Ńo̱ṅńe̱ la elong’a yadi le nde ede̱mo Loba a singe̱no̱, e matute̱le̱ moto o be̱ne̱ ebe̱yed’a to̱ndo̱ la mo̱me̱ne̱, e makwese̱ pe̱ mo̱nge̱le̱ mbindo. * Muńo̱ṅńe̱ elong’ao ya yadi e ná a kumwa je̱ne̱ bane̱ seto̱ ka bato ba benama nde​—ka belongisan ba bolane̱ o londise̱ ńo̱ng’a lata. Lata na moto di si mawa pe̱ na ndolo, di mabe̱ nde k’eboledi e mawane̱ muńe̱nge̱ ma son a ponda, na e malo̱ke̱ ńo̱ng’a lata. Nde di lo̱ko̱ la ńo̱ngi le nde la son a ponda. O mulopo ma bwa belongi ba ńolo jombwea “ka ni titi ko̱nji, mbindo, [na] mulema ma wadiwadi,” ńo̱ṅńe̱ la elong’a yadi di mawemse̱ nde be belongi.​—Kolose 3:5.

Ńamuloloma Paulo a tili ná: “A bandolo . . .  di sangise̱ mbindo asu ńe̱se̱ ń’eyobo na ńa mudī, na londise̱ bosangi mbom o bo̱ngo̱ ba Loba.” (2 Korinto 7:1) Yete̱na bupe̱ la man malea le wa ndutu, o si bo̱lo̱ne̱ dipita. Yehova a “le̱le̱me̱ o lakise̱”  na o jongwane̱ ponda ye̱se̱. (Myenge 86:5; Lukas 11:9-13) Nde, bekaisedi ba teten na miwe̱n mo̱ngo̱ o buka y’ede̱mo​—to̱ná yeno̱ ná e po̱ ná o ko̱ ponda iwo̱​—ba malee̱le̱ nde mo̱nge̱le̱ ma bwam o be̱nno̱. Ne̱nge̱ pe̱ o mulema ná “Loba a kolo buka mulema masu, a bi pe̱ mambo me̱se̱.” (1 Yohane 3:20) Loba a si me̱ne̱ buka te̱ myobe masu, nde mot’asu ńe̱se̱. Kana a bino̱ mambo me̱se̱ jombwea biso̱ e ná a bolane̱ nded’ao ńa mulema o senga njako asu. O si wo̱lo̱ so̱ o so̱so̱me̱ye̱ Loba na mbale̱ o muka na sibise̱ la ńolo, ka nje te̱ muna a makwalisane̱no̱ sango ke̱ a be̱n lambo di matakise̱ mo̱. Yehova a me̱nde̱ namse̱ wa, a bola wa doi la mulema di sangi. (Myenge 51:3-14, 19; Yesaya 1:18) Ye mbale̱ ná wangame̱ne̱ o bola bupisane̱ muka mo̱ngo̱. K’eyembilan, e mapula ná o we̱ o banga pat’a maye̱ ye̱se̱ nikame̱ne̱ pe̱ na mindenge ma bobe. *

Yete̱na o titi we̱le̱ buka ede̱mo a ńo̱ṅńe̱ elong’a yadi, son kwalisane̱ so̱ngo̱ to̱so̱ ńo̱ngo̱ ńe Kriste̱n to̱so̱ diko̱m le muyao na loú pe̱ o mudī. *​—Minia 1:8, 9; 1 Tesalonika 5:14; Tito 2:3-5.