Saan 2021 zanwiyekalo la, Koow Ɲɛnabɔla Jɛnkulu ye balimaw lalɔnniya ko gafe kura dɔ bɔra bibulukalan kama min tɔgɔ ko: Ɲɛnamaya kɛ hɛɛrɛ la fɔɔ abada! a O ye mun lo kɛ i la do? Matthew be bɔ Kanada ani a ko: “N’ ninsɔn diyara kosɔbɛ! Kalanw lamɛntɔ ani videwow filɛtɔ, u y’a ɲɛfɔ fɛɛn min kama u ye o gafe bɔ ani cogo min na u ye baara kɛ n’a ye ka filɛ. O ye dɔ fara tugun n’ ka ninsɔndiya kan. N’ tun kɔrɔtɔnin lo k’o gafe ye ani k’a daminɛ ka baara kɛ n’a ye.”

 Gafe Ɲɛnamaya kɛ hɛɛrɛ la fɔɔ abada! be bibulukalan kɛcogo kura dɔ lo yira an na. Nka o dɔrɔn lo t’a kɛ dan na ni kalankɛ gafe tɛmɛninw ye. N’i magara o gafe papiyelaman na, n’a sɔrɔ i y’a kɔrɔsi fana ko a ni kalankɛ gafe tɔɔw tɛ kelen ye. Walisa k’a lɔn fɛɛn min kama o be ten, an k’a filɛ a dilanna cogo min na.

 A papiye ka gwili. Mun na o tun ka kan? Jaa kulɛrilaman 600 ni kɔ lo be gafe Ɲɛnamaya kɛ hɛɛrɛ la fɔɔ abada! kɔnɔ. U hakɛ tɛmɛna gafe nin taw kan fɔɔ siɲɛ tan ɲɔgɔn: Bibulu b’an kalan mun lo la? Gafe kura Ɲɛnamaya kɛ hɛɛrɛ la fɔɔ abada! kɔnɔ, u ye yɔrɔ lakolon dɔw to yen fana u ma jaaw ni sɛbɛri kɛ minw kan. O koo fila be na ni gwɛlɛya dɔ ye: ni jaaw kɛra papiye fɛgɛnman kan, o jaaw be se ka ye dɔɔni ɲɛɛ nɔfɛta kan. Walisa o kana kɛ, balima minw be baara kɛ Wallkill (Niyɔriki mara) ka ɛnprimɛri la, olu ye papiye sugu naani sɛgɛsɛgɛ minw be yen sisan an ka ɛnprimɛriw la. Koow Ɲɛnabɔla Jɛnkulu ka kɔmite min b’an ka gafew sɛbɛriko kun na, olu ye o papiye kelen kelen bɛɛ lajɛ k’a filɛ ani ka dɔ sugandi min ka gwili dɔɔni. Tiɲɛn lo k’o papiye sɔngɔ ka gwɛlɛ dɔɔni ka tɛmɛ an ka gafe tɔɔw ka papiyew kan. Nka, o papiye gwiliman b’a to Bibulu kalandenw ka se ka an ka gafe kura ka ɲɛɛw kalan hali ɲɛɛ tɔɔw ka jaaw t’u bali k’u ɲɛmalɔ ka kalan kɛ.

 A kɔgolo dilanna ni mana sugu dɔ ye min ni tɔɔw tɛ kelen ye. An ka gafe kura kɔgolo ni tɔɔw ta tɛ kelen ye sabu a dilanna ni mana sugu dɔ ye min b’a latanga. Gafe tɔɔw kɔgolo dilanna ni mana sugu dɔ ye min be manamana. Nka an ka gafe kura nin kɔgolo dilanna ni mana sugu wɛrɛ ye min tɛ manamana, walisa jaa min be a kan, o ka se ka ye ka ɲɛ. O b’a to fana o gafe kana tiɲɛ joona ni baara be kɛ ni a ye tuma bɛɛ. Nka komi o mana sugu nin sɔngɔ ka gwɛlɛ fɔɔ siɲɛ duuru ka tɛmɛ mana tɔɔw kan minw be manamana, tɔnbolo dɔw ye ɲɔgɔn dɛmɛ ka o manaw sɔrɔ sɔngɔ nɔgɔman na.

 Mun na an y’a latigɛ ka baara kɛ ni o fɛɛn sɔngɔ gwɛlɛw ye? Balimacɛ dɔ be baara kɛra an ka ɛnprimɛri la. Ale y’a fɔ ko: “Komi an b’a lɔn ko baara bena kɛ ni o gafe ye kosɔbɛ, o lo kama an y’a dilan ka ɲɛ walisa hali ni baara kɛra n’a ye siɲɛ caaman, a kana tiɲɛ.” Balimacɛ Eduardo be baara kɛ Berezil tɔnbolo ka ɛnprimɛri la. Ale y’a fɔ ko: “An ninsɔndiyaninba lo k’a ye ko Jehova ka ɔriganisasiyɔn ye baarakɛminan ɲumanbaw lo sugandi walisa ka gafe kura nin cɛɲumanya, a ka se ka mɛɛn ani baara ka se ka kɛ n’a ye cogo nɔgɔman na. U ye baara ɲuman kɛ fana n’an ka niliw ye.”

 An y’a daminɛ ka gafe Ɲɛnamaya kɛ hɛɛrɛ la fɔɔ abada! papiyelaman bɔ saan 2021 marisikalo la. Komi o kɛra COVID-19 fɔɲɔbana tuma na, o nana ni gwɛlɛya caaman ye. Komi Betɛliw daaw tun tugura, balima minw be baara kɛ betɛli la k’a sɔrɔ u siginin tɛ yen, olu tun tɛ se tugun ka na baara kɛ Betɛli la. Ka fara o kan, u tun tɛ se ka mɔgɔ kuraw weele tugun ka na kɛ betɛlidenw ye. O kama ɛnprimɛri dɔw tun tɛ ni baarakɛla caaman ye ani fana dɔw wɛrɛw datugura sabu fɔɲɔbana kosɔn, gofɛrɛnɛman tun ye bali sigi wagati kunkurunin dɔ kɔnɔ.

 An ye see sɔrɔ o gwɛlɛyaw bɛɛ kan cogo di do? Tuma min na ɛnprimɛriw ka baaraw daminɛna tugun, a ɲinina betɛliden dɔw fɛ minw tɛ baara kɛ ɛnprimɛri la ko u ka taga dɛmɛ don ɛnprimɛri baaraw la. Joel be baara kɛ ɛnprimɛri la ani a ko: “U ye u yɛrɛ di o baara la, ani u sɔnna ka fɛɛn kuraw degi ni ninsɔndiya ye. O y’a to baara min tun ka kan ka kɛ, o sera ka kɛ.”

 O gwɛlɛyaw bɛɛ n’a ta, an sera ka gafe Ɲɛnamaya kɛ hɛɛrɛ la fɔɔ abada! papiyelaman miliyɔn caaman bɔ ka ban. Ka se k’o kɛ, an ye baara kɛ ni baarakɛminan caaman ye i n’a fɔ papiye be bɔ plaki minw kan, manaw, papiyew, ankiri ani kɔli. Tuma min na an y’a daminɛ k’o gafe papiyelaman bɔ, kalo duuru o kɔ, an y’a ye ko an ye Ameriki ka dolari miliyɔn fila ni waa kɛmɛ saba lo don minanw sanin dɔrɔn na (o be bɛn miliyari kelen ni tilan ma sefa wari la). Walisa ka wari dɔ mara, kafow mako tun be gafe hakɛ min na tigitigi, an y’an jija k’o dɔrɔn le bɔ papiye kan.

 Weleweledalaw ni Bibulu kalandenw be mun lo miiri gafe kura nin koo la? Balimacɛ Paul be bɔ Ɔsitarali. A ko: “A ka nɔgɔ ka baara kɛ ni gafe Ɲɛnamaya kɛ hɛɛrɛ la fɔɔ abada! ye fɔɔ n’ kɔrɔtɔnin lo ka bibulukalan kɛ ni mɔgɔw ye ni o gafe ye. O gafe cɛ ka ɲi ani a ka nɔgɔ ka baro kɛ ni mɔgɔw ye a kan. Kunnafoni minw be sɔrɔ a kɔnɔ, u gwɛnin lo ani ɲiningaliw be kalanden lasun a k’a ka miiriya fɔ. Videwow, jaaw ni tablow be sɔrɔ a kɔnɔ. Laɲinita dɔw be yen fana kalanden ye. A dilancogo ɲɛna ani o be n’ lasun ka n’ ka mɔgɔw kalancogo fisaya.”

 Etazini jamana na, Bibulu kalanden dɔ y’a fɔ ko: “Gafe kura nin ka di n’ ye yɛrɛ le. Jaaw be n’ dɛmɛ ka miiriya jɔnjɔnw faamu. Videwow be n’ dusukun sɔrɔ ani u be n’ lasun ka dɔ kɛ dɔ ye.” O Bibulu kalanden be kalan kɛ siɲɛ fila lɔgɔkun kɔnɔ ani a tɛ fɔn kafo ka lajɛnw na.

 An bele ka ɲi ka gafe Ɲɛnamaya kɛ hɛɛrɛ la fɔɔ abada! papiyelaman miliyɔn caaman bɔ kaan caaman na. Fɔɔ ka na se bi ma, Koow Ɲɛnabɔla Jɛnkulu ye sira di walisa gafe nin ka bɔ kaan 710 na. O hakɛ tɛmɛna ni Bibulu b’an kalan mun lo la? ta ye ni kaan 340 ye.

 An be sera k’o gafe bɔko musakaw sara cogo di? An be sera k’o sara niliw sababu fɛ mɔgɔ caaman be minw kɛ donate.pr418.com kan. An be aw fo sabu aw b’aw tɛgɛ labila ka niliw kɛ, o min b’an dɛmɛ ka kalankɛ gafew bɔ mɔgɔw ye minw b’a fɛ ka Jehova lɔn ani ka ɲɛnamaya kɛ hɛɛrɛ la fɔɔ abada.—Zaburuw 22:27.