OMBUSA mińa ma Simson, Samuel a boledi ka muto̱pe̱ bedinge̱ na mukaisedi o Israe̱l. Bonaisrae̱l ba ta ba tika báise̱ mo̱ ná ba mapula be̱ne̱ mot’a benama omo̱ń abu ka kiṅe̱, ka mane̱ matumba me̱se̱. To̱ná nin njako e tano̱ e lingise̱ Yehova, anedi Samuel ná a bole kana mpuli ma tumba. Na Loba a po̱so̱ Saul, mot’a sibise̱ la ńolo o be̱ kiṅe̱. Ombusa póndá, Kiṅe̱ Saul a timba be̱ kumba na pamo. Yehova a banga mo̱ ka kiṅe̱ a langwea Samuel ná a pose nipe̱pe̱, eso̱mb’a moto e belabe̱ ná David. Nde ombusa jita la mimbu nde David a timbino̱ tese̱be̱ kiṅe̱.

Ke̱ e ekoke̱l’a moto, David a ta āla pe̱pe̱le̱ bonasango bena ba ta ba bolea ka sonja mulo̱ṅ ma bila ma Saul. Muloṅ ma bila mwe̱se̱ mu ta musoa na bo̱ngo̱ ońol’a sonja po̱ ńa basingedi, elapat’a moto Goliat ńena nu ta nu tika kumwa babo̱ na Loba labu. Nde nika e ta e lingise̱ David, na mo̱ emea janane̱ y’elapat’a moto. Na ekoban, na ngus’a se̱nge̱ bukate̱ y’eso̱mb’a moto e busa janane̱ mute̱nge̱ne̱ mo̱ ńena nu ta bwaba ba lambo ka meta malalo. Goliat a yo̱ye̱no̱ mo̱, na David alabe̱ ná bewesan bao be buki ba Goliat, ońolana David, a mana nde o dina la Yehova Loba! David a bo Goliat na se̱nge̱ po̱ a ke̱ pe̱ y’elapat’a moto mulopo na po̱ a mo̱me̱ne̱. Wa nde miloṅ ma bila ma Bonafilistia mi ńi no̱ mila na bo̱ngo̱.

Saul a se̱le̱ nde ńakane̱ ngiń’a mulema ńa David na mo̱ a tese̱ mo̱ omo̱ń a miloṅ mao ma bila. Nde mabuka ma David ma bola Saul a timba be̱ne̱ njong’a ko̱di. Nika e pula ná David a ńe o sunga longe̱ lao, a ja ka ńa mbumwa póndá bwaba. To̱na nika David a tiki be̱ jemea na kiṅe̱ ni ta ni wasa bwa mo̱, na nin njo̱m ná Kiṅe̱ Saul a ta nde nu po̱so̱be̱ ńa Yehova Loba. O sukan, na Saul a wo̱ o bwemba. Ombusa póndá, David a tese̱be̱ kiṅe̱ kana Yehova a kakane̱no̱.

Kiṅe̱ David a ta a bwa ńo̱ngi ninde̱ne̱ o longea Yehova tempe̱l. Nde Yehova a ta a langwea David ná mun’ao mō̱ nde a me̱nde̱ bolē̱ nika. Salomo, mun’a David nde a timbi be̱ mo̱. To̱na nika David a kusane̱ Loba bowe̱n tongwea na male a ńo̱di no̱ na mo̱ ná: Ndabo Ao ńa mbia e me̱nde̱ busise̱ mulo̱ṅ ma kiṅe̱ i titi ka to̱ iwo̱ ipe̱pe̱. Nde di buki me̱se̱ pe̱, mu me̱nde̱ busise̱ Musungedi to̱so̱ Mbot’a dikaki ńa Eden. Nu nde a me̱nde̱ be̱ Mesia nika ńe nde ná “Ńo̱kisabe̱” Loba a po̱sino̱. Yehova a ta a kakane̱ ná Mesia a me̱nde̱ be̱ Mudiedi ńa Janea di si me̱nde̱ be̱ne̱ su.

David a soma Loba jita, na mo̱ a ko̱te̱le̱ jita la belongisan na madale ma tiki ońol’a ebol’a longa la tempe̱l. A lule̱ pe̱ myenge jita mi wu na Loba. Ke̱ ā o su la longe̱ lao David embi ná: “[Edi a] Yehova [e] mato̱po̱ o mudumbu mam, eyal’ao ye mba o bepopo.”​—2 Samuel 23:2.

​—Nika e se̱medi o 1 Samuel; 2 Samuel; 1 Myango; Yesaya 9:7; Mateo 21:9; Lukas 1:32; Yohane 7:42.