KALANSEN 41
Bibulu be mun lo fɔ cɛnimusoko la?
Mɔgɔ caaman be maloya ka kuma cɛnimusoko la. Nka Bibulu be kuma o koo la cogo min na, o gwɛnin lo ani o be danbe la mɔgɔ kan. A be min fɔ cɛnimusoko la, o b’an nafa sabu Jehova lo ye Bibulu Tigi ye ani ale lo ye an Danbaga ye. A b’a lɔn min ka fisa an ma. An be se ka min kɛ walisa k’an koo diya a ye ani ka ɲɛnamaya kɛ hɛɛrɛ la fɔɔ abada, a b’o fɔ an ye.
1. Jehova be mun lo miiri cɛnimusoko la?
Cɛnimusoko ye Jehova ka nilifɛn dɔ ye. A b’a fɛ furucɛ ni furumuso lo k’o diyabɔ ɲɔgɔn fɛ. O nilifɛn sababu la, cɛɛ n’a muso be se ka deenw wolo, ani fana k’a yira ɲɔgɔn na k’u be ɲɔgɔn kanu. O lo kama, Ala ka Kuma b’a fɔ ko: “E nisɔndiya n’i kanbelentuma muso ye.” (Talenw 5:18, 19). Jehova b’a ɲini furuɲɔgɔnmaw fɛ u ka kantigiya kɛ ɲɔgɔn ye. U man kan ka ɲamɔgɔya kɛ abada!—Eburuw 13:4 kalan.
2. N’u ko kakalaya, o ye mun lo ye?
Bibulu b’a fɔ ko “kakalaw . . . tena Ala ka masaya sɔrɔ.” (1 Korɛntikaw 6:9, 10). Gɛrɛkikan kumaden min bayɛlɛmana ko kakalaya, o ye pornéïa lo ye. O kumaden ɲɛsinna koo nunu ma: 1) ka jɛn ni cɛɛ wala muso ye a k’a sɔrɔ aw furunin tɛ ɲɔgɔn ma, 2) ka jɛn n’i cɛɲɔgɔn wala n’i musoɲɔgɔn ye, ani 3) ka jɛn ni bɛgɛn ye. Ala ka Kuma ko an “kana kakalaya kɛ.” N’an b’o cikan sira tagama, o be Jehova ninsɔndiya ani o b’an yɛrɛ nafa.—1 Tesalonikaw 4:3.
A ƝINI KA DƆ LƆN TUGUN
I saniyanin be se ka to cɛnimusoko ta fan fɛ cogo di? Ani, nafa juman b’o la? An k’o lajɛ.
3. Boli jatɔya ɲɛ
Cɛɛ kantigi Yusufu y’a jija sɔbɛ la walisa a saniyanin ka to cɛnimusoko ta fan fɛ. Zɛnɛzi 39:1-12 kalan. O kɔ, a’ ye ɲiningali nunu kɛ ani ka baro kɛ u kan:
-
Mun lo y’a to Yusufu bolila?—Vɛrise 9 lajɛ.
-
Ele fɛ, Yusufu ye desizɔn ɲuman lo ta wa? Mun na i ko ten?
Kanbelew ni sunguruw be se ka Yusufu ladegi cogo di ani ka boli jatɔya ɲɛ? A’ ye VIDEWO filɛ.
Jehova b’a ɲini an kelen kelen bɛɛ fɛ an k’an yɛrɛ tanga jatɔya ma. 1 Korɛntikaw 6:18 kalan. O kɔ, a’ ye ɲiningali nunu kɛ ani ka baro kɛ u kan:
-
Mun lo be se ka mɔgɔ bila kakalayakow la?
-
I be se ka mun lo kɛ k’a yira ko i be boli jatɔya ɲɛ?
4. I be se ka see sɔrɔ kakalayakow nege kan
Ka see sɔrɔ kakalayakow nege kan, o man nɔgɔ. Mun na do? A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
-
Tuma min na balimacɛ nin y’a ye ko a kɛtaw be se k’a to a b’a muso janfa, a ye mun lo kɛ do?
Hali kerecɛn kantigiw ka kan ka bondori kɛ tuma dɔw la walisa ka koo nɔgɔninw bɔ u hakili la. An be se ka mun lo kɛ walisa kakalaya miiriya kana sigiyɔrɔ sɔrɔ an hakili la? Filipikaw 4:8 kalan. O kɔ, a’ ye ɲiningali nunu kɛ ani ka baro kɛ u kan:
-
An ka ɲi ka miiri koo sifa jumanw lo la?
-
N’an be Bibulu kalan ani n’an bolo degunnin lo Jehova ka baara la, cogo juman na o be se k’an dɛmɛ an kana jurumu kɛ?
5. Jehova ka sariyakolow b’an nafa
Jehova b’a lɔn min ka fisa an ma. A b’a yira an ka ɲi ka min kɛ walisa an saniyanin ka to tagamacogo ta fan fɛ ani nafa min b’o la. A’ ye Talenw 7:7-27 kalan, wala a’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
-
Mun lo y’a to kanbele nin y’a yɛrɛ sɔrɔ farati la?—Talenw 7:8, 9 lajɛ.
-
Talenw 7:23, 26 ka fɔta la, jatɔya be se ka kunkoba lase mɔgɔ ma. N’an saniyanin tora tagamacogo ta fan fɛ, an bena an yɛrɛ tanga kunko jumanw ma?
-
N’an saniyanin lo tagamacogo ta fan fɛ, o be se k’an dɛmɛ cogo di ka ɲɛnamaya kɛ hɛɛrɛ la fɔɔ abada?
Dɔw b’a jati ko Bibulu be min fɔ cɛɲɔgɔnɲini wala musoɲɔgɔnɲini koo la, o tɛ kanuyako ye. Nka, Jehova ye kanutigi Ala ye. A b’a fɛ bɛɛ ka ɲɛnamaya kɛ hɛɛrɛ la fɔɔ abada. Nka, fɔɔ an k’a ka sariyaw labato le. 1 Korɛntikaw 6:9-11 kalan. O kɔ, a’ ye ɲiningali nin kɛ ani ka baro kɛ o kan:
-
Cɛɲɔgɔnɲini wala musoɲɔgɔnɲini dɔrɔn lo ka gwo Ala ye wa?
An bɛɛ lo ka ɲi ka yɛlɛmani dɔw kɛ n’an b’a fɛ k’an koo diya Ala ye. Kuun b’o la wa? Zaburuw 19:9, 12 kalan. O kɔ, a’ ye ɲiningali nunu kɛ ani ka baro kɛ u kan:
-
E ka miiri la, Jehova ka sariyakolow bɛnnin lo wa? Mun na i ko ten?
Jehova ye mɔgɔ caaman dɛmɛ k’u ka ɲɛnamaya kɛcogo yɛlɛma. A be se ka e fana dɛmɛ.
NI MƆGƆ DƆ Y’A FƆ I YE KO: “Koo jugu tɛ ni mɔgɔ fila be cɛnimusoko kɛ, a daan ye u ka ɲɔgɔn kanu dɔrɔn.”
-
I bena a tigi jaabi cogo di?
MIIRIYA JƆNJƆN
Cɛnimusoko ye Jehova ka nilifɛn dɔ ye. A b’a fɛ furucɛ n’a muso lo k’o diyabɔ ɲɔgɔn fɛ.
I ye mun lo faamu?
-
N’u ko kakalaya, o ɲɛsinna koo sifa jumanw lo ma?
-
Mun lo bena an dɛmɛ an k’an yɛrɛ tanga kakalayakow ma?
-
Nafa juman b’a la ka Jehova ka sariyakolow labato?
NUNU LAJƐ FANA
A filɛ fɛɛn min kama Ala b’a fɛ cɛɛ ni muso k’u ka furu siri fɔlɔ ka sɔrɔ ka sigi ɲɔgɔn fɛ.
Bibulu be min fɔ cɛɲɔgɔnɲini koo la, mun na o tɛ mɔgɔ jija k’o mɔgɔ suguw kɔniya?
“Cɛɲɔgɔnɲini wala musoɲɔgɔnɲini: koo jugu lo wa?” (A be sɔrɔ jw.org kan)
Ala ka sariyaw be min fɔ cɛnimusoko la, a filɛ fɛɛn min kama o be mɔgɔ latanga.
Mun lo ye cɛɲɔgɔnɲinina dɔ lasun k’a ka ɲɛnamaya kɛcogo yɛlɛma? O lajɛ barokun nin na: “Ils ont respecté ma dignité.”
“La Bible transforme des vies” (Saan 2011, awirilikalo tile fɔlɔ ka Kɔrɔsili Sangaso)
a Ka jɛn ni mɔgɔ dɔ ye, o ye ka la n’a tigi ye, ka cɛnimusoko kɛ n’a tigi ye daa la wala kɔda la, wala k’a tigi ɲɛfɛla mɔmɔ walisa ka cɛnimusoko nege don a la.
