Janea la Loba di boki nde o mo̱ń. Loba a me̱nde̱ o bolane̱ mo̱ o ńo̱so̱ mane̱ manea me̱se̱ ná jemea lao di bolane̱ o mo̱ń na o wase. Nika ńe nde myango ma bwam ná Loba a mabolane̱ Janea lao o ni mbadi! Son a ponda di me̱nde̱ londise̱ ńo̱ng’a janea la bwam moto a be̱nno̱, na bola pe̱ ná bato ba be̱ mulatako o wase ńe̱se̱.​—Langa Daniel 2:44; Mateo 6:9, 10; 24:14.

Janea di titina di be̱ esibe̱ kiṅe̱. Yehova a po̱si so̱ Mun’ao, Yesu Kristo, ná a be̱ Kiṅ’a Janea Lao.​—Langa Bebīsedi 11:15.

Ombwa sinima Mo̱ Janea la Loba Le nde Nje e?

Mun’a Loba nde e Kiṅe̱ ńangame̱n ońolana e muyao, a malingea pe̱ te̱me̱ la sim. (Mateo 11:28-30) Yesu a be̱n ngińa ni dongame̱n o jongwane̱ bato ońolana a me̱nde̱ o janea wase ńe̱se̱. Ombusa bepumbwedi bao, ondedi o mo̱ń na mo̱ a ja o jenge̱le̱ o dia la mom la Yehova. (Bonahebe̱r 10:12, 13) Ponda e po̱ino̱, na Loba a bola mo̱ ngińa ná a boteye o janea.​—Langa Daniel 7:13, 14.

Dibo̱to̱ la bato di belabe̱ ná “basangedi” di me̱nde̱ o janea o mo̱ń na Yesu. (Daniel 7:27) Basangedi baboso bena ba po̱so̱be̱ ba ta nde bamuloloma ba jemea ba Yesu. O min mińa masu, Yehova a bati o mu muso̱ngi bome na bito bape̱pe̱ ba jemea. Ba me̱nde̱ o pumbwa na ńol’a mudī, mulemlem ka Yesu.​—Langa Yohane 14:1-3; 1 Korinto 15:42-44.

 Bato baninga ba me̱nde̱ o wale̱ o mo̱ń e? Yesu a bele̱ babo̱ ná “dibemba disadi.” (Lukas 12:32) Muso̱ngi mabu mwe nde 144 000. Ba me̱nde̱ o janea wase mwemba na Yesu.​—Langa Bebīsedi 14:1.

Janea la Loba di no̱ngi nde boja o mbu 1914. * Lambo laboso Yesu a bolino̱ ka Kiṅe̱ di ta nde ná, a pimbi Satan na midī mao ma bobe o wase. ’Wa nde Satan ońno̱ na malinga na mo̱ a wana mpungu munde̱ne̱ o wase. (Bebīsedi 12:7-10, 12) Take ńa mbel’a moto e bati bonde̱ne̱ botea ni ponda. Bila, njai, maboa ma malańe̱, soa la mińangadu be nde dongo diwo̱ la mambo mena ma longi “eyemban” e malee̱le̱ ná son a ponda di Janea di mabotea o die̱le̱ wase.​—Langa Lukas 21:7, 10, 11, 31.

Tongwea na dikalo le o te̱be̱ o wase ńe̱se̱, Janea la Loba le o ko̱te̱le̱ dimuti dinde̱ne̱ la bato ba matumba me̱se̱ bena be mulatako. Lodun la bato ba sibise̱ ńolo be o we̱le̱ babo̱me̱ne̱ owas’a bediedi ba Janea la Loba. Di me̱nde̱ o tata babo̱ ni ponda di me̱nde̱no̱ po̱ o bo̱le̱ ebe̱yed’a mambo ma bobe ma nin wase. Ońola nika so̱, be̱se̱ ba mapule̱ o tombwane̱ minam ma di Janea, bangame̱ne̱ o jokwa be̱ sengane̱ na sibise̱ pe̱ babo̱me̱ne̱ owas’a bediedi ba Yesu.​—Langa Bebīsedi 7:9, 14, 16, 17.

O pambo a ponda ńa 1 000 mbu, di Janea di me̱nde̱ o londise̱ mwano ma Loba ma bebaedi ońol’a mbel’a moto. Wase ńe̱se̱ so̱ e me̱nde̱ o timba paradisi. O ponda ńangame̱n, Yesu a me̱nde̱ bake̱ Sango ao Janea. (1 Korinto 15:24-26) Mo̱, nja weno̱ ná o to̱ndo̱ langwea myango ma bwam jombwea Janea la Loba e?​—Langa Myenge 37:10, 11, 29.