Ońola ba bena ba to̱ndi Yehova Loba na Eyal’ao, Bibe̱l:

Yesu a kwali ná: “Lo me̱nde̱ bia mbale̱, nde mbale̱ e me̱nde̱ timbise̱ bińo̱ wonja.” (Yohane 8:32) O̱nge̱le̱ te̱ ne̱ni o sengino̱ ponda o so̱ino̱ mbale̱ o Bibe̱l! Nik’e ta muńe̱nge̱ munde̱ne̱ o bia ná o nin was’a mpoṅ, je ná jokwa mbale̱.​—2 Timoteo 3:1.

Yehova Loba a mapula ná di bie mbale̱. Kana di to̱ndino̱ bato, biso̱ pe̱ di mapula bīse̱ babo̱ mo̱. Nde nika e si dongame̱n. Jangame̱n bola me̱se̱ ná bedangwedi basu be be̱ nde ba kriste̱n, ońolana di dube̱ bete̱sedi ba Yehova. Yesu a teleye̱ mbad’a mweńa po̱ jeno̱ ná di lee̱le̱ Loba ná di to̱ndi mo̱. Mo̱ ná: “Lo mane̱nge̱ te̱ mbend’am, ke̱ lo maja o ndol’am, kana mba na tano̱ na ne̱nge̱ mbend’a Tete̱, nde na ja o ndol’ao.”​—Yohane 15:10.

Yesu a to̱ndi Sango na mbale̱, a mabola pe̱ nje ye̱se̱ Sango a mabaise̱no̱ mo̱. Jembilane̱ te̱ Yesu o mbad’a die̱le̱ longe̱ lasu, Yehova a mato̱ndo̱ biso̱, biso̱ pe̱ di be̱ bonam na mbale̱. Ka nje te̱ Yesu a kwalino̱, “lo bi te̱ nika, bonam na bińo̱, ke̱ lo mabola mo̱.”​—Yohane 13:17.

Di masome̱le̱ wa ná nin kalati ńongwane̱ wa o bia die̱le̱ longe̱ lo̱ngo̱ kaponda mbale̱ ńe o Bibe̱l, nde o be̱ pe̱ diko̱m na Loba. Muka masu mwe nde ná o benge koka o ndol’ango̱ na Loba, o tingame̱ pe̱ na “ndol’a Loba . . . ońola longe̱ la bwindea.”​—Yuda 21.