Kɛlɛ min wulila Ikɛrɛni jamana na, legilizi ɲɛmɔgɔ caaman lo be dɛmɛ donna o la. A kɔrɔsi min b’a yira k’u be dɛmɛ don na o kɛlɛ la:

•   “Aw sɔrɔdasi minw bɛɛ be kɛlɛ kɛra walisa ka an ka jamana (Ikɛrɛni) lafasa, aw ka kan ni tandoliba ani waleɲumanlɔn ye. . . An be n’aw ye. An be delili kɛra aw ye n’an dusu bɛɛ ye, ani an b’aw kɔ tuma bɛɛ.”—O ye Épiphane fɔlɔ ka kumaw ye. Kiyɛvu dugu ka diinan ɲɛmɔgɔba dɔ lo. O kumaw bɔra The Jerusalem Post la, saan 2022 Marisikalo tile 16 loon.

•   “Dimansi tɛmɛnin, Irisi ka ɔritodɔksi diinan kuntigi ye lajɛn kɛrɛnkɛrɛnnin dɔ kɛ ni Irisi sɔrɔdasiw ye. A y’u jija u ka kɛlɛ kɛ walisa k’u ka jamana lafasa ‘i ko Irisikaw dɔrɔn be se k’o kɛ cogo min na.’ O wagati kelen na Irisi jamana ɲɛmɔgɔ minw be Mɔsuku, olu bele be sɔrɔdasiw cira k’u ka taga Ikɛrɛni kɛlɛ.”—Reuters, saan 2022 Awirilikalo tile 3.

 Yala kerecɛnw ka ɲi k’u seen don kɛlɛkow la wa? Bibulu be mun lo fɔ o koo la?

 Bibulu b’a fɔ ko Krista ka kalanden sɔbɛw man kan k’u seen don kɛlɛkow la.

•   “I ka murujan don a nɔɔ na, bari mɔgɔ minw be kɛlɛ kɛ ni murujan ye, murujan le bena u faga fana.”—Matiyo 26:52.

   Mɔgɔ minw be taga kɛlɛ la wala minw be dɛmɛ don kɛlɛkow la, yala u be Yezu ka kuma nunu labatora wa?

•   “Ne be cikura di aw ma ko: aw ka ɲɔgɔn kanu, ne y’aw kanu cogo min na, aw fana ka ɲɔgɔn kanu ten. Mɔgɔ bɛɛ ben’a lɔn o seen fɛ ko aw kɛra ne ka kalandenw ye, ni aw be ɲɔgɔn kanu.”—Zan 13:34, 35.

   Yezu y’a fɔ ko kanuya min bena a ka kalandenw faranfasi ka bɔ tɔɔw la, ni mɔgɔ b’a seen don kɛlɛkow la yala a tigi b’o kanuya yirala wa?

 N’i b’a fɛ ka dɔ lɔn ka fara o kan, i be se ka barokun nin kalan: “Peut-​on concilier guerre et christianisme ?”

 Yala a bɛnnin lo bi bi nin na kerecɛn ka ban k’a seen don kɛlɛkow la wa? Ɔnhɔn. Bibulu tun kɔnna k’a fɔ ko an ka wagati la (‘laban loon na’), siya caaman mɔgɔ dɔw ‘tɛna dege kɛlɛkow la tugun.’ U ben’a yira o cogo la k’u be tugura Yezu ka kalanw lo kɔ.—Ezayi 2:2, 4, Bible senuma.

•   Walisa ka kunnafoni wɛrɛw sɔrɔ o ko la, Kɔrɔsili Sangaso ka barokun nin kalan: “La guerre : qu’en pense Dieu ?”

 Yanni dɔɔni, “Hɛrɛtigi Ala”Jehova a bena tɛmɛ a ka sankolola gofɛrɛnɛman fɛ ka mɔgɔw kisi “benkannikɛlaw, ni mɔgɔ farimanw ma.”—Filipikaw 4:9; Zaburuw 72:14.

•   Walisa k’a lɔn a bena o kɛ cogo min na, videwo nin filɛ: Ala ka Masaya ye mun lo ye?