A mwenj’asu ńa ndolo o dube̱:

Ka ne̱ni te̱ o bino̱, Bibe̱l ńe nde kalati ni mato̱peye̱ jita ońola bato ba benama. Jita labu di ta nde bome na bito ba jemea bena ba kusi milemlem ma makekisan ka biso̱. Ba ta nde ba be̱ne̱ besengedi ba mulema “ka biso̱.” (Yakobo 5:17) Mitaka ma jita mi ta mi banda bō̱. Bane̱ pe̱ ba ta ba ke̱be̱ bebango o mulema na belongi babu ba mbia to̱so̱ na bonasango o dube̱. Bape̱pe̱ pe̱ ba ńo̱so̱be̱ na iso̱n ońola mawuse̱ mabu ma babo̱me̱ne̱.

Nde ińai a pat’a bato i pawe̱ na Yehova na bambam e? Ke̱m. Jita ba ta nde ka mutiled’a kalat’a myenge nu kane̱ ná: “Na pambilan ka mudo̱ngi mu pimbedi. Pulise̱ mūt’ango̱, ebanja na si dimbedi myeka mo̱ngo̱.” (Myenge 119:176) Mo̱, wa pe̱ o be̱n milemlem ma besengedi ba mulema e?

Yehova a titina a dimbea bowe̱ mo̱ ba pandi na dibemba lao. Ponda iwo̱, a mabolane̱ bonasango o dube̱ o pulise̱ babo̱. K’eyembilan, ombwea ne̱ni Yehova ongwane̱no̱ mūt’ao Hiob ńena nu kusi ndenge̱ ninde̱ne̱ nika ná, mbo̱lo̱n a m’bwaṅ na ńa bana bao bandolo, nikame̱ne̱ pe̱ na diboa la bobe. A we̱lisane̱ pe̱ byala be masengisane̱ sese be wu na bō̱ bena bata bangame̱ne̱ o sue̱le̱ mo̱. Nde to̱ buńa a s’umbe̱ Yehova mbusa to̱na nika a tano̱ a pimbea o mo̱nge̱le̱ mao. (Hiob 1:22; 2:10) Ne̱ni Yehova ongwane̱no̱ mo̱ ná a te̱se̱ pe̱te̱ mo̱nge̱le̱ mao e?

Mbadi po̱ Yehova ongwane̱no̱ Hiob e ta nde tongwea na mwenj’ao Elihu. Ponda Hiob a pase̱le̱no̱ ndut’ao, Elihu a se̱le̱ nde o sengane̱ mo̱ obiana a mato̱po̱. Nje a tano̱ angame̱ne̱ o kwala e? Mo̱, a ta nde angame̱ne̱ o numa Hiob njo̱m to̱so̱ o tute̱le̱ mo̱ o bola bwam tongwea na bwese̱ mo̱ iso̱n e? Mo̱, Elihu a langi mo̱me̱ne̱ ka nute̱m ná sim o boso ba Hiob e? Etum na nika! Yehova a tute̱le̱ Elihu o kwala ná: “Biso̱ na wa je nde ka po̱ o boso ba Loba, mba pe̱ na wu nde o dibudu.” Na Elihu embe̱ Hiob na ben byala ná: “O si soa so̱ o boso bam, bodilo ba doi lam bo si sibea wa.” (Hiob 33:6, 7) O mulopo ma batea Hiob ndutu, Elihu a boli nde mo̱ malea ma ndolo na jongwane̱ a tano̱ a be̱ne̱ ńo̱ngi.

A ńandolo, bia ninka ná, o ni mbadi me̱ne̱ nde di boṅsane̱no̱ nun muna kalati. Di se̱le̱ nde o keka so̱ṅtane̱ na te̱ite̱i nje e boli ná, jita ba pande etum na dibemba. Di senga pe̱ nje ba kwalino̱. (Minia 18:13) Ombusa biso̱ kane̱, jombo o Betiledi myango ma ne̱ni Yehova ongwane̱no̱ bautu bao ba ponda kwaṅ bena ba kusi milemlem ma mitakisan ka wa. Nde o sukan di lata mi myango na nje yena bō̱ ba kusino̱ o nin pond’asu, na ne̱ni ba bukino̱ mo̱. Ben be̱se̱ nde be longi nin kalati. Di mabaise̱ so̱ wa ná, son, o tate o langa mo̱. Be̱ mbaki ná di to̱ndi wa na mulema masu mwe̱se̱.

Dibe̱le̱ di Madie̱le̱ la Mboṅ a Yehova