LOBA LA NGUM nde e Sango a ngo̱nde̱. Longe̱ lasu, la nin we̱nge̱ na mińa maye̱, di se̱medi nde omo̱ń ao. A dongame̱n o bola biso̱ bowe̱n to̱ o ko̱kise̱ biso̱. A dongame̱n o bola longe̱ na o sumwa mo̱. Di do̱lisane̱ te̱ mo̱, di me̱nde̱ tombwane̱; nde di si do̱lisane̱ te̱ mo̱, e mabe̱ biso̱ bobe. E se̱ mweńa yeno̱ ná jowe̱ lasu di be̱ ńai ni makasabe̱ na mo̱!

Bato ba be̱n ńai a mowe̱ jita. Jowe̱ le nde ka ngea; nde mangea ma mowe̱ me̱se̱ ma do̱lisane̱ Loba e? Ke̱m. Yesu, muto̱ped’a mudī ńa Loba, a lee̱ ná ngea ye nde iba buka te̱. Mo̱ ná: “Mùna mu kolo, ngea pe̱ e tindam ni malane̱ o dibumbe; nde ba ba madangwe̱ oten be jita. Nde mùna mu salo, ngea pe̱ e walame̱n ni malane̱ o longe̱; nde ngusu nde i ma so̱ mo̱.”—Mateo 7:13, 14.

Ńai a mowe̱ iba buka te̱ nde ye: di di malane̱ o longe̱ na di di malane̱ o dibumbe. Janda la nin kalati le nde o jongwane̱ wa ná o so̱ ngea ni malane̱ o longe̱ la bwindea.