Yehova a maweka Adam na Eva a bola pe̱ ná ba be̱ longe̱ o bwindea o Paradisi. Satan a mato̱po̱ lobango te̱nge̱ne̱ Loba a pendane̱ pe̱ bwam Bao o die̱le̱. Adam na Eva ba mabupe̱ Satan, nika e wanedi babo̱me̱ne̱ na mbot’abu bobe na kwedi

Yehova a mabakwea bato ba pamo mbako a makakane̱ pe̱ ná Musungedi, to̱so̱ Mbota, e me̱nde̱ po̱ ńena ni me̱nde̱ dakeyē̱ Satan, e bo̱le̱ nje ye̱se̱ pamo na bobe ba wanno̱

Yehova a makakane̱ Abraham na David ná ba me̱nde̱ be̱ bambambe̱ ba Mbota, to̱so̱ Mesia, ńená nu me̱nde̱ die̱le̱ ka Kiṅe̱ o bwindea

Yehova a mabolane̱ bato̱pe̱ bedinge̱ o se̱le̱ bīse̱ ná Mesia a me̱nde̱ bo̱le̱ bobe na kwedi. A me̱nde̱ janea mwemba na bape̱pe̱ ka Kiṅ’a Janea la Loba, lena di me̱nde̱ bo̱lē̱, bila, maboa na kwedi

Yehova a maloma Mun’ao o wase a malee̱ pe̱ ná Yesu nde e Mesia. Yesu a mate̱ dikalo la Janea la Loba a mabola pe̱ longe̱ lao ka jabea. Ombusa póndá, Yehova a mapumbwe̱le̱ mo̱ na ńol’a edi

Yehova a mate̱se̱ Mun’ao Kiṅe̱ o mo̱ń, nika e ma maka bebotedi ba mińa misukan ma yen ebe̱yed’a mambo. Yesu a madie̱le̱ bókwedi bao etum te̱ ba mate̱no̱ dikalo la Janea la Loba o wase ńe̱se̱

Yehova a mabola Mun’ao bediedi o wana bete̱sedi ba Janea o wase. Janea di mańo̱so̱ manea ma bobe me̱se̱, di bokise̱ Paradisi, di bola ná bato ba jemea ba timbe be̱ ná ke̱nge̱nge̱. Yehova a lingedi bwam bao ba die̱le̱ a sangise̱ pe̱ dina lao o bwindea.