Ongwane̱ basengedi bo̱ngo̱ o wasa babo̱me̱ne̱. Baise̱ myuedi mi matute̱le̱ moto o jalabe̱ o mulema mao ná wongwane̱ basengedi bo̱ngo̱ o wasa babo̱me̱ne̱, o bia mo̱nge̱le mabu ma njiba.

Tute̱le̱ basengedi o be̱ne̱ etute̱l’a mulema ya bwam. Lee̱ basengedi bo̱ngo̱ mweńa ma wasa njib’abu o bia ońola nje ba mabolano̱ bebolo ba bwam. Ongwane̱ babo̱ o be̱ne̱ etute̱l’a mulema e peti bwam, nika ńe nde ndol’a Yehova, ndol’a bato na ndol’a belēdi ba Bibe̱l. Bola nde ná basengedi bo̱ngo̱ ba dube̱ belēdi, o si sa babo̱. O mulopo ma bwese̱ babo̱ iso̱n, bola ná o su l’ekwal’ango̱ wembe̱ babo̱, o tute̱le̱ pe̱ babo̱ o keka me̱se̱ o bola nje ye bwam.

Bola ná be̱ne̱ nde Yehova. Bonde̱ ne̱ni belēdi, bete̱sedi na mambenda ma Bibe̱l ba mabīse̱no̱ bede̱mo ba Loba na ndolo a be̱nedino̱ biso̱. Ongwane̱ basengedi bo̱ngo̱ o bia jombwea ne̱ni Yehova a masengano̱ oteten ao ke̱ ba boli lambo, na o pula do̱lisane̱ mo̱.