Miziki ye Jehova ka nilifɛn nafaman dɔ ye. A be se ka nɔɔ to an ka miiriyaw n’an dusukunnataw kan, ani a b’an lasun ka dɔ kɛ dɔ ye. An ka dɔnkiliw b’o lo yira ka gwɛ. Ka fara o kan, u be se k’an magwɛrɛ kosɔbɛ Jehova la.

 Kabi saan 2014, an ka dɔnkili diiman 70 ni kɔ lo bɔra ani bi bi nin na, u dɔ be sɔrɔ kaan 500 ni kɔ bɛɛ la! Nka, n’a sɔrɔ i b’i yɛrɛ ɲiningara ko: “Jɔn lo b’o dɔnkiliw sɛbɛ ani baara jumanw lo be kɔn ka kɛ sanni o dɔnkiliw ka bɔ?”

 Audio-Vidéo mɔgɔw lo be miziki labɛnko baaraw kɛ. Koow Ɲɛnabɔla Jɛnkulu be tɛmɛ Kalanko ɲɛnabɔbagaw ka kɔmite fɛ k’o baaraw ɲɛminɛ. Mɔgɔ 13 lo b’o miziki jɛnkulu kɔnɔ. Olu lo be dɛmɛ don ka dɔnkiliw kɔnɔnakumaw sɛbɛ, ka mizikiw anrezistreman koo ɲɛnabɔ, ka porogramu dɔ kɛ o baaraw kama ani ka baara wɛrɛw kɛ. Ka fara o kan, Kalanko ɲɛnabɔbagaw ka kɔmite ye sira di ko duniɲa kuru bɛɛ kɔnɔ, mɔgɔ dɔw ka to u ka soo ani ka dɛmɛ don o baaraw la. U cɛma, dɔw ye dɔnkili kɔnɔnakumaw sɛbɛbagaw ye, dɔw ye fɔlifɛn fɔbagaw ye ani dɔw ye dɔnkililabagaw ye. U be ni setigiya min ye, u tɛ ta o ma k’u yɛrɛ yira.

 Baara jumanw lo be kɔn ka kɛ sanni an ka dɔnkiliw ka bɔ? A fɔlɔ, Kalanko ɲɛnabɔbagaw ka kɔmite lo b’a latigɛ dɔnkili kelen kelen bɛɛ ka ɲi ka basigi vɛrise min kan ani o dɔnkili ka ɲi ka min kɛ a lamɛnbagaw la. O kɔ, miziki jɛnkulu mɔgɔw lo b’a latigɛ u bena fɔlifɛnw fɔko ani dɔnkili kɔnɔnakumaw sɛbɛko kalifa mɔgɔ minw ma. Ka fara o kan, u b’o dɔnkili anrezistreman dɔ kɛ ka filɛ. Kalanko ɲɛnabɔbagaw ka kɔmite b’o lamɛn ani ka yɛlɛmani dɔw don. Miziki jɛnkulu mɔgɔw b’o yɛlɛmaniw kɛ ani k’a anrezistreman yɛrɛ yɛrɛ kɛ ka sɔrɔ k’o dɔnkili bɔ. U be dɔnkililabagaw kaan ta yɔrɔ caaman na i n’a fɔ Betɛli la walima Jehova Seere dɔw fɛ, minw be ni anrezistreman minanw ye.

 Walisa ka dɔnkili kɔnɔnakumaw sɛbɛ ani ka dɔnkililabagaw kaan ta, an be baara kɛ ni ɔridinatɛri n’a ɲɔgɔnnaw ye o kama. Ka fara o kan, an be baara kɛ ni fɔlifɛnw ye, ni kankɔrɔtalanw ani mikrow ye. Minan minw b’an dɛmɛ ka dɔnkililabaga kaan ni miziki ɲagami ɲɔgɔn na, an be baara kɛ n’o ye fana. Mikro kelen sɔngɔ be se ka daminɛ dolari 100 ɲɔgɔn (60 000 ɲɔgɔn sefa wari la) fɔɔ ka taga se dolari 1000 ni kɔ ma (600 000 ɲɔgɔn, sefa wari la). Saan 2020, an ye fɔlifɛn minan minw san, u bɛɛ sɔngɔ kɛra dolari 116 000 (miliyɔn biwolonfila ɲɔgɔn, sefa wari la).

 An be baara ɲuman kɛ ni balimaw ka niliw ye cogo di? Sanni ka miziki jɛnkuluba dɔ sigi Betɛli la, an be baara kɛ ni balima caaman ye, minw y’u yɛrɛ di ani u be to u ka soo ka baara kɛ Betɛli ye. Ka fara o kan, sanni ka balimaw weele u ka na fɔli kɛ Betɛli la ani an b’o anrezistre, tuma caaman na, balimaw be tɛmɛ ɔridinatɛri porogramu dɔ fɛ ka miziki labɛn. Fɔlifɛn caaman kaan b’o porogramu kɔnɔ.

 A ka di balimaw ye k’an ka dɔnkili diimanw lamɛn. Balimamuso dɔ tɔgɔ ko Tara, a be bɔ Alemaɲi jamana na. A ko: “Ni n’ hakili ɲagamina, an ka dɔnkiliw be n’ hakili sigi. Ni n’ b’u lamɛn n’ ka kaan na, a be i n’a fɔ Jehova melekera n’ na le.” Balimacɛ dɔ be bɔ Kazakstan jamana na, a tɔgɔ ko Dmitry. A ko: “A ka di n’ ye ka an ka dɔnkiliw lamɛn sabu n’ tɛ n’ yɛrɛ ɲininga n’u bɛnnin lo ni Bibulu ka sariyakolow ye. Ka fara o kan, teriya min be ne ni Jehova cɛ, o dɔnkiliw be n’ dɛmɛ k’o le kɛ n’ ɲɛnako fɔlɔ ye.”

 Delia be bɔ Afirikidisidi. Ale y’a ɲɛfɔ an ka dɔnkiliw be min kɛ a la. A ko: “O dɔnkiliw be n’ ka limaniya barika bonya. Ni n’ dusu man di wala ni gwɛlɛya dɔ be n’ kan, n’ be dɔnkili dɔ sɔrɔ tuma bɛɛ min be kuma n’ ka gwɛlɛya koo la tigitigi. Tuma caaman na, an ka dɔnkiliw ka miziki dɔrɔn be se ka n’ hakili sigi!”

 Dɔw be ni dɔnkili tigitigi dɔw ye minw ka di u ye kosɔbɛ. Balimacɛ Lerato fana be bɔ Afirikidisidi ani a ko: “Dɔnkili minw barokun ko “Alijɛnɛ b’an ka daa la” ani “Duniɲa kura nata,” u be n’ dɛmɛ ka miiri wagati min na n’ bena boli ka n’ bamuso kanulen kunbɛn alijɛnɛ kɔnɔ. Tuma o tuma n’ mana o dɔnkiliw lamɛn, n’ be miiri k’a ye ko a y’a bolow yɛlɛ n’a be bolila ka na meleke n’ na.”

 An balimamuso dɔ be bɔ Sri Lanka ani a be ni saan 16 ye. An ka dɔnkili diiman tigitigi dɔ b’ale fana dɛmɛ. A ko: “N’ ka profesɛri dɔ ye kuma juguw fɔ n’ ye klasidenw ɲɛfɛ sabu n’ ye Jehova Seere ye. N’ siranna fɔɔ n’ tun m’a lɔn n’ bena min fɔ a ye. Tuma min na n’ sera soo, n’ bamuso ye n’ jija n’ ka dɔnkili nin lamɛn: “Étudier rend fort.” O dɔnkili ye n’ dɛmɛ k’a ye ko n’ ka ɲi ka sɛgɛsɛgɛri kɛ ani ka jaabili dɔ labɛn. O dugusagwɛ, n’ ye baro kɛ ni an ka profesɛri ye. A ye n’ lamɛn koɲuman ani a y’a fɔ n’ ye ko ale be Jehova Seerew ka lannakow faamu ka ɲɛ sisan. N’ be Jehova ka ɔriganisasiyɔn fo o dɔnkiliw kosɔn, o minw be mɔgɔ jija.”

 An be wari sɔrɔ min walisa k’o dɔnkiliw labɛn ani k’u bɔ? Niliw sababu fɛ. Duniɲa kuru bɛɛ kɔnɔ, mɔgɔ caaman ka teli k’u ka niliw kɛ ɛntɛrɛnɛti sababu fɛ, donate.pr418.com kan. Aw b’aw tɛgɛ labila ka nili minw kɛ, an b’aw fo kosɔbɛ o kosɔn!