BEBWEA ba mimbu obiana Israe̱l e mingea o Kanaan, Yehova a ta a kakane̱ mbot’a Abraham mu mundi. Tatánu so̱, owas’a bediedi ba Yosua, Bonaisrae̱l ba ta bā be̱be̱ o no̱ngo̱ Mundi ma Dikaki.

Loba a ta e̱ne̱ ná Bonakanaan bángame̱n dibumbe. Ba ta ba londise̱ mundi na njudud’a mbamba nikame̱ne̱ pe̱ na ebwan na njo. Ońola nika, mindi ma Kanaan Bonaisrae̱l ba tano̱ ba dumba mi ta mángame̱ne̱ bumbisabe̱ ná bam.

Obiana ba mingea o mundi, Yosua a loma pe̱pi ibā yena i jai o mundi ma Yeriko o mbo’a muto mō̱ nu ta nu belabe̱ ná Rahab. A kasa yi pe̱pi o mbo’ao a wuta babo̱, to̱ ná a tano̱ a bia ná ba ta nde Bonaisrae̱l. Rahab a ta a dube̱ Loba la Bonaisrae̱l, ońolana a ta a senga mambo Yehova a bolino̱ o sunga tumba lao. A bola ná yi pe̱pi i kane so̱ngo̱ ná i me̱nde̱ we̱nge̱le̱ mo̱ na ndabo ao.

Nipóndá Bonaisrae̱l bingedino̱ o Kanaan o janane̱ Yeriko, Yehova a boli ná bedima ba Yeriko be soseye o mbad’a betańsedi. Na milō̱ṅ ma Yosua mi sunga so̱lo̱ o mundi mi bumbise̱ mo̱, nde mi we̱nge̱le̱ Rahab na mbia mao. To̱ denge̱, o pambo a póndá ńa mbu mutoba má bila, Yosua á pomane̱ dumba bepasi bende̱ne̱ ba Mundi ma Dikaki. Ombusa nika mundi mwababe̱ oteten a matumba ma Israe̱l.

Ke̱ ā be̱be̱ na su l’ebol’ao, Yosua a ko̱te̱le̱ tumba. Ombwea pe̱te̱ na babo̱ mambo Yehova a boledino̱ bambambe̱ babu, a tute̱le̱ pe̱ babo̱ o bolea Yehova. Nde, Yosua na batudu bena ba boli ebolo na mo̱ ba wedino̱, Bonaisrae̱l bese̱le̱ bolea Yehova ba timba na maloba ma mpoṅ. O lambo ka 300 ba mbu, tumba di si sengane̱ Yehova o mbadi ni bam. Na Yehova ese̱le̱ ná basingedi ba Israe̱l, ka Bonafilistia ba bande babo̱ o ni pambo a póndá. Nde póndá Bonaisrae̱l ba báise̱no̱ Yehova jóngwane̱, a busise̱ bakaisedi o sunga babo̱, 12 o muso̱ngi mwe̱se̱.

Pambo a pónd’a Bakaisedi ni tilabe̱ o kalat’a Bakaisedi e mabotea nde na Otniel e suwea pe̱ na Simson mot’a ngiń’a mā nu buki be̱se̱ bena ba mabē̱ o longe̱. Mbale̱ ńe mǒm ni maso̱be̱ ngedi na ngedi te̱ o myango ma ńo̱ngi mi tilabe̱ o kalat’a Bakaisedi o Bibe̱l ńe nde ná: Sengane̱ bianedi bāsam ba Yehova be ma lenea minam si sengane̱ pe̱ dibumbe.

​—Nika e se̱medi o Yosua; Bakaisedi; Levitiko 18:24, 25.