbadi i bian ka MP3, PDF to̱so̱ EPUB. We pe̱ ná o busise̱ ma mapapa o to̱ njik’eyem’a bwambo moto a masengano̱. Sinima ya bwambo ba mbuke pe̱ ye oten. We ná o songwa sinima i se̱medi o Bibe̱l na myenge m’esese ma bwam.

Myango jombwea Mboṅ a Yehova. jw.org e be̱n pe̱ myango ma peńa na bedinge̱dinge̱ jombwea ebol’asu o mundi ma wase mwe̱se̱. O maso̱ pe̱ oten jongwane̱ di mawaneano̱ bato ndenge̱ e kweledino̱. We pe̱ ná we̱ne̱ oten kalenda ońola mako̱to̱ne̱ na bepolo bena mikanjo m’ebolo mi maso̱be̱no̱.

Na nika nde di mese̱le̱no̱ ná mwe̱ne̱n ma mbale̱ mu pańe nate̱na o matongo ma wase ńe̱se̱ na bam. To̱ njik’epolo moto a maso̱be̱no̱, to̱ e be̱ nde etum ne̱ni, e ná a tombwane̱ mi myango ma bwam. Mika masu me nde ná “eyal’a” Yehova e lańe o wase ńe̱se̱ na bam ońola edub’a Loba.​—2 Tesalonika 3:1.

• Ne̱ni jw.org e mongwane̱no̱ o so̱ mbale̱ ńe o Bibe̱l e?

• Nje o me̱nde̱no̱ to̱ndo̱ wasa o jw.org ńasu e?