MITAKA ma jita mi matapa pe̱ na bowe̱ Loba. Mutiled’a kalat’a Myenge mō̱ a kwali ná “mitaka ma jita” me oteten ao. (Myenge 94:19) Yesu pe̱ a bati ná, o masu ma ponda, “mitaka ma longe̱” mi me̱nde̱ o jeka bato ná bowe̱ Loba. (Lukas 21:34) Wa pe̱ so̱ e? O ńo̱sedi nde na si be̱ne̱ la bekusedi, nga bekwali oteten a mbia, nga maboa e? Ne̱ni Yehova eno̱ ná ongwane̱ wa o lembe̱ e?

Nu nube̱n mitaka ma jita a titina anane̱ mo̱ mo̱me̱ne̱ mō̱. Ńamuloloma Paulo a tili ná “jendedi na ndutu wuma ye̱se̱.” A bata pe̱ ná: “Je o mańaka . . . , di kwesabe̱ wase.” Nde a kwali pe̱ ná: “di si mańo̱so̱be̱,” “seto̱ mańaka ma bo̱le̱,” “di si bwabe̱.” Nje so̱ e mongwane̱ biso̱ o we̱lisane̱ e? “Ngińa ni pakapakan,” nika ná ngińa ni mawe̱ nde na Yehova, Loba la ngum.—2 Korinto 4:7-9.

Dutea te̱ o ponda ni tombi ke̱ o makusa “ngińa ni pakapakan.” Mo̱, o dia o mo̱nge̱le̱ ne̱ni ekwali ewo̱ o ndongame̱n yongwane̱no̱ wa o so̱ṅtane̱ bwambwam ndol’a Yehova ni tingame̱ po̱ko̱po̱ko̱ e? E titi mbale̱ ná, dube̱ lo̱ngo̱ la makaki ma Yehova di ńaki ke̱ o mokwe̱le̱ bane̱ mambo jombwea dipita la Paradisi e? Jukea o mako̱to̱ne̱ na no̱ngo̱ dongo oten di mongwane̱ o we̱lisane̱ mitaka ma jita na o kusa musango ma mulema ná di boleye Yehova na muńe̱nge̱.

O ka mbale̱, wená wo̱nge̱le ná wepame̱ múdi na múdi. K’eyembilan, Yehova a mabaise̱ biso̱ ná di se̱le̱ nde o pulise̱ Janea Lao, na ná di benge o jukea o ndongame̱n, di te̱ dikalo na langa pe̱ Bibe̱l. (Mateo 6:33; Lukas 13:24) Jate̱nge̱ne̱, si ja la bwam na bekwali ba mbia bena be wo̱lise̱ wa. To̱so̱ ebol’ango̱ e no̱ngo̱ne̱ wa ponda na ngudi bena bangame̱n ońola mwemba. Wena wo̱nge̱le̱ ná o lo̱isabe̱ oteten a man mambo me̱se̱ nde o si be̱ne̱ to̱ son a ponda to̱ ngudi o jana. Ponda po̱ wena o baise̱ wame̱ne̱ nga Yehova a mengane̱ wa buka nje weno̱ ná o bola.

Yehova a maso̱ṅtane̱ wa. A si mengane̱ biso̱ nje di titino̱ ná di bola. A memba pe̱ ná e mapula biso̱ ponda jita ná di je bwam ke̱ teten asu e maboa.—Myenge 103:13, 14.

Ombwea te̱ eyembilan a muto̱ped’a mudī Elia. Ponda mulema mu yukino̱ mo̱, a bo bo̱ngo̱, a ńa mīla o eyaṅ. Mo̱, Yehova a sai mo̱, to̱so̱ a boli mo̱ o̱da ná a timbe ná pe̱mpe̱m e? Ke̱m. Ngedi iba, Yehova a lom ange̱l ná e wemse̱ mo̱ o iyo̱ ná a de da. To̱na nika, ombusa 40 ma mińa, Elia a ta a dia a mataka, a bwa pe̱ bo̱ngo̱. Nje Yehova a batino̱ o bola ná ongwane̱ mo̱ e? Laboso, a lee̱ mo̱ ná ena a tata mo̱. Di londe̱ maba, Yehova a lo̱ki mo̱ na doi lao, “son a mumban ma mwē̱.” O sukan, Yehova a bīse̱ mo̱ ná lokoli na lokoli la bowe̱ mo̱ ba jemea bape̱pe̱ ba dia longe̱. ‘Wa  nde Elia a kusino̱ pe̱te̱ ngudi ka muto̱ped’a mudī ńa ko̱di. (1 Kiṅe̱ 19:1-19) Njika belēdi be oten e? Ponda ndutu e tano̱ e buka Elia, Yehova a bolane̱ we̱lisane̱ na nded’ao o sabangane̱ mo̱. Yehova a si tuko. A mombwea biso̱ o mulemlem ma mbadi.

O̱nge̱le̱ ná we nde ná o bolea Yehova bupisane̱ ngud’ango̱. O si langisane̱ nje o tano̱ o be̱ne̱ ngudi o bola kie̱le̱ ni tombi na nje weno̱ ná o bola we̱nge̱. Di no̱nge te̱ eyembilan: Muńe̱ o pembisan a mīla embe̱ te̱ mīla mo̱di to̱ mimbu, a titina a timba o pembisan esibe̱ boṅsane̱ mo̱me̱ne̱. A mabotea nde son na son ná embe̱ ńolo, a be̱ pe̱ ńai ni mawe̱lisane̱ mīla. Kriste̱n ye nde ka bańe̱ mīla ba maboṅsane̱ babo̱me̱ne̱ na janda. (1 Korinto 9:24-27) Ońola nje o si mabolano̱ ka muna nu maboteye lo̱ndo̱ na ngonda e? Wená o botea na jukea o ndongame̱n. So̱so̱me̱ye̱ Yehova ná ongwane̱ wa ná o we̱le̱ bola nika. Nika o me̱nde̱no̱ o jembise̱ wame̱ne̱, nika pe̱ nde o me̱nde̱no̱ ‘keka na je̱ne̱ ne̱ni Yehova eno̱ bwam.’ (Myenge 34:9) O̱nge̱le̱ ná to̱ njika lambo o bolino̱ o lee̱le̱ Yehova ndol’ango̱, le mo̱ tiki to̱ di be̱ nde son ne̱ni.—Lukas 21:1-4.

Ne̱ni Yehova a bolino̱ pe̱te̱ Yunea ngudi e? Mo̱ ná: “Na bengi kane̱ Yehova na baise̱ mo̱ jongwane̱. ‘Wa nde mukoa mam mu langwedino̱ mba ná jako̱to̱ne̱ diwo̱ dinde̱ne̱ le o mundi. Na mba na no̱ngo̱ bedomsedi ná na mukea buńa bō̱. A se̱ besengedi ba mulema ba bwam na sengino̱ ponda na timbino̱ oteten a tumba la Yehova! Di jako̱to̱ne̱ di ta nde etute̱le̱ na tano̱ nenge̱le̱. O nin we̱nge̱ ne muńe̱nge̱ o bolea pe̱te̱ Yehova. Longe̱ lam di be̱n janda tatan. Na timbi so̱ o so̱ṅtane̱ ná na be̱n ńo̱ng’a bonasango am na bonańango am, na be̱n pe̱ ńo̱ng’a jongwane̱ labu. Na som ná na pomane̱ pe̱te̱ timba na babo̱ ke̱ ponda e dia.”