Jehova b’a fɛ mɔgɔ sifa bɛɛ k’a ale lɔn ani k’a ka sankolo Masaya koo mɛn u ka koow cogoya mana kɛ min o min ye (1 Timote 2:3, 4). O lo kama, Jehova seerew b’u seko bɛɛ kɛ ka Bibulu ni u ka sɛbɛw bɔ mɔgɔ caamanba ye. An b’u bɔ fana bobow ye. Tiɲɛn na, an ka ɔriganisasiyɔn ye an ka sɛbɛw videwolaman waa caaman bɔ bobow kumacogo la. O sɛbɛw be sɔrɔ bobow kumacogo kɛmɛ ni kɔ la! a An b’o videwow labɛn ani k’u jɛnsɛn cogo di? Ani an be to ka yɛlɛmani jumanw lo kɛ u kɔnɔ tuma o tuma?

 An ka bayɛlɛmani jɛnkulu minw be duniɲa kuru bɛɛ kɔnɔ, u dɔw lo be an kan gafew bayɛlɛma bobow kumacogo la. U be sɛbɛ min bayɛlɛmana, u be kɔn k’a ɲini k’o faamu ka ɲɛ. O kɔ, u b’a filɛ u bena a bayɛlɛma cogo min na bobow kumacogo nɔgɔman na. N’u y’a bayɛlɛma ka ban, u b’a videwolaman kɛ. Fɔ ka na se bi ma, bayɛlɛmani jɛnkuluw 60 lo be to ka bayɛlɛmani kɛ tuma o tuma ani bayɛlɛmani jɛnkulu 40 b’o kɛ tuma kelen kelen.

 Fɔlɔ la, ka se ka videwow bɔ bobow kumacogo la, o sɔngɔ tun ka gwɛlɛ. Kameraw ni videwominan wɛrɛw sɔngɔ tun ka gwɛlɛ kojugu ka tɛmɛ bi kan. Ani fana, videwow anrezistreman tun be kɛ studio dɔ le kɔnɔ. Tuma caaman na, an yɛrɛ lo tun ka ɲi k’o studio lɔ, wala ni dɔ be yen ka ban, an ka ɲi ko lakuraya le. Walisa k’o birow lɔ ani k’u labɛn bayɛlɛmani baara kama bobow kumacogo la, o baaraw musakaw bɛɛ lajɛnnin tun be se ka tɛmɛ dolari 30 000 kan (wala miliyɔn tan ni seegi ni kɔ, sefa wari la). b

 Walisa ka baara ɲuman kɛ ni balimaw ka niliw ye, an ka ɔriganisasiyɔn ye fɛɛrɛ dɔ sɔrɔ walisa ka bayɛlɛmani baara cogo fisaya ani k’a koo nɔgɔya. O kama, minan minw be mɛɛn ani u sɔngɔ man gwɛlɛ, an y’a latigɛ k’o le san. Sanni u ka studio dɔ lɔ, bayɛlɛmani jɛnkulu mɔgɔw ye fani binkɛnɛman dɔ nɔrɔ u ka biro kogo kan ani k’a labɛn. O la, u be se ka to u ka biro kɔnɔ ka anrezistremanw kɛ. N’u mako be mɔgɔ caaman na walisa k’an ka sɛbɛ yɔrɔ dɔ videwolaman kɛ bobow kumacogo la, kuun t’a la tugun u ka taga studio dɔ la k’o anrezistreman kɛ.

 Minw be an ka sɛbɛw videwolaman anrezistreman kɛ bobow kumacogo la, an ye porogramu dɔ sigi fana ɔridinatɛri kɔnɔ walisa k’u dɛmɛ u ka baara la. Bayɛlɛmabagaw tun be wagati hakɛ min ta k’an ka sɛbɛw videwolaman bɔ bobow kumacogo la, dɔ bɔra o wagati hakɛ la. Balimaw y’u ka waleɲumanlɔn yira o yɛlɛmaniw kosɔn. Balimacɛ dɔ tɔgɔ ko Alexander. Ale y’a fɔ ko: “An ka teli ka videwow sɔrɔ sisan bobow kumacogo la ka tɛmɛ fɔlɔ la kan. N’ ninsɔn ka di kosɔbɛ o kosɔn. N’ b’u filɛ loon bɛɛ.”

 Bayɛlɛmani jɛnkuluw mako be min na ka se k’u ka baara kɛ, bi bi nin na, o musakaw ma se dolari 5 000 ma (wala miliyɔn saba ɲɔgɔn, sefa wari la). O y’a to an be sera ka videwow bɔ bobokan caaman na.

 Ni bayɛlɛmabagaw y’an ka sɛbɛw anrezistreman kɛ bobokan na ka ban, u b’o videwow bɔ walisa minw mako b’o la, u ka se k’o sɔrɔ. Fɔlɔ la, an tun b’o videwow sedelaman (CD) ni kasɛtilamanw le bɔ. O sɔngɔ tun ka gwɛlɛ, o tun be wagati caaman ta ani o tun tɛ ɲɛ baaraba kɔ. N’an tun y’o videwow anrezistreman kɛ ka ban, an tun be taga n’u ye studio dɔ la walisa u k’o kasɛti ni sedelamanw kɛ caaman. O kɔ, an tun b’u lajɛn ani k’u ci kafow ma. Saan 2013 dɔrɔn na, an ye dolari miliyɔn fila lo don o kasɛtiw n’o devedew musakaw la (miliyari kelen ni miliyɔn kɛmɛ fila ni kɔ, sefa wari la).

 O labɛnw diyara bobow ye yɛrɛ le. Nka a tun man nɔgɔ ka baara kɛ n’o videwokasɛtiw wala sedew (CD) ye sabu dɔ le tun be to ka fara tuma bɛɛ u hakɛ kan. Tuma dɔw la yɛrɛ, Bibulu ka kitabu kelen dɔrɔn be se ka sede (CD) caaman ta. Balimacɛ dɔ tɔgɔ ko Gilnei, a be bɔ Berezil. Ale y’a fɔ ko: “N’an tun b’a fɛ ka vɛrise dɔ kalan, fɔɔ an tun k’a lɔn fɔlɔ o be sɔrɔ kasɛti min kɔnɔ. O kɔ, an b’o vɛrise yaala o kasɛti kɔnɔ. O tun be mɔgɔ sɛgɛn yɛrɛ le.” Balimamuso Rafayane ye baara kɛ n’o devedew ye bobokan na. A y’a fɔ ko: “Ka se ka kelenna kalan kɛ, o tun man nɔgɔ fewu. An tun be wagati caaman le ta ka vɛrisew wala bibulusenw ɲini.” Ni balimaw tun bɔra waajuli la, u tun be o videwokasɛtiw ni devedew ta u kuun. N’u tun sera dɔ ka daa la ani a tigi y’a mako don, balimaw tun be o don a tigi ka tele la walisa a k’a filɛ. Balima dɔw tun be bɔ n’u yɛrɛ ka devede (DVD) ye. A ma mɛɛn, devede dennin dɔw bɔra minw minɛ ka di ani balima caaman ye baara kɛ n’o ye. Balimacɛ Bobby be bɔ Etazini. A y’a fɔ ko: “N’i tun ye vɛrise dɔ yira, o kɔ i b’a fɛ ka dɔ wɛrɛ yira, fɔɔ i tun ka sede (CD) wɛrɛ le don. O tun be wagati caaman ta ani a tun ka gwɛlɛ ka baara kɛ ni Bibulu ye waajuli la.”

 Saan 2013 la, Jehova Seerew ka ɔriganisasiyɔn ye JW Library apilikasɔn bɔ Bobow kumacogo la. O y’a to balimaw be se k’o telesarse ani ka videwow yira bobow kumacogo la u ka telefɔni wala tablɛti kan waajuli la. A daminɛ na, o apilikasɔn tun be sɔrɔ Ameriki ka bobow kumacogo lo la. O kɔ, saan 2017, u y’a lakuraya walisa a ka sɔrɔ bobow kumacogo bɛɛ la. O kɛra ninsɔndiyaba ye balimaw fɛ duniɲa kuru bɛɛ kɔnɔ. Balimacɛ Juscelino be bɔ Berezil. A y’a fɔ ko: “O ye n’ kabakoya yɛrɛ le! N’ tora k’a fɔ n’ yɛrɛ ye ko Koow Ɲɛnabɔla Jɛnkulu b’an bobow kanu ani ko a b’a fɛ an ka ɲɛtaga kɛ tiɲɛn sira kan i ko balima tɔɔw. N’ ninsɔn diyara fɔɔ a tɛ se ka fɔ! O ye Bibulu kalan diya don n’ na tugun.”

 Bi bi nin na, an be videwow bɔ bobow kumacogo bɛɛ la ani k’u bila an ka site jw.org kan ani JW Library apilikasɔn na Bobow kumacogo la. O y’a to an tɛ kalo wala saan caaman ta tugun k’an ka sɛbɛw bayɛlɛma, k’u anrezistreman kɛ ani k’u bɔ. Sisan, an be se k’o kɛ tile damanin dɔrɔn kɔnɔ. Tiɲɛn na, bobokan caaman ka gafew be bɔ wagati kelen na ni gafe tɔɔw ye.

 An ka bobo dɔw ka lakalitaw lamɛn o koo la. Balimamuso Klízia y’a fɔ ko: “Ni Jehova ka ɔriganisasiyɔn tɛ, ɔriganisasiyɔn juman lo b’a janto bobow la fɔɔ a b’a jija walisa u ka se ka dumuni sɔrɔ Alako ta fan fɛ cogo nɔgɔman na? Jehova ka ɔriganisasiyɔn be min kɛ an ye, foyi tɛ yen duniɲa nin na min b’o bɔ.” Balimacɛ Vladimir ko: “Ka gafew bɔ bobokan caaman na wagati kelen na ni gafe tɔɔw ye, o b’a yira ko Jehova be tɔɔw kanu cogo min na, a be an bobow fana kanu ten.”

 Tuma caaman na, kuma nin ka teli ka sɔrɔ an ka videwow daminɛ na bobow kumacogo la: “Bibulu kalan baara min be kɛra duniɲa kuru bɛɛ kɔnɔ, sɛbɛ nin dilanna o lo kama niliw sababu fɛ.” An b’aw fo kosɔbɛ aw ka niliw kosɔn. Aw caaman b’o kɛ ɛntɛrɛnɛti sababu fɛ, donate.pr418.com kan. O niliw b’a to an be Bibulu ani an ka sɛbɛw bɔ mɔgɔ caaman ye, hali bobow kumacogo la.