Dongo 1
Bebasi Be̱se̱ Be Mokwe̱le̱ Mbale̱ e?
1. Njika bebasi bō̱ be o Afrika e?
BE̱BE̱ na moto te̱ o Afrika a memea ná ye mweńa o jowe̱ Loba. Nde, jalatane̱ la mo̱nge̱le̱ le bosadi jombwea ne̱ni jowe̱ mo̱. Bato bō̱ ba mowe̱ o ndabo a jowe̱ ńa bawusa, bane̱ pe̱ o wum’a jowe̱ ya dimbambe̱. Nde bape̱pe̱ pe̱ ba mayenga o ndabo a ebasi. Nde e me̱nde̱ nde be̱ diwuse̱ o bolane̱ mo̱nge̱le̱ ná mowe̱ me nde malalo buka te̱ o Afrika. O teten a Ebas’a Bawusa mo̱me̱ne̱, mambenda na madube̱ me diwengisan. Mowe̱ ma dimbambe̱ pe̱ me diwengisan jita bupisane̱ bekombo. Na oteten a bonabebasi ba Kristo, siso̱ntane̱le̱ dinde̱ne̱ le. O tindi te̱ ben bebasi bende̱ne̱ be biane̱, o be̱n bebwea ba bebasi ba peńa be diwengisan o Afrika ńe̱se̱.
Dube̱ Lasu Langame̱ne̱ Se̱mea Omo̱ń a Mbale̱
2. (a) Nje e yo̱ki dute̱ moto o nje e mombweye̱ jowe̱ e? (b) Nje e si mabamse̱ ná ebas’asu e mabwese̱ Loba muńe̱nge̱ e?
2 Ońola njika njo̱m bato te̱ ba mowe̱no̱ o ńabu mbadi e? Ońola ná dongo dinde̱ne̱ la bato di mabupe̱ nde jowe̱ la basango babu. Na ná mambo ma tombi kwaṅ pe̱ ma be̱n ngińa omoń a bebasi bato ba mabupe̱no̱ we̱nge̱. Nin kalati ni be̱n mulopo ná The Africans—A Triple Heritage e mabīse̱ ná: “Ebas’a Bawusa e lań nde o pongo a Sahara tongwea na bila, . . . Dube̱ la Kristo pe̱ di lań nde o mikondo ma Sahara na ni mbadi me̱ne̱. O pongo a Sahara Ebas’a Bawusa e lań nde na nin mbadi ná o semedi te̱ di dube̱ o mabwabe̱ na njombe; o mikondo ma Sahara pe̱, dube̱ la Kristo di lań nde na nin mbadi ná o bangi te̱ di jowe̱ o mabwabe̱ na ngadi.” O mo̱ń a nika, dongo dinde̱ne̱ lasu di mo̱nge̱le̱ ná jowe̱ lasu di mabwese̱ Loba muńe̱nge̱. Nde jowe̱ di titi la mbale̱ buka te̱ ońola ná le nde la basango basu to̱ so̱ ońola ná ekombo a ngińa e ńakisane̱ mo̱ bambabe̱ basu.
3-5. Njika elangisan e mongwane̱ biso̱ o so̱ṅtane̱ ná seto̱ bebasi be̱se̱ nde be malee̱ mbale̱ e?
3 To̱ na ne̱ni bebasi be̱se̱ be mo̱nge̱le̱no̱ o bola bediedi ba mbaki jombwea bolea la Loba, belēdi babu be diwengisan. Be malee̱ mambo jita me diwengisan jombwea nja Loba eno̱ na nje a mengane̱no̱ biso̱. Dutea te̱ jombwea ninka ná: Ka eyembilan, o botedi ebolo o diyo dinde̱ne̱ diwo̱. Buńa baboso b’ebolo, woko ná mwaned’a diyo a no̱ngi wumse̱. Na wa o baise̱ baboledi balalo nje wangame̱ne̱no̱ bola. Muboled’a boso mo̱ ná mwaned’a diyo a mengane̱ nde wa ná o tute was’a ndabo. Nu londe̱ baba mo̱ ná wangame̱n nde pena bolongi. Nu londe̱ balalo mo̱ na wa ná wabane̱ bato maleta.
4 Nika e tombino̱, na wa o baise̱ baboledi myuedi jombwea mwaned’a diyo. Ńaboso mo̱ ná mwaned’a diyo a be̱n mute̱, e eso̱mbe̱, ambi pe̱ moto. Nu londe̱ baba mo̱ ná a wuto mute̱, a duna, nde a be̱ pe̱ muyao. Nu londe̱ balalo mo̱ na wa ná mwaned’a diyo a titi to̱ mome mo̱me̱ne̱—mwaned’a diyo e nde muto. Ye̱ke̱ite̱, o mapo̱ o din sontane̱ ná ban baboledi balalo ba titi to̱po̱ mbale̱. O mapula te̱ kombe̱ ebol’ango̱ ya peńa, ke̱ o mawase̱le̱ o pula bia ná te̱ite̱i nja mwaned’a diyo eno̱ na mbale̱ na nje a mengane̱no̱ wa.
5 Ye nde mulemlem na jowe̱. Ońola ná mo̱nge̱le̱ ma tombise̱ jita jombwea nja Loba eno̱ na nje a mengane̱no̱ biso̱, e mapula ná di be̱ mbaki ná mbadi di mowe̱no̱ ńe mulatako na mbale̱. Nde ne̱ni jeno̱ ná jokwa mbale̱ jombwea Loba e?
